મોરબીમાં કાંતિ અમૃતિયાનની જીત થઈ છે. આ બેઠક પર કાંતિ અમૃતિયા, કોંગ્રેસના જયંતિ પટેલ અને આપના પંકજ રાણસરીયા વચ્ચે રાજકીય જંગ હતી
મોરબીમાં ભાજપના કાંતિ અમૃતિયાનની જીત
કાંતિ અમૃતિયા, જયંતિ પટેલ, પંકજ રાણસરીયા વચ્ચે હતી જંગ
જાણો, કાંતિ અમૃતિયાનો રાજકીય ઇતિહાસ
મોરબીમાં કાંતિ અમૃતિયાનની જીત થઈ છે. આ બેઠક પર કાંતિ અમૃતિયા, કોંગ્રેસના જયંતિ પટેલ અને આપના પંકજ રાણસરીયા વચ્ચે રાજકીય જંગ હતી. તમને જણીવી દઈએ કે, મોરબીમાં ત્રણેય બેઠક ભાજપે કબજે કરી લીધી છે. અહીં ભાજપનો માસ્ટર પ્લાન કામ કરી ગયો છે આ બેઠક પર બ્રિજેશ મેરજાની ટિકિટ કાપી અમૃતિયાને ટિકિટ આપી હતી.મોરબી વિધાનસભાની ચૂંટણીમાં ત્રિપાંખિયો જંગ જામ્યો હતો. ભાજપે વર્તમાન ધારાસભ્ય બ્રિજેશ મેરજાનું પત્તુ કાપીને કાંતિ અમૃતિયાને ટિકિટ આપી હતી. તો કોંગ્રેસે મોરબી વિધાનસભા સીટ ઉપર જયંતિ પટેલ પર પસંદગીનો કળશ ઢોળ્યો હતો. અહી નોંધનીય બાબત એ છે કે, કોંગ્રેસના ઉમેદવાર જયંતિ પટેલ છેલ્લા ત્રણ દાયકામાં યોજાયેલી વિધાનસભાની ચૂંટણીમાં પાંચ વખત આ બેઠક હારી ચૂક્યા છે. આમ છતાં આ વર્ષે કોંગ્રેસે મોરબી બેઠક પર તેમણે ટિકિટ આપી હતી. તો આમ આદમી પાર્ટીએ પંકજ રાણસરીયાને ઉમેદવાર બનાવ્યા હતા.
લોકોને બચાવવા કૂદ્યા હતા નદીમાં કાંતિ અમૃતિયા
મોરબીમાં મોડી સાંજે ઝૂલતો પુલ તૂટવાની દુર્ઘટનાને કારણે રાજ્યભરમાં શોકનો માહોલ વ્યાપી ગયો હતો. આ દુર્ઘટનામાં 400થી વધુ લોકો મચ્છુ નદીમાં ખાબક્યા હતા. ત્યારે પોતાના જીવની પરવાહ કર્યા વિના મોરબીના પૂર્વ ધારાસભ્ય કાંતિ અમૃતિયા બચાવ કામગીરીમાં લાગી ગયા હતા. તેઓ પોતે લોકોને બચાવવા માટે મચ્છુ નદીમાં ઉતર્યા હતા. જેના વીડિયો પણ સામે આવ્યા હતા.
કોણ છે કાંતિ અમૃતિયા?
પૂર્વ ધારાસભ્ય કાંતિલાલ શિવલાલ અમૃતિયાનો જન્મ 8 માર્ચ 1962ના રોજ મોરબી જિલ્લાના જેતપરમાં પટેલ સમુદાયના પરિવારમાં થયો હતો. મોરબીમાં પૂર દરમિયાન 1970ના દાયકામાં એક નાના છોકરા તરીકે પણ તેમણે પીડિતોના પુનર્વસન માટે સેવા આપી હતી. તેમણે મોરબીની વીસી ટેકનિકલ હાઈસ્કૂલમાંથી શાળાનો અભ્યાસ પૂર્ણ કર્યો હતો. એક યુવાન તરીકે તેઓ અખિલ ભારતીય વિદ્યાર્થી પરિષદ, એક વિદ્યાર્થી સંગઠનમાં જોડાયા અને નવનિર્માણ ચળવળમાં સામેલ થયા હતા. સંસ્થામાં પૂર્ણ-સમયના સભ્ય તરીકે કામ કર્યા પછી, તેઓ ભારતીય જનતા પાર્ટીમાં જોડાયા હતા.
