વડોદરાના કરજણ તાલુકામાં આવેલા કંડારી ગામનું દર્દ નેતા, મંત્રી નહીં સમજી શકે, ગરીબોની વ્હારે કોણ આવશે?
સપનાં ધોવાયાં, આંસુ કોણ લૂછશે?
મેઘાનો કહેર, દર્દ કોણ સમજશે?
જિંદગી ભરની કમાણી ગઈ પાણીમાં
આજે વાત કરીશું એવા પરિવારોની. જેમણે મોતને નજીકથી જોયું છે. એ પરિવારો જેમણે કુદરતના કહેરનો સામનો કર્યો. આખી જિંદગીની કમાણી ધૂળ ધાણી થઈ ગઈ. એ પરિવાર જેમણી આંખોમાંથી આજે આંસૂ સરી રહ્યા છે. એ પરિવાર જે લાચાર છે. ન તો કોઈને કહી શકે છે. ન તો તેમની વ્યથા કોઈ સમજી શકે છે. પણ VTVએ આ પરિવારની વ્યથાને વાચા આપી છે.
આલિશાન બંગ્લામાં રહેતા નેતાઓ, ધારાસભ્ય, મંત્રીને આ દુઃખ નહીં સમજાય.
આ દર્દ છે એક મહિલાનું. જેને પોતાના ઘરમાં તમામ ચીજવસ્તુઓ વસાવી. તેની સાર સંભાળ રાખી. જે માલ-મિલકત વસાવવામાં આખી જિંદગી ખર્ચાઈ ગઈ. એ બધું એક જ દિવસમાં નકામું થઈ ગયું. આ દર્દ છે વડોદરાના કરજણ તાલુકામાં આવેલા કંડારી ગામની એક મહિલાનું. વડોદરા અને તેના ઉપરવાસમાં ભારે વરસાદ શું થયો. કે ઢાઢર નદી ગાંડીતૂર થઈ ગઈ. બસ પછી તો શું. ઢાઢર નદીના પાણી કંડારી ગામમાં ફરી વળ્યા.
પૂરના પાણીએ જિંદગી પર ફેરવ્યું પાણી
ગામમાં અચાનક ઘુસેલા પાણીથી બચવા માટે લોકો પહેરેલા કપડા સાથે ઘરને તાળુ માર્યું ન માર્યું. ને બધુ જ મુકીને અહીંથી ચાલ્યા ગયા. હવે ઢાઢર નદીના પાણી ઓસરી રહ્યા છે. અને તારાજીના દ્રશ્ય સૌ કોઈને ચોંકાવી રહ્યા છે. આ ગરીબ પરિવાર પાસે ન તો હવે ખાવા માટે કોઈ અનાજ બચ્યું છે. કે ન તો ઘર સંસાર ચલાવવા માટે કોઈ સર સામાન. બાકી રહ્યું છે તો એક માત્ર પરિવારની વેદના.
આ વ્યથાને કોણ સમજશે?
કંડારી ગામમાં આ એક પરિવારની વ્યથા નથી. અહીં 100 જેટલા પરિવાર વસવાટ કરે છે. ઢાઢર નદીના પાણી કોતરોમાં ફરી વળ્યા અને અચાનક ગામમાં પ્રવેશતાં જ કંડારી ગામની આ વસાહતમાં પાણી ઘુસી ગયા. લોકોના આખે આખા ઘર ડૂબમાં ગયા હતા. અને હવે જ્યારે પાણી ઓસર્યા છે તો ઘરની એક પણ ચીજવસ્તુ કામમાં લેવાય તેવી સ્થિતિમાં નથી. પલંગ, ગોદડા, ખાવા-પીવાનો સામાન, અનાજ, મસાલા, કપડા સુધી કંઈ જ બચ્યું નથી. ત્યારે હવે સરકાર સામે પણ રોષ જોવા મળી રહ્યો છે.
નેતાઓને છે માત્ર મતથી મતલબ
નેતાઓને માત્ર વોટથી મતલબ છે. ન કે તમે કેવી રીતે અને કેવી પરિસ્થિતિમાં જીવો છો. વોટ મળ્યો બાદ રાત ગઈ બાત ગઈ જેવી સ્થિતિ દરેક જગ્યાએ જોવા મળતી હોય છે. પૂરના પાણીથી અહીં અનેક પરિવારની જિંદગીભરની મહેનત પર પાણી ફેરવી નાખ્યું છે
ઘરમાં કોઈ જ સામાન નથી બચ્યો
વધુ એક પરિવારની VTVની ટીમે મુલાકાત લીધી. આ પરિવારમાં એક મહિલા જ છે. જે પાણી આવતાં જ જીવ બચાવીને બહાર નિકળ્યા. પણ હવે ઘરમાં કોઈ જ સામાન નથી બચ્યો. ત્યારે હવે હાથે પગે આવી ગયેલા આ પરિવારોની વ્યથા કોણ સાંભળશે. જિંદગીભરની કમાણી એક દિવસમાં ધોવાઈ ગઈ. હવે જીવવું કઈ રીતે અને પેટની ભૂખ કઈ રીતે મિટાવવી એ મોટો પ્રશ્ન છે. ત્યારે આ પરિવારોની વ્યથા કોઈ નેતા સાંભળશે કે નહીં તે જોવું રહ્યું.