ધૂમાડો / કાંકરિયા કાર્નિવલમાં ફરીથી કરોડોનો ધૂમાડો, 7 દિવસનું લાઈટબિલ, વ્યવસ્થાના ખર્ચાનો બોજો કેટલો?

• કાંકરિયા કાર્નિવલનું લાઈટબિલ કોણ ભોગવે છે
• આતશબાજી અને લેસર શો પણ પ્રજાના પૈસે
• દિવાળી જેવો માહોલ નાતાલમાં કોને બતાવવા?

દર વર્ષની જેમ આ વર્ષે પણ નાતાલના દિવસથી એટલે કે 25મી ડિસેમ્બરથી 31મી ડિસેમ્બર સુધી કાંકરિયા કાર્નિવલ યોજાવાનો છે. ત્યારે એવી ચર્ચાએ જોર પકડ્યુ છે કે, જુદા જૂદા સ્ટેજ, લાઈટીંગ, ડેકોરેશન, આતશબાજી પાછળ જે કરોડોનો ધૂમાડો કરવામાં આવે છે તે કોના પૈસા છે? પ્રજા પાસેથી વસૂલાતા કરવેરાનો આમ ધૂમાડો કેટલો યોગ્ય છે?

7 દિવસ ચાલશે કાર્નિવલ

ડિસેમ્બર મહિનો આવતા જ શહેરમાં આવેલા કાંકરિયા વિસ્તારની રોનક જ બદલાઇ જાય છે. કાંકરિયા ખાતે છેલ્લા ઘણા વર્ષોથી કાંકરિયા કાર્નિવલનું આયોજન કરવામાં આવે છે. અમદાવાદ મ્યુનિસિપલ કોર્પોરેશન દ્વારા કાંકરિયા કાર્નિવલની તૈયારીઓ શરૂ કરી દેવામાં આવી છે. 25 ડિસેમ્બરથી 31 ડિસેમ્બર સુધી એટલે કે 7 દિવસ સુધી કાંકરિયા અલગ-અલગ સ્ટેજ ખાતે વિવિધ કાર્યક્રમો યોજાશે.

વિવધ કાર્યક્રમો ભજવાશે

કાંકરિયા કાર્નિવલમાં લેસર શો, હોર્સ શો, ડોગ શો, ડ્રામા પરફોર્મન્સ, હાસ્ય દરબાર, ડિઝની કેરેકટર્સ, લોક નૃત્યો, સાંસ્કૃતિક કાર્યક્રમો, તબલા પરફોર્મન્સ, માઉથ ઓર્ગન્સ પરફોર્મન્સ, યોગા, પપેટ શો અને લોક ભવાઈ જેવા મુખ્ય આકર્ષણો હશે. 

જાણીતા ગાયકો જમાવશે રંગ

ગીતા રબારી, કીર્તિદાન ગઢવી, ઓશમાન મીર જેવા ગાયકો અને સાંઈરામ દવે જેવા કલાકારો લોકોનું મનોરંજન કરશે. આ સાથે શહેરના 900 કરોડના વિકાસ કામોનું ખાતમુહૂર્ત અને લોકાર્પણ પણ કરવામાં આવશે.