બોલિવૂડની બેબી ડોલ ફેમ સિંગર કનિકા કપૂર કોરોના વાયરસની શિકાર થઈ ગઈ છે. હાલ કનિકાને લખનઉના એક હોસ્ટિપટમાં એડમિટ કરાઈ છે. ઉલ્લેખનીય છે કે, કનિકા કપૂર લંડનની પરત આવી ત્યારે તેણે કોરોના ટેસ્ટ કરાવ્યો નહોતો. આ દરમિયાન તેણે પાર્ટીમાં પણ હાજરી આપી હતી. જે બાદ આ સિંગર કોરોના પોઝિટિવ હોવાની જાણકારી મળી હતી. જોકે, કોરોના પોઝિટિવ હોવાની વાત છુપાવવા માટે કનિકાને ખૂબ જ ટ્રોલ કરવામાં આવી રહી છે. ત્યારે સ્વાસથ્ય અધિકારીઓએ જણાવ્યું કે, કનિકાના સંપર્કમાં 162 લોકો આવ્યા હતા.
રિપોર્ટ મુજબ, 120થી 130 લોકોની ઓળખ થઈ ગઈ છે અને તેમના સેમ્પલ પણ લઈ લેવામાં આવ્યા છે. કનિકા જે પાર્ટીમાં ગઈ હતી તેમાં 162 લોકોમાં 35 કાનપુરના હતા. ત્યારે સ્વાસ્થ્ય અધિકારી આ તમામ લોકોની ઓળખ કરવામાં લાગી ગયા છે. અત્યાર સુધી 63 લોકોના સેમ્પલની તપાસ થઈ ચૂકી છે અને આ બધાં નેગેટિવ છે. રિપોર્ટમાં એવું પણ જણાવવામાં આવ્યું છે કે, કનિકા એ જ હોટલમાં રોકાઈ હતી, જ્યાં ભારતીય ક્રિકેટ ટીમની સાથે વનડે સીરિઝ રમવા આવેલી દક્ષિણ આફ્રિકાની ક્રિકેટ ટીમ રોકાઈ હતી. જોકે, બીસીસીઆઈએ હજી સુધી આ વાતની પુષ્ટિ કરી નથી.
તમને જણાવી દઈએ કે કનિકા કપૂર પર કોરોનાને લઈને બેદરકારી દેખાડવા બદલ યૂપીમાં ત્રણ એફઆઈઆર નોંધાવવામાં આવી છે. કનિકા કપૂરનો જન્મ ભારતમાં થયો હતો પરંતુ હવે તે ઈંગ્લેન્ડની રહેવાસી છે. 1997માં કનિકા જ્યારે 18 વર્ષની હતી ત્યારે એક એનઆરઆઈ બિઝનેસમેન રાજ ચંડોક સાથે તેના લગ્ન થય હતા અને તેના ત્રણ બાળકો પણ છે પરંતુ 2012માં તેણે ડિવોર્સ લઈ લીધા.