Holi 2023 / ભગવાન શ્રીકૃષ્ણ અને રુક્મિણીજીના લગ્નની કંકોત્રી લખાઈ: જાણો ક્યારે ઉજવાશે લગ્નોત્સવ, માધવપુરમાં ભરાશે મેળો

• પોરબંદરના માધવપુરમાં કૃષ્ણ અને રૂકમણીજીના લગ્નઉત્સવની ઉજવણી
• ધૂળેટીના દિવસે મોરપીંછથી લગ્ર કંકોત્રી લખવામાં આવી
• રામનવમીથી 5 દિવસ સુધી લગ્નઉત્સવ ઉજવાશે

આજે સમગ્ર રાજ્યમાં ધૂળેટીની ધામધૂમથી ઉજવણી કરવામાં આવી રહી છે. આ દરમિયાન પોરબંદરના માધવપુર ગામે ભગવાન શ્રી કૃષ્ણ અને રૂકમણીજીના લગ્ન ઉત્સવની તૈયારી આજથી એટલે કે ધૂળેટીના દિવસથી શરૂઆત થઈ છે. વાત જાણે એમ છે કે, દર વર્ષે ચૈત્રમાસમાં ભગવાન શ્રી કૃષ્ણ અને રૂકમણીજી ના લગ્ન ઉત્સવની ઉજવણી કરવામાં આવે છે. જેને લઈ આજે ધુળેટીના પાવન દિવસે ભગવાન શ્રી કૃષ્ણ અને રૂકમણીજીની મોરપીંછથી લગ્ન કંકોત્રી લખાવામાં આવી હતી. ત્યારબાદ રામનવમી થી 5 દિવસ સુધી ભગવાનનો લગ્નઉત્સવ ઉજવાશે.

પોરબંદર નજીકના આવેલ માધવપુર ગામમાં ધૂળેટીના દિવસે ભગવાન શ્રી કૃષ્ણ અને રૂકમણીજીના લગ્ન ઉત્સવની લગ્ન કંકોત્રી લખવામાં આવી છે.  દર વર્ષે ચૈત્ર માસ દરમિયાન પોરબંદરના નજકના માધવપુર ખાતે ભગવાન શ્રીકૃષ્ણ અને રૂક્ષ્મણીજીના લગ્નઉત્સવનું ભવ્ય આયોજન કરવામાં આવે છે. ધુળેટીના દિવસે આ લગ્ન વિધિની શરૂઆત થાય છે. ધુળેટીના પવન દિવસે મોરપીંછથી ભગવાન શ્રીકૃષ્ણ અને રૂકમણીજીના લગ્ન કંકોત્રી લખાવામાં આવી હતી. 

મોરપીંછથી લખાઇ લગ્નની કંકોત્રી 
માધવપુરમાં આવેલ ભગવાન શ્રીકૃષ્ણના નિજ મંદિરે  પરંપરા મુજબ મોરપીંછથી ભગવાન શ્રીકૃષ્ણની લગ્નની કંકોત્રી લખાઇ હતી. માધવપુરમાં વર્ષોથી ભગવાન શ્રીકૃષ્ણ અને રૂક્ષ્મણી જીનાં વિવાહ ઉત્સવની ઉજવણી ચૈત્રમાસમાં કરવામાં આવે છે. રામનવમીનાં દિવસથી ભગવાન શ્રીકૃષ્ણનાં લગ્નોત્સવનો પ્રારંભ થાય છે. ત્રણ દિવસ સુધી માધવરાય મંદિરેથી ભગવાનની વરણાંગી નિકળે છે. 

પોલીસ દ્વારા ગાર્ડ ઓફ ઓર્નર
બારસનાં દિવસે ભગવાનનાં લગ્નોત્સવની ઉજવણી કરવામાં આવે છે. કડછ ગામનાં લોકો મામેરૂ લઇ અને માધવરાયના મંદિરે પહોંચે છે અને સાંજે નીજ મંદિરેથી ઠાકોરજીની જાન નિકળે છે. ઠાકોરજીનું સ્વરૂપે જયારે માધવરાય નીજ મંદિરેથી બહાર નિકળે છે ત્યારે પોલીસ દ્વારા ગાર્ડ ઓફ ઓર્નર આપવામાં આવે છે.

બહેનોએ કંકોત્રીના ગીતો ગાયા
ધૂળેટીના દિવસે લખવામાં આવેલ લગ્નમાં બહેનોએ કંકોત્રીના ગીતો ગાયા હતા. ત્યારબાદ શ્રીકૃષ્ણ પ્રભુ નીજ મંદિરે પધાર્યા હતા. ભગવાનના લગ્ન ઉત્સવને લઈને ભક્તજનો અને માધવપૂર્વસીઓમાં અનેરો ઉત્સાહ અને આનંદ જોવા મળી રહ્યો છે. 

સૌરાષ્ટ્રના સાગરકાંઠે આવેલું માધવપુર નામક ગામ અનેરું ધાર્મિક અને ઐતિહાસિક મહત્વ ધરાવે છે. રાજ્યમાં ત્રણ મેળાઓનું અનેરું મહત્વ છે. તરણેતરનો મેળો, મહાશિવરાત્રીનો મેળો અને ભગવાનના વિવાહ પ્રસંગે રાાષ્ટ્રીય કક્ષાનો મેળો માધવપુરનો. પ્રવાસન ક્ષેત્રે માધવપુરને વેગ આપવા માટે વર્ષ 2018થી ભગવાન શ્રીકૃષ્ણ અને રૂક્ષ્મણીજીનાં વિવાહ ઉત્સવ પ્રસંગે યોજાતા મેળાને રાષ્ટ્રીય કક્ષાએ લઇ જવામાં આવ્યો છે. વર્ષોથી માધવપુર ગ્રામ પંચાયત દ્વારા મેળાનું આયોજન કરવામાં આવતું હતું. પરંતુ છેલ્લા કેટલાક વર્ષોથી મેળાનું આયોજન રાજય અને કેન્દ્રનાં પ્રવાસન વિભાગ દ્વારા કરવામાં આવી રહ્યું છે. જેમાં દર વર્ષે અલગ અલગ રાજયોના સાંસ્કૃતિક કાર્યકમો યોજાય છે. જોકે આ વર્ષે હજુ મેળાને લઇને તંત્ર કોઇ જાહેરાત કરવામાં અવી નથી. આગામી દિવસો રાાષ્ટ્રીય કક્ષાના મેળાની જાહેરાત થઇ શકે છે.