હિન્દી સિનેમાની 'ફર્સ્ટ ફેમિલી' તરીકે ઓળખાતી કપૂર પરિવારની દીકરીઓએ ક્યારેય ફિલ્મોમાં પદાર્પણ કર્યું નહોતું, પરંતુ રણધીર કપૂર અને બબીતાની બે દીકરીઓ કરીના કપૂર અને કરિશ્મા કપૂરે પરિવારના વર્ષોથી ચાલતો આ નિયમ તો તોડ્યો સાથે જ બોલિવૂડમાં પોતાની આગવી ઓળખ પણ ઊભી કરવામાં સફળ રહી. કરિશ્મા 90ના દાયકામાં બ્લોકબસ્ટર ફિલ્મો આપી ચૂકી છે, જ્યારે કરીના 20 વર્ષથી ઇન્ડસ્ટ્રીમાં છે, પરંતુ આશ્ચર્યની વાત તો એ છે કે બોલિવૂડની આ બંને બહેનો ક્યારેય રૂપેરી પડદે સાથે દેખાઈ નહીં.
હિન્દી સિનેમાની 'ફર્સ્ટ ફેમિલી' તરીકે ઓળખાય છે કપૂર ફેમિલી
કરિશ્મા અને કરીનાએ તોડ્યો પરિવારનો નિયમ
બંનેએ બોલિવૂડમાં મેળવી આગવી ઓળખ
કરીના અને કરિશ્મા બંને બહેનોએ અનેક ફિલ્મોમાં કામ કર્યું પરંતુ આ બંને બહેનોએ ક્યારેય એક જ ફિલ્મમાં સાથે કામ કર્યું નથી. જોકે, એવા સમાચાર આવ્યા હતા કે, આ બંને બહેનોને ફિલ્મ ઝુબેદાની સ્કિવલ માટે એપ્રોચ કરવામાં આવી છે. જોકે, હજી સુધી આ ફિલ્મ અંગે કોઈ અપડેટ મળી નથી.
કરીના કપૂર હાલમાં જ એક ઈન્ટરવ્યૂ દરમિયાન ખુલાસો કર્યો છે કે, કયા કારણથી આ બંને બહેનો એક ફિલ્મમાં કામ ન કરી શકી. કરીનાએ જણાવ્યું કે, એ તેની બહેન લોલો સાથે કામ કરવા માંગે છે પરંતુ આજ સુધી કોઈ સારી સ્ક્રિપ્ટ અને સ્ટોરી ઓફર જ ન થઈ જે બંને બહેનોને પસંદ આવે.
કરીનાએ આગળ કહ્યું, અમે બંને હમેશાંથી એકસાથે કામ કરવા માંગતા હતા પરંતુ જો કોઈ સારી સ્ક્રિપ્ટ લઈને અમારી પાસે આવતું તો અમે ચોક્કસથી સાથે કામ કરતા. તમને જણાવી દઈએ કે, જ્યાં કરીના સતત ઈન્ડસ્ટ્રીમાં એક્ટિવ છે. ત્યારે કરિશ્મા લાંબા સમયથી ફિલ્મોથી દૂર છે. લાંબા વિરામ બાદ હવે કરિશ્મા તેની પહેલી વેબસીરિઝ મેન્ટલહુડ દ્વારા વાપસી કરી રહી છે.
જ્યારે કરીના ટૂંક સમયમાં ઈરફાન ખાનની ફિલ્મ અંગ્રેજી મીડિયમમાં પોલીસ ઓફિસરની ભૂમિકામાં જોવા મળશે. આ સાથે જ ગયા વર્ષના અંતમાં કરીના, અક્ષય અને કિયારાની ફિલ્મ ગુડ ન્યૂઝે બોક્સ ઓફિસ પર જબરદસ્ત કમાણી કરી હતી.