કંગના રનૌતની ફિલ્મ 'ફેશન'ને 12 વર્ષ પૂરા થઈ ચૂક્યા છે. કંગના ભલે આ ફિલ્મમાં મેન લીડમાં નહોતી પરંતુ આજે પણ તેની એક્ટિંગને યાદ કરવામાં આવે છે. મધુર ભંડારકર સમાજની કડવી સત્યતાને પડદા પર લાવવા માટે જાણીતા છે. આ ફિલ્મમાં તેમણે પ્રિયંકા ચોપડા અને કંગના દ્વારા મોડલ બનેલી છોકરીઓના આ ઈન્ડસ્ટ્રીમાં આવતા ઉતાર-ચઢાવ દર્શાવ્યા છે.
ફિલ્મના 12 વર્ષ પૂરા થયા ત્યારે ETimesએ કંગના સાથે વાત કરી. તેણે પોતાના પાત્ર અને પ્રિયંકા ચોપડા સાથે કામના અનુભવો શેર કર્યા. કંગનાએ કહ્યું કે 'ક્વીન', 'મણિકર્ણિકા' અને 'તનુ વેડ્સ મનુ' કર્યા પછી પણ લોકો આજે પણ 'ફેશન' વિશે તેની સાથે વાત કરે છે.
કંગનાએ કહ્યું કે 'ગેંગસ્ટર', 'મેટ્રો' અને 'વો લમ્હે' કર્યા પછી, તે વધુ ફીમેલ સેન્ટ્રિક ફિલ્મો કરવા માંગતી હતી. તેણે કહ્યું, 'ફેશન'માં મારો એક નાનો અને સપોર્ટિંગ રોલ હતો. મને આ ફિલ્મ માટે એવોર્ડ મળવાની અપેક્ષા નહોતી કારણ કે આ પહેલાં પણ હું ફિલ્મોમાં ઘણાં સ્ટ્રોન્ગ પર્ફોમન્સ આપી ચૂકી હતી.
પ્રિયંકા એક મોટી સ્ટાર હતી
પ્રિયંકા ચોપડા સાથે કામ કરવાના અનુભવ શેક કરતાં કંગનાએ કહ્યું કે, પ્રિયંકા લાજવાબ છે. જ્યારે હું 19 વર્ષની હતી ત્યારે પણ તે મોટી સ્ટાર હતી. હું તેને સ્ટાર તરીકે જોતી હતી કારણ કે હું સ્કૂલ ટાઈમથી તેની મૂવીઝ જોતી હતી. તે ખૂબ જ કૂલ હતી. તેણે મારી સાથે બાળક કે જુનિયરની જેમ ટ્રીટ નહોતું કર્યું. મને તે એક મિત્ર જેવી લાગી, જે મારી સાથે ભોજન શેર કરતી હતી અને મને પૂછતી હતી કે હું કેવી દેખાઈ રહી છું? આ બરાબર છે? આ ડ્રેસ કેવો દેખાય છે? જેથી મને લાગ્યું જ નહીં કે તે મારી સીનિયર છે અને આટલી મોટી સ્ટાર છે.