પાલનપુર ખાતે ગોબરીરોડ વિસ્તારમાં ગ્રાહકો પાસેથી રોકડ રોકાણ કરાવનારા કલ્પતરૂ ગ્રુપે ઉઠમણું કરતા ગ્રાહકોના લાખો રૂપિયા ફસાઈ ગયા છે. આ અંગે ગ્રાહકે પાલનપુર પૂર્વ પોલીસ મથકે ફરિયાદ નોંધાવતા પોલીસે ગ્રુપના પાંચ સંચાલકો સામે ગૂનો નોંધી વધુ તપાસ હાથ ધરી છે.
બનાસકાંઠામાં એક પછી એક ક્રેડિટ સોસાયટીઓનું ઉઠમણું થઈ રહ્યું છે. અગાઉ અર્બુદા સહિતની સોસાયટીઓમાં ગ્રાહકોના કરોડો રૂપિયા ફસાયેલા પડ્યા છે. ત્યારે પાલનપુર ખાતે ગોબરીરોડ વિસ્તારમાં ગ્રાહકો પાસેથી રોકડ રોકાણ કરાવનારા કલ્પતરૂ ગ્રુપે ઉઠમણું કરતા ગ્રાહકોના લાખો રૂપિયા ફસાઈ ગયા છે.
આ અંગે પ્રાપ્ત થતી માહિતી મુજબ ગોબરીરોડ પર આવેલ સાઈ કોમ્પ્લેક્સમાં પાંચ શખ્સોએ કલ્પતરૂ ગ્રુપ ઓફ ઇન્ડસ્ટ્રીઝના નામે ઓફિસ ખોલીને ગ્રાહકોને વિવિધ સ્કીમો બતાવી નાણાં રોકવા માટે સમજણ આપી હતી.
જેમાં ગ્રાહકોએ રૂપિયા 64,03,900 લાખનું રોકાણ કર્યું હતું. જોકે, કંપનીના સંચાલકોએ પાકતી મુદ્દતે રૂપિયા 89,39,494 પરત ન આપી છેતરપીંડી આચરી હતી. આ અંગે સાબરકાંઠાના ખેડબ્રહ્મા તાલુકાના પાદરડી ગામે રહેતા અને ફોટોગ્રાફીનો વ્યવસાય કરતા હરેશભાઇ ડાયાભાઈ પ્રજાપતિ દ્વારા પાલનપુર શહેર પૂર્વ પોલીસ મથકે ફરિયાદ નોંધાવામાં આવી છે. જેના આધારે પોલીસે પાંચ શખ્સો સામે ગૂનો નોંધી તેમને ઝડપી લેવાના ચક્રો ગતિમાન કર્યા છે.
કલ્પતરૂ કંપનીના ઉઠમણાંની ફરિયાદ નોધાતા જ ગ્રાહકો માં ચિંતા જોવા મળી રહી છે. જોકે લોકો પણ લાલચમાં આવી આવી કંપનીઓ પર વિશ્વાસ કરતા હોય છે. ત્યારે હવે પોલીસ દ્વારા આં આરોપીઓને ઝડપી પાડી યોગ્ય કાર્યવાહી કરવામાં આવે તેવી માંગ ગ્રાહકોમાં જોવા મળી રહી છે.