મહેસાણા / કડી ભાજપના મોટા નેતાનો જુગારનો અડ્ડો, SOGએ રેડ કરી 18ને દબોચ્યા, દિગ્ગજ નેતાઓ સાથે છે ઉઠક બેઠક

• કડીમાં ભાજપ નેતા કલ્પેશ નાયકનું જુગારધામ ઝડપાયું
• કલ્પેશ નાયકના ઘરે SOGએ રેડ કરી હતી
• 18 જુગારીઓને પોલીસે ઝડપી પાડ્યા

મહેસાણા જિલ્લાના કડીમાં ધમધમતા જુગારધામ પર પોલીસે દરોડો પાડી જુગારીઓના રંગમાં ભંગ પડયો હતો. પોલીસની રેડ દરમિયાન ભાજપ નેતા કલ્પેશ નાયક સંચાલિત જુગારધામ ઝડપાતા શહેરભરમાં ચર્ચાનો વિષય બન્યું છે. ભાજપ નેતા કલ્પેશ નાયકના ઘરે જુગારનો પાટલો મંડાયો હોવાની SOG પોલીસને કાને વાત પડતા પોલીસે દરોડો પડયો હતો. આ દરમિયાન કલ્પેશ નાયકના ઘરે પતા ટીંચતા 18 જુગારીઓ રંગેહાથ પકડાયા હતા. 

મોટા નેતાઓ સાથે કલ્પેશ નાયકના છે સબંધો
જેને પગલે પોલીસે જુગારીઓને દબોચી લીધા હતા. પોલીસે તમામ પતાપ્રેમીઓને ઝડપી લઈ તેની વિરુદ્ધ કાયદેસરની કાર્યવાહી હાથ ધરી હતી. આ ઉપરાંત પોલીસે રોકડ રૂપિયા સહિતનો મુદામાલ પણ કબજે કર્યો હતો. નોંધનિય છે કે ભાજપના મોટા નેતાઓ સાથે કલ્પેશ નાયકને સબંધ હોવાનું પણ સામે આવ્યું છે. વધુમાં ખેલંદાઓને અકર્ષવા દિગ્ગજ નેતાઓ સાથે સંબંધો બતાવવા આમંત્રણ પત્રિકા છપાવી હોવાનું પણ સામે આવ્યું છે. હવન,વાસ્તુ અને ભવાઈ નિમિત્તે છપાવેલી આમંત્રણ પત્રિકા બતાવતા હતા. લોકોને પ્રભાવિત કરવા આમંત્રણ પત્રિકાઓ છપાવી હોવાનું જાણવા મળ્યું છે.
 
18 જુગારીઓ સામે કાર્યવાહી કરતી પોલીસ
ઉલ્લેખનીય છે કે,  ભાજપ નેતા કલ્પેશ નાયક જુગારધામ ચલાવતા હોવાથી અવારનવાર પોલીસની રેડ ન પડે તેવું વિચારી જુગારીઓ આવતા હોય પરંતુ આ અંગે પોલીસને જાણ થતા એસઓજી પોલીસ રેડ પાડી જુગારીઓનો પાવર કાઢી નાખ્યો હતો અને18 જુગારીઓ વિરુદ્ધ કાર્યવાહી હાથ ધરી હતી.