પોતાની પત્ની સાથે અકુદરતી શારીરિક સંબંધો બાંધનાર એક પતિની સામે કલમ 377 હેઠળ કાર્યવાહી કરવાનો પોલીસને કર્ણાટક હાઈકોર્ટે આદેશ આપ્યો છે.
કર્ણાટક હાઈકોર્ટનો પોલીસને આદેશ
પત્ની સાથે અકુદરતી સંબંધ બાંધનાર પતિ સામે કલમ 377 દાખલ કરો
પત્નીએ પતિ પર મૂક્યો હતો અકુદરતી સંબંધ બાંધવાનો આરોપ
પત્નીનો આરોપ- પતિ પરપુરુષો સાથે સેક્સ અને ગ્રુપ સેક્સનું દબાણ કરતો હતો
પતિએ અશ્લીલ ફોટા અને તસવીરો વાયરલ કરી- પત્નીએ કહ્યું
કર્ણાટક હાઈકોર્ટમાં સોમવારે પત્નીએ પતિ સામે દાખલ કરેલા અકુદરતી સેક્સ કેસની સુનાવણી ચાલી હતી. હાઈકોર્ટમાં મહિલાએ તેના પતિ પર એવો આરોપ મૂક્યો હતો કે તેના પતિએ તેને અકુદરતી સેક્સ માટે દબાણ કર્યું હતું અને તેના ઇનકાર પર ત્રાસ આપ્યો હતો, અને શારીરિક હુમલો પણ કર્યો હતો.ફરિયાદમાં વધુમાં જણાવાયું છે કે પતિએ ફરિયાદી-પત્નીના કેટલાક અશ્લીલ ફોટા ક્લિક કર્યા હતા અને કેટલીક વીડિયો ક્લિપ્સ પણ શૂટ કરી હતી જે તેણે પાછળથી સોશિયલ મીડિયા પ્લેટફોર્મ વોટ્સએપ અને ફેસબુક પર તેના પિતા અને કેટલાક મિત્રોને ફરતી કરી હતી.
પતિ સામે કલમ 377 હેઠળ કેસ દાખલ કરો- હાઈકોર્ટના પોલીસને આદેશ
મહિલાની રજૂઆત સાંભળ્યા બાદ જસ્ટિસ એમ.નાગપ્રસન્નાએ પોલીસે પતિ સામે કલમ 377 હેઠળ કાર્યવાહી કરવાનો આદેશ આપ્યો હતો. કલમ 377 અકુદરતી સેક્સ સંબંધિત છે. જસ્ટિસે પત્નીએ નોંધાવેલી ફરિયાદની તપાસમાં થયેલી ઢીલ બદલ રાજ્ય પોલીસની ઝાટકણી કાઢી હતી. બેંગ્લોર સિટી પોલીસે 26 સપ્ટેમ્બર, 2019 માં દાખલ કરેલી તેની ચાર્જશીટમાં ભારતીય દંડ સંહિતાની કલમ 377 (અકુદરતી સેક્સ) અથવા ઇન્ફર્મેશન એન્ડ ટેકનોલોજી (આઇટી) એક્ટ, 2000 ની સંબંધિત જોગવાઈઓનો ઉપયોગ કર્યો નહોતો, આથી જસ્ટિસે કલમ 377 હેઠળ કેસ દાખલ કરવાનો આદેશ આપ્યો હતો.
જાણો છે શું મામલો
કેસની હકીકત મુજબ, બેંગ્લોરની મહિલા અને તેનો બંને 2013માં આઈઆઈટી-બોમ્બેમાં પીએચડી કરતી વખતે મિત્ર બન્યા હતા અને બાદમાં 2015માં બંનેએ લગ્ન કરી લીધા હતા. તેણે દાવો કર્યો હતો કે લગ્ન પછી તરત જ, પતિએ તેને અકુદરતી સેક્સ માટે દબાણ કરવાનું શરૂ કર્યું હતું અને ના પાડવા પર તે ઘણીવાર તેના પર હુમલો કરતો હતો. આથી કંટાળીને તે લગ્નનું ઘર છોડી રાયપુરમાં તેના માતા-પિતાના ઘરે ગઈ હતી, જો કે, પતિ તેને સમજાવીને પાછી લઈ આવ્યો હતો, પરંતુ તેના વર્તનમાં કોઈ ફેરફાર થયો ન હતો. તેણે દાવો કર્યો હતો કે પતિ તેને પરપુરુષો સાથે અથવા ગ્રુપ સેક્સ માટે પણ દબાણ કરતો હતો. આખરે તેણે 4 જાન્યુઆરી, 2016ના રોજ પોતાનું ઘર છોડી દીધું હતું અને ત્યારથી તે અલગ રહે છે. પરંતુ પતિએ તેને તેના ઘરે પાછા ફરવા માટે મનાવવાનું ચાલુ રાખ્યું હતું અને તેના અંતિમ ઇનકાર પર તેણે તેના પરિવાર અને મિત્રોને કેટલાક અશ્લીલ ફોટા અને વીડિયો વાયરલ કર્યા હતા.