બોલિવુડ મસાલા / બાફેલા ઈંડા જેવા લાગે છે સ્ટારકિડ્સ : કંગનાએ બોલિવુડ પર સાધ્યું નિશાન, સાઉથ સ્ટાર્સનાં કર્યા ભરપેટ વખાણ

• સ્ટારકિડ્સ બાફેલા ઈંડા જેવા દેખાય છે - કંગના રનૌત 
• સાઉથનાં એક્ટર્સ દર્શકો સાથે જોડાયેલા છે - કંગના રનૌત 
• 20 મેનાં રોજ કંગનાની ફિલ્મ ધાકડ રિલીઝ થશે 

બોલિવુડ પર કંગનાએ સાધ્યો નિશાનો 

બોલિવુડ એક્ટ્રેસ કંગના રનૌત એક એવી એક્ટ્રેસ છે, જે કોઈપણ હીરો વગર જ 100 કરોડની ફિલ્મો આપે છે. કંગનાને તેની શાનદાર એક્ટિંગ માટે ચાર વાર નેશનલ એવોર્ડ મળી ચુક્યો છે. એટલું જ નહીં, કોઈપણ મુદ્દા પર પોતાનો મત આપવામાં પણ તે પાછળ રહેતી નથી. કંગના મોટા મોટા બેનર સાથે લડી ચુકી છે અને તે તો હાલની શિવસેના સરકાર સામે પણ લડી ચુકી છે. 

બીએમસીએ કંગનાની ઓફિસ પર બુલડોઝર ચલાવ્યું તો તેણે આગળ આવીને સરકાર સામે અવાજ ઉઠાવ્યો. જયારે માયાનગરીમાં નેપોટિઝમને લઈને તે ઘણી વાર ઈંડસ્ટ્રી સામે પણ અવાજ ઉઠાવી ચુકી છે. નેપોટિઝમને લઈને ઘણીવાર કંગના પોતાના વિચારો વ્યક્ત કરી ચુકી છે. હવે એક વાર ફરી કંગનાએ સ્ટાર કિડ્સ પર નિશાનો સાધ્યો છે અને સૌને હેરાન કરી દે એવા શબ્દો પણ કહ્યા છે. 

સ્ટારકિડ્સ બાફેલા ઈંડા જેવા દેખાય છે - કંગના રનૌત 

એક ઇન્ટરવ્યૂમાં કંગનાને જ્યારે પૂછવામાં આવ્યું કે સાઉથ સિનેમાને બોલિવુડની સરખામણીએ વધારે સફળતા કેમ મળે છે, ત્યારે કંગનાએ કહ્યું કે જે પ્રકારે તેમનો પોતાના દર્શકો સાથે લગાવ છે, તે ખૂબ જ મજબૂત છે. અમારી સાથે શું થાય છે કે બાળકો ભણતર પૂરું કર્યા બાદ વિદેશ ચાલ્યા જાય છે. તેઓ અંગ્રેજીમાં વાત કરે છે, માત્ર હોલીવુડની ફિલ્મો જુએ છે. તેઓ માત્ર ચાકુ અને કાંટાથી ખાય છે અને અલગ પ્રકારે વાત કરે છે. તો દર્શકો કઈ રીતે જોડાશે? દેખાવમાં પણ અજીબ લાગે છે બાફેલા ઈંડા જેવા. તેમનો આખો લુક બદલાઈ ગયો છે, એટલા માટે લોકો રીલેટ નથી કરી શકતા. મારો ઈરાદો કોઈને પણ ટ્રોલ કરવાનો નથી. 

સાઉથનાં એક્ટર્સ દર્શકો સાથે જોડાયેલા છે - કંગના રનૌત 

આટલું જ નહીં, કંગનાએ સાઉથ એક્ટર અલ્લૂ અર્જુનનું ઉદાહરણ આપતા કહ્યું કે જુઓ પુષ્પા કેવો દેખાય છે, જેવો આપણે ઓળખીએ છીએ, દરેક મજુર તેની સાથે જોડાઈ શકે છે. આજના સમયમાં આપણો હીરો મજુરની જેમ દેખાઈ શકે છે. તો તેમની સંસ્કૃતિ અને તેમનું જમીની સ્તર તેમને મુલ્ય ચુકવે છે. મને આશા છે કે તેઓ બોલિવુડમાંથી પ્રેરણા લેવાનું શરુ નહીં કરે. પોતાના દેશનાં લોકો સાથે જોડાયેલા રહેવું જરૂરી છે. 

​​​​​​​

20 મેનાં રોજ કંગનાની ફિલ્મ ધાકડ રિલીઝ થશે 

વર્ક ફ્રંટની વાત કરીએ તો કંગના આજકાલ પોતાની જાસૂસી એક્શન થ્રિલર - 'ધાકડ'નાં પ્રમોશનમાં વ્યસ્ત છે. જનીશ ઘઈ દ્વારા નિર્દેશિત આ ફિલ્મમાં અર્જુન રામપાલ, દિવ્યા દત્તા જેવા સ્ટાર્સ પણ જોવા મળશે. આ ફિલ્મ 20 મેનાં રોજ સિનેમાઘરોમાં રિલીઝ થશે.