અકસ્માત / હીટ એન્ડ રનઃ કલોલમાં અજાણ્યા વાહન ચાલકે ટક્કર મારતા બાઈક ચાલકનું મોત

• કલોલના બોરિસના બ્રિજ પર હિટ એન્ડ રનની ઘટના
• 19 વર્ષીય બાઇક ચાલક યુવકનું અકસ્માતમાં મોત
• અજાણ્યા વાહન ચાલકે બાઇક સવાર યુવકને લીધો અડફેટે 

ગાંધીનગર જિલ્લાના હાઈવે માર્ગો ઉપર અકસ્માતની ઘટનાઓમાં નોંધપાત્ર વધારો જોવા મળી રહયો છે. તેમાં પણ ખાસ કરીને હીટ એન્ડ રનની ઘટનાઓએ માઝા મુકી છે. તેવામાં વધુ એક હિટ એન્ડ રનની ઘટના સામે આવી છે. ગાંધીનગરના કલોલમાં બોરિસ ખાતે આવેલ બ્રિજ પર હીટ એન્ડ રનની ઘટના સામે આવી છે. જેમાં અજાણ્યા વાહન ચાલકે બાઇક સવાર યુવકને અડફેટે લેતા અકસ્માત સર્જાયો હતો. જેમાં યુવાન કાળનો કોળીયો બની જતા ગાંધીનગર પંથકમાં હાહાકાર મચી જવા પામ્યો છે.

કલોલમાં હિટ એન્ડ રનની ઘટના બની
કલોલમાં બોરિસના બ્રિજ પર અકસ્માત સર્જાયો હતો.આ અંગે જાણવા મળતી વિગત અનુસાર યુવાન જીજે. 24 એપી 5972 નંબરનું પોતાનું બાઇક લઇ પસાર થઇ રહ્યો હતો. આ દરમિયાન બેફામ સ્પીડે આવતા અજાણ્યા વાહનના ચાલકે સ્ટિયરિંગ પરનો કાબૂ ગુમાવતાં વાહને બાઇકને ઠોકર મારી હતી. જેને પગલે બાઇકચાલક યુવાન સામેની સાઈડના રોડ પર પછડાયો હતો. આ દરમિયાન ગંભીર ઇજા પહોંચતા યુવાનનું ઘટનાસ્થળે જ કમકમાટીભર્યું મોત નીપજ્યું હતું. આ ઘટનાને લઇને પોલીસ અને એમ્બ્યુલન્સનો સ્ટાફ પણ બનાવ સ્થળે દોડી ગયો હતો અને મૃતદેહનો કબજો સાંભળી આગળની કાર્યવાહી હાથ ધરી હતી. 

ગાંધીનગરના ભાટ એપોલો સર્કલ નજીક પણ વધુ એક અકસ્માત સર્જાયો
આ ઉપરાંત અકસ્માત અંગેની વધુ એક ઘટના ગાંધીનગરના ભાટ એપોલો સર્કલ નજીક બની હતી. જેમાં ટોયોટા કારના ચાલકે અચાનક કાબૂ ગુમાવી દેતા કાર ડિવાઇડર સાથે અથડાયો હતો. જેને પગલે કાર પલટી મારી ગઈ હતી. આ અકસ્માતમાં કાર ચાલક યુવાનનું કમકમાટીભર્યું મોત નીપજ્યું હતું. જેથી અડાલજ પોલીસે અકસ્માતે મોતનો ગુનો નોંધી કાર્યવાહી હાથ ધરી હતી.