ઢોરનો આતંક / VIDEO: બાઇક સવારને રખડતા ઢોરે શિંગડા મારીને પાડી દીધા, જુઓ જૂનાગઢની શેરીઓમાં ઢોરે કેવી ધમાલ મચાવી

• રખડતા ઢોરના ત્રાસથી જૂનાગઢના લોકો પરેશાન 
• જૂનાગઢમાં ઢોરે પરિવારને લીધો અડફેટે
• સમગ્ર ઘટનાના સીસીટીવી આવ્યા સામે 

ગુજરાતના મોટા શહેરોમાં વર્ષોથી રખડતા ઢોરની સમસ્યા છે, અનેક દુર્ઘટનાઓ સામે આવી ચૂકી છે. પરંતુ હજુ સુધી તેને લઇને કોઈ ઉકેલ કે સમાધાન થઇ શક્યું નથી. ત્યારે હવે જૂનાગઢમાં રખડતા ઢોરના ત્રાસથી શહેરવાસીઓ પરેશાન થઇ રહ્યા છે. જૂનાગઢમાં રખડતા ઢોરે બાઇક સવાર પરિવારને અડફેટે લીધા હોવાનો વીડિયો સામે આવ્યો છે. બાઇક પર આવી રહેલ પતિ-પત્ની અને બાળકને અડફેટે લીધા હતા.

CCTV ફૂટેજમાં જોવા મળે છે કે, એક ઢોર બાઇક ચાલક પાછળ દોડે છે, બાઇક ચાલક બાઇક ઉભી રાખે છે તો ઢીંક મારીને તે બાઇકસવાર તમામને નીચે પાડી દે છે. તો બાઇક પરથી યુવક ઉતરી જતાં પાછળ દોડી શિંગડા માર્યા છે. તો આવી જ અન્ય એક ઘટનાનો પણ વીડિયો સામે આવ્યો છે. તો આવી ઘટનાઓને લઇને જૂનાગઢ મનપાની કામગીરી સામે ઉભા થયા સવાલ થયા છે.

અત્રે ઉલ્લેખનીય છે કે, અગાઉ જૂનાગઢમાં રખડતા ઢોર મામલે મનપા કમિશનર જાહેરનામું બહાર પાડી ચૂક્યા છે. જેમાં તેમણે જણાવ્યું હતું કે, પશુના કારણે કોઇ અકસ્માત થાય તો પશુપાલકને સજા થશે. કલમ 304 મુજબ ગુનો નોંધી વળતર કે સજા કરવામાં આવશે.

ત્યારે સવાલ થાય છે કે, રખડતા ઢોરના હુમલાથી જીવ જાય તો કોની જવાબદારી? જૂનાગઢના રસ્તાઓ પર રખડતા ઢોર કોર્પોરેશનને નથી દેખાતા? શું જૂનાગઢ મનપા કોઈ જીવલેણ ઘટનાની રાહ જોઈ રહી છે? શહેરના રસ્તાઓ પરથી ઢોર હટાવવાની કામગીરી ક્યારે થશે? શું જૂનાગઢ મનપા માટે શહેરવાસીઓના જીવની કોઈ કિંમત નથી ? શહેરમાં પશુધનને રખડતા છોડી દેનારા સામે કાર્યવાહી ક્યારે? શું કોઇ જીવલેણ કિસ્સાની રાહ જોઇને બેઠું છે જૂનાગઢ મનપાનું તંત્ર? પશુધનને સાચવવાની જવાબદારી કેમ નથી નિભાવતા માલિકો? શહેરમાં ગમે ત્યાં છોડી કેમ દેવામાં આવે રખડતા ઢોર?