કોરોના મહામારી હવે બોલિવૂડમાં પગપેસારો કરી રહી છે. બોની કપૂર બાદ હવે જાણીતા ફિલ્મ મેકર કરણ જોહરના ઘરે કોરોના પહોંચ્યો છે અને તેના ઘરના 2 સ્ટાફ મેમ્બર કોરોના પોઝિટિવ આવતા ખળભળાટ મચ્યો છે અને હવે કરણ જોહરનો સમગ્ર પરિવાર અને સ્ટાફ મેમ્બર 14 દિવસ માટે હોમ ક્વોરંટાઈનમાં રહેશે. આ દરમિયાન કરણ જોહરની માતા હીરૂ જોહરનો એક વીડિયો સોશિયલ મીડિયા પર ખૂબ વાયરલ થઈ રહ્યો છે. જેમાં તેઓ સેનિટાઈઝેશન કરાવતા જોવા મળી રહ્યાં છે.
કરણ જોહરની માતાના વીડિયોમાં જોઈ શકાય છે કે, તેઓ સેનિટાઈઝેશનની પ્રોસેસમાં પૂરું યોગદાન આપી રહ્યાં છે. તમને જણાવી દઈએ કે, કરણ જોહરે પોતે તેના ઘરના બે નોકર કોરોના પોઝિટિવ હોવાની જાણકારી ટ્વિટ કરીને આપી હતી અને લખ્યું હતું- મારા ઘરમાં કામ કરનારા 2 સ્ટાફ મેમ્બર કોરોના પોઝિટિવ આવ્યા છે. એ લોકોમાં લક્ષણોની જાણ થતાં જ એ બંને નોકરને અને અમારી બિલ્ડિંગના એક સેક્શનને ક્વોરંટાઈન કરી દેવામાં આવ્યું છે.
કરણ જોહરે તેની પોસ્ટમાં જણાવ્યું કે, સ્ટાફના બાકી મેમ્બર્સ અને મારા પરિવારના તમામ સભ્યોના પણ ટેસ્ટ કરવામાં આવ્યાં છે. કોઈનામાં પણ કોરોનાના લક્ષણ દેખાયા નથી અને અન્ય લોકોની સુરક્ષા માટે બધાં જ 14 દિવસ માટે હોમ ક્વોરંટાઈનમાં રહેશે. અમે બીજા લોકોની સુરક્ષા માટે પ્રતિબદ્ધ છીએ અને આ સ્થિતિમાં સરકાર દ્વારા જણાવેલી તમામ સાવચેતીનું પાલન કરીશું.
તમને જણાવી દઈએ કે, કરણના સ્ટાફ મેમ્બર કોરોના પોઝિટિવ આવતા બંને સંક્રમિત મેમ્બરને ઘરના એક સેક્શનમાં ક્વોરંટાઈન કરી દેવાયા હતા અને આ વાતની જાણકારી બીએમસીને આપી હતી. આ પહેલાં બોની કપૂરના ઘરમાં એક સ્ટાફ મેમ્બર કોરોના પોઝિટિવ આવ્યો હતો. ત્યારબાદ તેમના પરિવારના લોકોએ ટેસ્ટ કરાવ્યો હતો, જોકે, બધાંનો રિપોર્ટ નેગેટિવ આવ્યો હતો અને નોકરને સારવાર અર્થે મોકલવામાં આવ્યો હતો.