કાંતિ અમૃતિયાનો રાજકીય ઇતિહાસ
મહત્વનુ છે કે, કાંતિ અમૃતિયાએ તેમના સામાજિક જીવનના પ્રારંભિક વર્ષો દરમિયાન આરએસએસમાં સ્વયંસેવક હતા. તેમણે સ્થાનિક સ્તરે પક્ષના કાર્યકરોને ઉત્સાહિત કરવાનું પડકારજનક કાર્ય હાથ ધર્યું હતું. પ્રારંભિક સમયગાળામાં તેમણે મોરબીની નગરપાલિકા અને તાલુકા પંચાયતના સભ્ય તરીકે શરૂઆત કરી હતી.
મોરબીમાં પાંચ વખત પ્રતિનિધિત્વ કર્યું
કાંતિભાઈ પ્રથમ વખત 1995માં ધારાસભ્ય તરીકે ચૂંટાયા હતા. ત્યારથી 2013 સુધી તેઓ ધારાસભ્ય તરીકે મોરબીના મતવિસ્તારમાં સેવા આપી હતી. ડિસેમ્બર 2012માં ગુજરાત રાજ્યની ચૂંટણીમાં કાનાભાઈ 5મી વખત ચૂંટાયા હતા. તેમણે મોરબી મત વિસ્તારનું પાંચ વખત પ્રતિનિધિત્વ કર્યું હતું. મોરબી અને આસપાસના લોકો તેમને કાનાભાઈના નામથી જાણીતા છે. તેમણે ખેતી અને ઉદ્યોગ ક્ષેત્રે કામ કર્યું છે. મહત્વનું છે કે, 30 ઓગસ્ટ 2015ના રોજ મોરબી સિરામિક ફેડરેશનના મુખ્યમથકને પાટીદાર ટોળા દ્વારા આગ લગાવ્યાના 5 દિવસ બાદ કાંતિ અમૃતિયાએ તેમના નેતા તરીકે રાજીનામું આપ્યું હતું. અમદાવાદમાં પાટીદાર અનામત આંદોલન સમિતિના નેતા હાર્દિક પટેલની ધરપકડ બાદ ફાટી નીકળેલી હિંસા દરમિયાન તેમની ઓફિસને સળગાવી દેવામાં આવી હતી.
પ્રકાશ રવેશિયા હત્યા કેસમાં કોર્ટે નિર્દોષ જાહેર કર્યા
આ સાથે પ્રકાશ રવેશિયા ચકચારી મર્ડર કેસમાં કાંતિ અમૃતિયાને નિર્દોષ જાહેર કર્યા હતા. મોરબી શહેરમાં તારીખ 16 સપ્ટેમ્બર 1999ના રોજ ચાર વ્યક્તિએ પ્રકાશ રવેશિયાની તીક્ષ્ણ હથિયારના ઘા મારી હત્યા કરી નાખી હતી. આ હત્યાનો કેસ ગોંડલની કોર્ટમાં ચાલતો હતો અને 10 નજરે જોનાર સાક્ષી અને 170 બીજા સાક્ષીઓ કોર્ટમાં ફરી ગયા હતા. ત્યારબાદ વર્ષ 2004માં કાંતિ અમૃતિયા સહિત સાત લોકોને ગોંડલ કોર્ટે આજીવન કેદની સજા ફટકારી હતી. ત્યારબાદ કાંતિ અમૃતિયાએ હાઈકોર્ટમાં અપીલ કરી હતી અને 26 ઓક્ટોબર 2007ના રોજ હાઈકોર્ટે કાંતિ અમૃતિયાને નિર્દોષ જાહેર કર્યા હતા.