નિવેદન / ISROનું ખાનગીકરણ થશે કે નહીં તે મામલે ઈસરો ચીફ સિવનનું આવ્યું મોટું નિવેદન

ISROના અધ્યક્ષ ડો કે સિવને કહ્યું છે કે ઈસરોનું ખાનગીકરણ નહીં થાય. આ એકદમ સ્પષ્ટ વાત છે જે લોકોના મગજમાં ક્લિયર હોવી જોઈએ. સરકાર ઈસરોનું ખાનગીકરણ કરી રહી છે તે લોકોની ગેરસમજ છે. આવું ક્યારેય નહીં થાય.

ખાનગી કંપનીઓને સાથે લઇને ચાલવાની યોજના છે

ઈસરોએ આયોજિત કરેલા વેબિનાર અનલોકિંગ ઇન્ડિયાઝ પોટેન્શ્યલ ઈન સ્પેસ સેક્ટર (Unlocking India's Potential in Space Sector)માં ઈસરોના ચીફ કે સિવને આ વાત કહી. ખાનગી કંપનીઓને સાથે લઇને ચાલવાની યોજના છે જેથી ઈસરો પોતાની ટેક્નોલોજીનો વિકાસ અને ક્ષમતામાં વિસ્તાર કરી શકે.

અંતરિક્ષ ક્ષેત્રે સુધારા લાવનાર નીતિ ઇસરો અને દેશ માટે ગેમ ચેન્જર સાબિત થશે

ડો.સિવને કહ્યું કે ખાનગી કંપનીઓ આ નવી અંતરિક્ષ નીતિ અંતર્ગત અમારી સાથે સ્પેસ એક્ટિવિટીમાં ભાગ લેશે. પરંતુ મુખ્ય કામ ઇસરો અને તેના વૈજ્ઞાનિકો કરશે. અંતરિક્ષ ક્ષેત્રે સુધારા લાવનાર નીતિ ઇસરો અને દેશ માટે ગેમ ચેન્જર સાબિત થશે.

આ સાથે ભારત સ્પેસ સેક્ટરમાં પોતાનું નવું નામ બનાવશે. સિવને કહ્યું કે આ સમયે ઇસરો સંશોધન અને વિકાસની સાથે રોકેટ અને ઉપગ્રહો બનાવે પણ છે. સરકારે સ્પેસ સેક્ટર ખાનગી કંપનીઓ માટે ખોલવાની જાહેરાત કરી છે. આ પછી અમે સાધનો બનાવવા માટે ખાનગી કંપનીઓની મદદ લઈશું. જેથી વધુને વધુ સેટેલાઈટ્સ છોડી શકાય.

દેશને આત્મનિર્ભર બનાવવા માટે મોટી સંખ્યામાં કોમ્યુનિકેશન સેટેલાઈટ્સની જરૂર

ઈસરોના વડા સિવને કહ્યું કે ખાનગી કંપનીઓ પાસે સ્પેસ સેક્ટરમાં ઘણી તકો છે. દેશને આત્મનિર્ભર બનાવવા માટે મોટી સંખ્યામાં કોમ્યુનિકેશન સેટેલાઈટ્સની જરૂર પડશે. આ માટે ખાનગી કંપનીઓ આગળ આવશે અને ઇસરો સાથે મળીને કામ કરશે. આનો અર્થ એ નથી કે ઇસરોનું ખાનગીકરણ કરવામાં આવી રહ્યું છે.

ઇસરો ચીને કહ્યું કે ટૂંક સમયમાં સંસદમાં 'સ્પેસ એક્ટિવિટી બિલ' રજૂ કરવામાં આવશે. જેના દ્વારા IN-Space બનાવવામાં આવશે. આના માધ્યમથી ખાનગી ક્ષેત્રને ઇસરો સાથે કામ કરવાની તક મળશે.