ગુજરાતના ચૂંટણીજંગમાં કમાની એન્ટ્રીથી રાજકારણ ગરમાયું; પાટણમાં કિરીટ પટેલે ભાજપ પર સાધ્યું નિશાન કહ્યું કે, કમાને CM બનાવો એટલે ગુજરાતનો વિકાસ થઈ જાય"
ગુજરાતના ચૂંટણીજંગમાં પણ કમાની એન્ટ્રી!
પાટણમાં કિરીટ પટેલે ભાજપ પર સાધ્યું નિશાન
"કમાને CM બનાવો એટલે ગુજરાતનો વિકાસ થઈ જાય"
ગુજરાત વિધાનસભાની ચૂંટણીને આંગળીના વેઢે ગણી શકાય એટલા દિવસો જ બાકી રહ્યા છે. તમામ રાજકીય પક્ષો મતદારોને આકર્ષવા માટે અવનવા પેતરા અજમાવી રહ્યા છે. જેમ જેમ ચૂંટણી નજીક આવી રહી છે તેમ તેમ રાજકરણ પણ ગરમાતું જાય છે. આ બધાની વચ્ચે પાટણના કોંગ્રેસના ઉમેદવાર કિરીટ પટેલનું વધુ એક વિવાદિત નિવેદન સામે આવ્યું છે.
કિરીટ પટેલનું વધુ એક વિવાદિત નિવેદન
પાટણના કોંગ્રેસના ઉમેદવાર કિરીટ પટેલનું વધુ એક વિવાદિત નિવેદન સામે આવ્યું છે. તેમણે ભાજપ આકરા પ્રહાર કર્યા હતા. દિવ્યાંગ કમાને લઈ ભાજપ પર નિશાન સાધ્યું છે. તેમણે કહ્યું કે, કમો જો તમને જીતાડી શકતો હોય તો કમાને ટિકિટ આપો તેમણે પ્રહાર કરતા કહ્યું કે, કમાને ગુજરાતનો CM બનાવો એટલે ગુજરાતનો વિકાસ થશે. કિરીટ પટેલે ભાજપ પર પ્રહાર કરતા કહ્યું કે, તમે એટલો વિકાસ કર્યો હોય તો 27 વર્ષ પછી કમા પાસે કેમ પ્રચાર કરાવો છો તેમણે જણાવ્યું કે, કમો તમને જીતાડી શકતો હોય તો તમે ટિકિટ આપો અને તેને સીએમ બનાવી દો એટલે ગુજરાતનો વિકાસ થઈ જશે. તેમણે જણાવ્યું કે, અમારો પણ ભાવ બોલાતો હતો પરંતું અમને ખરીદવાની કોઈની તાકાત નથી અમે વેચાઉ માલ નથી.
કિરીટ પટેલનો ધમકીભર્યો વીડિયો આવ્યો હતો સામે
સબોસણ ગામે ચૂંટણી પ્રચાર દરમિયાન કિરીટ પટેલે ગુજરાત પ્રદેશ ભાજપના પૂર્વ મહામંત્રી કે સી પટેલ પર આકરા પ્રહાર કર્યા હતા. જેનો વીડિયો સોશિયલ મીડિયામાં વાયરલ થયો છે. જેમાં કિરીટ પટેલ કહી રહ્યા છે કે, કે.સી પટેલ તેમનો પેટ્રોલ પંપ ન બચાવી શક્યા તો આપડી ગાયોને કેવી રીતે બચાવશે. એ એમની જાતને દાદા સમજતા હોય તો એમને કહી દેજો કે આ દુનિયામાં બેજ દાદા છે હનુમાન દાદા અને ગણપતિ દાદા. કિરીટ પટેલે કહ્યું કે, 'તમે એવું સમજતા હોય કે અમે આમ કરી લઈશું, તો તમે પાંચમી તારીખ સુધી શાંતિ રાખજો, 8મી તારીખે આપડો વરઘોડો નીકળવાનો છે.
ભાજપના ઉમેદવાર જીતુ વાઘાણીના સમર્થનમાં પ્રચાર કરે છે કમો
ડાયરમાં ડાન્સ કરતો કમો ચૂંટણી ટાણે ઉમેદવારનો પ્રચાર કરી રહ્યો છે. ભાવનગર પશ્ચિમના ભાજપના ઉમેદવાર જીતુ વાઘાણીના સમર્થનમાં કમો પ્રચાર કરતો જોવા મળ્યો હતો. ભાવનગર પશ્ચિમના વિવિધ વિસ્તારમાં કમો ખુલ્લી કારમાં ઉભો રહીને ભાજપના ઝંડા સાથે પ્રચાર કરતો જોવા મળ્યો હતો. કમાને જોવા માટે તેની આસપાસ મોટી સંખ્યામાં ભીડ જામી હતી.બોલીવુડનું એક ગીત છે કે. કુછ રંગ પ્યાર કે ઐસી ભી... ત્યારે હવે કમાની એન્ટ્રી જોઈને કહેવુ પડશે.કે રાજકારણના રંગ કુછ ઐસે ભી... કમો રસિયો રૂપાળો રંગ રેલીયો ઘેર જાવુ ગમતુ નથી.ગીત પર ડાન્સ કરીને ફેમસ થયો અને હવે સ્ટાર પ્રચારક બની ગયો છે. નસીબ ક્યારે કોના સિતારા ચમકાવી દે તે કહેવુ મુશ્કેલ છે પણ હાલ કમાના સિતારા ફુલ જોરથી ચમકી રહ્યા હોય તેવો ઘાટ સર્જાયો છે. જેને લઈ રાજકારણ પણ ગરમાયું છે.