પંચમહાલ જીલ્લાના શહેરા ખાતેથી નકલી દૂધ બનાવવાનું કૌભાંડ શહેરા નગરપાલિકાના ફૂડ અને સેફ્ટી વિભાગ દ્વારા ઝડપી પાડવામાં આવ્યું છે. પાલિકાના ફૂડ અને સેફ્ટી વિભાગને મળેલી બાતમીના આધારે રેડ કરવામાં આવતા શહેરાના મુખ્ય બઝારમાં કનૈયા ડેરી ફાર્મ નામની દુકાનના સંચાલક દ્વારા સફેદ દૂધનો કાળો કારોબાર કરવામાં આવતો હોવાનું બહાર આવ્યું છે.
પંચમહાલના શહેરામાં નકલી દૂધ બનાવવાનું કૌભાંડ
કનૈયા ડેરી ફાર્મમાં નકલી દૂધ મળી આવ્યું
યુરિયા ખાતર-તેલના ઉપયોગથી નકલી દૂધ બનતુ હતું
સફેદ મોત... સામાન્ય રીતે દૂધને આપણા સ્વાસ્થ્ય માટે સંપૂર્ણ પોષણ યુક્ત આહાર માનવામાં આવે છે. બાળકોથી માંડીને બુઝુર્ગો સુધી દૂધનો આપણે ખાવા અને પીવા સિવાય અનેક પ્રકારે ઉપયોગ કરીએ છીએ. પરંતુ શું તમે જાણો છો કે, જે દૂધ તમે ઘરે લાવો છો અને પી રહ્યા છો તે હકીકતમાં સફેદ ઝેર છે ? આવો જ ચોંકાવનારો ખુલાસો પંચમહાલ શહેરમાં સામે આવ્યો છે. જ્યાં યૂરિયા ખાતર, સેમ્પૂ અને તેલમાંથી દૂધ બનાવી લોકોને ઝેર પીવડાવાતું હતું.
પંચમહાલ જીલ્લાના શહેરા નગરપાલિકા વિસ્તારમાં છેલ્લા કેટલાક સમયથી નકલી દૂધ ગ્રાહકોને પધરાવવામાં આવતું હોવાની માહિતી નગરપાલિકાના ફૂડ અને સેફટી વિભાગને મળતી હતી. જેને લઈને પાલિકાના ફૂડ અને સેફ્ટી વિભાગ દ્વારા ખાનગી રાહે તપાસ શરૂ કરવામાં આવી હતી. જે દરમિયાન બાતમી મળી હતી કે શહેરાના મુખ્ય બઝારમાં આવેલ કનૈયા ડેરી ફાર્મ નામની દુકાનના સંચાલક દિલીપ પરમાર દ્વારા નકલી દૂધ બનાવી ગ્રાહકોને વેચવામાં આવી રહ્યું છે. તેમજ નકલી દૂધ તે શહેરાની જૂની વિદ્યુત કચેરી પાસેના વિસ્તારમાં રહેણાંક મકાનને ભાડે રાખીને બનાવતો હતો.
યુરિયા ખાતર, કપાસિયા તેલના પાઉચ મળી આવ્યા
બાતમીના આધારે ફૂડ અને સેફ્ટી વિભાગ દ્વારા આજે આ રહેણાંક મકાન પર જ છાપો મારતા ઘરમાંથી નકલી દૂધ બનાવવામાં ઉપયોગમાં લેવામાં આવતા તમામ હાનિકારક પદાર્થો મળી આવ્યા હતા. જ્યારે આ રહેણાંક મકાનમાંથી યુરીયા ખાતરની એક બેગ, રાની કપાસિયા તેલના 10 ઉપરાંત ભરેલા પાઉચ અને 50 ઉપરાંત ખાલી પાઉચ મળી આવ્યા હતા.
ગોધરાના ખોરાક અને ઔષધન નિયમન તંત્રએ તપાસ હાથ ધરી
સંચાલક દિલીપ પરમાર દ્વારા દૂધમાં ફેટ વધારવા તેમજ નકલી દૂધ બનાવવા અને ઓછા ખર્ચે વધુ લાભ મેળવવા માટે ગ્રાહકોના આરોગ્ય સાથે ચેડા કરતો હોવાનું સ્પષ્ટ થયું હતું. ત્યારબાદ પાલિકાના ફૂડ અને સેફટી વિભાગ દ્વારા ગોધરા ખોરાક અને ઔષધન નિયમન તંત્રને જાણ કરવામાં આવી હતી. જેના આધારે ગોધરાના ખોરાક અને ઔષધન નિયમન તંત્ર દ્વારા સ્થળ પર પહોંચીને દૂધ તેમજ તેલના નમુના લઈને પરીક્ષણ માટે મોકલવાની કાર્યવાહી કરવામાં આવી છે.
નરસાણા ગામના મહિલા સરપંચનો પુત્ર કરતો હતો દૂધનો કાળો કારોબાર
શહેરા ખાતેથી ઝડપવામાં આવેલા સફેદ દૂધનો કાળો કારોબાર કરતો દિલીપ મૂળ શહેરા તાલુકાના નરસાણા ગામનો રહેવાસી છે અને તે છેલ્લા 1 વર્ષ ઉપરાંતના સમયથી શહેરા ખાતે ભાડે દુકાન રહીને દૂધ અને તેની બનાવટોનું વેચાણ કરતો હતો. તેમજ દિલીપ પરમાર નરસાણા ગામના મહિલા સરપંચનો પુત્ર હોવાનું પણ જાણવા મળ્યું છે.
સરપંચ પુત્ર દિલીપ સામે કાર્યવાહી થશે?
હાલ તો ખોરાક અને ઔષધન નિયમન તંત્ર દ્વારા દૂધના વિવિધ સેમ્પલ મેળવીને પરીક્ષણ માટે મોકલી આપવાની સાથે સાથે દિલીપ દ્વારા આ દૂધ કોને કોને આપવામાં આવતું હતું ? ગ્રાહકોને આપવામાં આવતું હતું કે પછી અન્ય કોઈ દૂધ મંડળીમાં પણ દૂધ ભરવામાં આવતું હતું તે દિશામાં વધુ તપાસ હાથ ધરી છે. લોકોના આરોગ્ય સાથે ચેડા કરનારના સરપંચ પુત્ર એવા દિલીપ સામે હવે ક્યા અને કેવા પ્રકારની કાર્યવાહી કરવામાં આવે છે કે પછી ભીનું સંકેલી લેવામાં આવશે તે હાલ સૌથી મોટો પ્રશ્ન છે.
ત્યારે કેટલાક સવાલ થાય છે કે શું ખરેખર આ દૂધ પીવા લાયક છે ખરું? નકલી દૂધ બનાવવાનું કૌભાંડ કેટલા સમયથી ચાલે છે? લોકોના આરોગ્ય સાથે ચેડા કરવા તે યોગ્ય છે? નકલી દૂધ કોને કોને આપવામાં આવતું હતું? ગ્રાહકો ઉપરાંત અન્ય કોઈ દૂધ મંડળીમાં દૂધનું વેચાણ થતું હતુ? રાજ્યમાં આ પ્રકારની કેટલી ડેરીઓ ધમધમી રહી છે? નકલી દૂધ પી લોકોના સ્વાસ્થ્યને નુકસાન થશે તો જવાબદાર કોણ? ખુલ્લેઆમ વેચાણ થતું હતું છતાં કેમ કોઇના ધ્યાનમાં ન આવ્યું? લોકોના આરોગ્ય સાથે ચેડા કરનાર શખ્સ સામે કાર્યવાહી થશે?