દિલ્હીના શાહિન બાગમાં ફાયરિંગ કરનાર કપિલ ગૂર્જરના પિતા અને ભાઇએ આમ આદમી પાર્ટી (AAP) ના સભ્ય હોવાને લઇને ઇન્કાર કર્યો છે. કપિલ ગૂર્જરના પિતા અને ભાઇએ જણાવ્યું છે કે અમે આમ આદમી પાર્ટી સાથે જોડાયેલા નથી.
દિલ્હી પોલીસના દાવાને નામંજૂર કર્યો
પિતાએ કહ્યું - અમે AAP માં નથી જોડાયાં
પોલીસ દ્વારા મીડિયામાં જે સમાચાર ટાંકવામાં આવી રહ્યા છે તે ખોટા છે. કોઇ તમારી પાસે આવશે તો તમે તેનું સન્માન કરશો. એવું જ અમારી સાથે થયું હતું. આમ આદમી પાર્ટીના નેતા આવ્યા અને અમે તેમનું સન્માન કર્યું, પરંતુ અમે આમ આદમી પાર્ટીમાં જોડાયાં નહોતા.
ખરેખર તો દિલ્હી પોલીસે દાવો કર્યો હતો કે શાહીન બાગમાં ફાયરિંગ કરનાર શખ્સ કપિલ ગૂર્જર આમ આદમી પાર્ટી સાથે જોડાયેલ છે. કપિલના પિતા ગજે સિંહ પણ આમ આદમી પાર્ટી સાથે જોડાયેલ છે. પોલીસનો દાવો હતો કે કપિલે જણાવ્યું છે કે તેણે અને તેના પિતાએ 2019ના પ્રારંભમાં આમ આદમી પાર્ટીની સભ્યતા પ્રાપ્ત કરી હતી. પરંતુ પોલીસના આ દાવાને કપિલના પિતા અને ભાઇએ ફગાવી દીધો છે.
કપિલના કાકાએ ફતેસિંહે કહ્યું કે મને ખબર નથી કે આ ફોટો ક્યાંથી આવી રહ્યો છે. મારા ભત્રીજા કપિલનો કોઇ પણ રાજકીય પક્ષ સાથે કોઇ સંબંધ નથી અને ન કોઇ પરિવારનો સભ્ય કોઇ પાર્ટી સાથે જોડાયેલો છે. મારા ભાઇ ગજે સિંહ (કપિલના પિતા) 2008માં બહુજન સમાજ પાર્ટીની ટીકીટ પર નગર નિગમની ચૂંટણી લડ્યાં હતા જ્યાં તેઓ હારી ગયા.