શૈક્ષણિક સંસ્થાઓમાં કર્ણાટક સરકારે મૂકેલા હિજાબ બેનને પડકારતી અરજીઓ પર સુપ્રીમ કોર્ટમાં સુનાવણી શરુ થઈ છે. હિજાબ બેનની વિરુદ્ધમાં દલીલો કરનાર વકીલને ટકોર કરતા સુપ્રીમની ખંડપીઠે એવું જણાવ્યું કે જો સ્કૂલો કે કોલેજોમાં હિજાબ ચાલુ રાખવા દેવામાં આવે તેવો તમારો અભિપ્રાય હોય તો પછી સ્કૂલોમાં છોકરાઓને ધોતી પહેરવા દેવી જોઈએ. સુપ્રીમ કોર્ટની બે જજની બેન્ચ કર્ણાટક હાઈકોર્ટમાં એક નિર્ણય વિરુદ્ધ એક મહત્વના કેસની સુનાવણી કરી રહી છે. આ કેસ 'સ્કાર્ફ પર પ્રતિબંધ' (સામાન્ય શબ્દોમાં હિજાબ પ્રતિબંધ) સાથે સંબંધિત છે. આ કેસની સુનાવણી જસ્ટિસ હેમંત ગુપ્તા અને સુધાંશુ ધુલિયાની બેંચ કરી રહી છે. તો સાથે જ અલગ અલગ અરજીઓ દાખલ કરતા વકીલો પોતાની દલીલો રજૂ કરી રહ્યા છે.
વકીલ દેવદત્ત કામતની દલીલ પર સુપ્રીમની ટકોર
વકીલ દેવદત્ત કામતે હિજાબને "અભિવ્યક્તિની સ્વતંત્રતા"નો ભાગ ગણાવ્યો હતો, ત્યારે બેન્ચમાં સામેલ જસ્ટિસ ગુપ્તાએ પૂછ્યું હતું કે, જો કોઈ સલવાર કમીઝ પહેરવા માંગે છે અથવા છોકરાઓ ધોતી પહેરવા માંગે છે, તો શું તેને પણ મંજૂરી આપવી જોઈએ? દેવદત્ત કામતે મૂળભૂત અધિકારોનો પ્રશ્ન કોર્ટ સમક્ષ મૂકતા કહ્યું- બંધારણની કલમ 19 (1) અભિવ્યક્તિની સ્વતંત્રતાનો અધિકાર આપે છે. આ અધિકાર એ પણ સુનિશ્ચિત કરે છે કે શું પહેરવું. આના પર જસ્ટિસ ગુપ્તાએ કામતને પૂછ્યું કે અત્યારે તમે રાઇટ ટુ ડ્રેસની વાત કરી રહ્યા છો, તો બાદમાં તમે પણ રાઇટ ટુ ડ્રેસની વાત કરશો, આ એક જટિલ પ્રશ્ન છે. કોર્ટે વધુમાં પૂછ્યું હતું કે, જો કોઈ સલવાર કમીઝ પહેરવા માંગે છે, અથવા છોકરાઓ ધોતી પહેરવા માંગે છે, તો શું તેને મંજૂરી આપવામાં આવશે?
શું સરકાર આર્ટિકલ ૧૯ ના હક આપવામાં નિષ્ફળ ગઈ?
આ પહેલા કામતે કોર્ટમાં દલીલ કરી હતી કે અહીં સવાલ એ છે કે શું સરકાર આર્ટિકલ 19, 25 અને 26 હેઠળ વિદ્યાર્થીઓને તેમના યોગ્ય અધિકાર આપવામાં નિષ્ફળ રહી છે. અમે અહીં યુનિફોર્મને ચેલેન્જ નથી આપી રહ્યા કે નથી કહી રહ્યા કે કોઈએ યુનિફોર્મને બદલે જીન્સ કે અન્ય કોઈ કપડાં પહેરવા જોઈએ? મારી દલીલ એ છે કે જો કોઈ વિદ્યાર્થી સ્કૂલનો યુનિફોર્મ પહેરે છે અને શું સરકાર તેમને તેમના માથા પર સ્કાર્ફ બાંધતા અટકાવી શકે છે? હિજાબ કે જિલબાબની કોઈ વાત નથી કે જે તેમને માથાથી પગ સુધી ઢાંકી દે?
હવે આવતીકાલે થશે સુપ્રીમમાં સુનાવણી
કર્ણાટક હિજાબ વિવાદે હવે આવતીકાલે સુપ્રીમમાં આગળની સુનાવણી થશે. ઉલ્લેખનીય છે કે કર્ણાટક હાઈકોર્ટે શૈક્ષણિક સંસ્થાઓમાં હિજાબ પહેરવા પર પ્રતિબંધ મૂકી દીધો હતો જેને મુસ્લિમ પક્ષ દ્વારા સુપ્રીમમાં પડકારાયો હતો.