જૂનાગઢમાં પોલીસ ટ્રેનિંગ સેન્ટરમાં દિક્ષાંત સમારોહ કાર્યક્રમ યોજાયો હતો. જેમાં મોટી સંખ્યામાં LRD જવાનો ગરબે ઘુમ્યા હતા. આ કાર્યક્રમમાં કોવિડના નિયમોનો ભંગ કરાયો હતો. સોશિયલ ડિસ્ટન્સ પણ જળવાયું ન હતું. આ કાર્યક્રમનો વીડિયો વાયરલ થયો છે. જોકે આ મામલે પોલીસ તાલીમ ADGP વિકાસ સહાય અને ગૃહ રાજ્યમંત્રી પ્રદીપસિંહ જાડેજાએ તપાસના આદેશ આપ્યા છે. તો તમામ કર્મચારીઓને સલાહ આપી છે કે સોશિયલ મીડિયાનાં જમાનામાં લોકોના હાથમાં મોબાઈલ હોય છે. તમારે લોકોએ વિચારીને પણ પોતાની ફરજ નિભાવવી પડશે.
જૂનાગઢમાં દિક્ષાંત સમારોહ કાર્યક્રમ પહેલા LRD જવાનોના ગરબાનો વીડિયો વાયરલ
જૂનાગઢમાં દિક્ષાત સમારોહ પહેલા એક સાંસ્કૃતિક કાર્યક્રમ યોજાયો હતો. જેમાં 7 માસથી ટ્રેનિંગ સેન્ટરમાં જ તાલીમાર્થીઓ હતા. ગુજરાતમાં હવે કોરોના હોય જ નહીં તેમ સરકારે બનાવેલા કોરોના વાયરસના નિયમો નેવે મૂકીને દિક્ષાંત પરેડ પહેલા LRD જવાનો ગરબે ઘૂમ્યા હતા. દિક્ષાંત પરેડ પહેલા LRD જવાનો માસ્ક પહેર્યા વગર અને સોશિયલ ડિસ્ટન્સ ન જાળવીને ગરબે ધૂમ્યા હતા. જૂનાગઢ પોલીસ ટ્રેનિંગ સેન્ટરમાં યોજાયેલા કાર્યક્રમમાં LRD જવાનોનો ગરબાનો વીડિયો સોશિયલ મીડિયામાં વાયરસ થયા બાદ સમગ્ર ઘટનાનો ભાંડો ફૂટ્યો હતો.
તપાસ રિપોર્ટના આધારે કડક કાર્યવાહી કરવામાં આવશેઃ પ્રદીપસિંહ જાડેજા
રાજ્યમા કુલ 7800 લોકરક્ષક દળની આજે દિક્ષાંત સમારોહ યોજાયો હતો. જેમાં ગાંધીનગરના કરાઈમાં લોકરક્ષક દળના 438 જવાનોના દિક્ષાંત પરેડનો કાર્યક્રમ યોજાયો હતો. આ કાર્યક્રમમાં ગૃહ રાજ્યમંત્રી પ્રદીપસિંહ જાડેજા, રાજ્યના ડીજીપી આશિષ ભાટિયા ગૃહ સચિવ પંકજકુમાર સહિતના અધિકારીઓ પણ હાજર રહ્યા હતા. આ દરમિયાન જૂનાગઢમાં LRD જવાનોના ગરબા રમતા વાયરલ વીડિયો મામલે પ્રદીપસિંહ જાડેજાએ નિવેદન આપ્યું હતું. પ્રદીપસિંહે કહ્યું કે, તપાસ રિપોર્ટના આધારે કડક કાર્યવાહી કરવામાં આવશે. ઘટના સમયે કોઈ અધિકારીઓ હાજર હતા તે અંગે તપાસના આદેશ આપ્યા છે. તમામ જવાબદારો સામે કાર્યવાહી કરવામાં આવશે.
પ્રદીપસિંહે નવા પોલીસ જવાનોને દીક્ષાંત સમારોહમાં આપી આ સલાહ
પ્રદીપસિંહ જાડેજાએ શિખામણ આપતાં કહ્યું હતું કે, સોશિયલ મીડિયાનાં જમાનામાં લોકોના હાથમાં મોબાઈલ હોય છે. લોકો પોલીસની કામગીરીનું આંકલન કરતા હોય છે. તેથી તમારે લોકોએ વિચારીને પણ પોતાની ફરજ નિભાવવી પડશે. જ્યારે ગુજરાત પોલીસ અને તમારા પરિવારને ગૌરવ થાય તેવું કામ કરવાનું છે. આ ઉપરાંત વર્તમાન સમયમાં હવે પોલીસ નહીં પરંતુ સ્માર્ટ પોલીસની જરૂર છે તે દિશામાં પણ આગળ વધવું પડશે.
વીડિયો આઘાતજનક, 4 દિવસમાં રિપોર્ટ માટે આદેશ અપાયોઃ ADGP વિકાસ સહાય
જોકે આ મામલે રાજ્યના પોલીસ તાલીમ ADGP વિકાસ સહાયે ઘટનાની ગંભીર નોંધ લીધી છે. વાયરલ વીડિયોના આધારે તપાસના આદેશ આપ્યા છે. તેમણે 4 દિવસમાં રિપોર્ટ સોંપવા માટે આદેશ પણ કર્યો છે. આ અંગે વિકાસ સહાયે કહ્યું કે, વીડિયો ખુબ જ આઘાતજનક છે. આ ઘટનાને લઈને યોગ્ય પગલાં ભરવામાં આવશે. હાલ વીડિયોની ખરાઈ કરવામાં આવી રહી છે. આ વીડિયોમાં પોલીસ છે કે નહીં તેની પણ તપાસ કરવામાં આવી રહી છે.
4 મહિનાથી એક પણ જવાનને કોરોના નથી આવ્યો: DySP નાયબ પ્રિન્સિપાલ પ્રફુલ્લ વાણિયા
જુનાગઢ પોલીસ તાલીમ વિદ્યાલયના 900 જેટલા તાલીમાર્થીઓ સમૂહમાં રાસ લેતા હોય તેવા કાર્યક્રમના વીડિયો વાયરલ થતા વિવાદ થયો છે. ત્યારે પોલીસ તાલીમ વિદ્યાલયના DySP નાયબ પ્રિન્સિપાલ પ્રફુલ્લ વાણિયાએ કહ્યું હતું કે આ તાલીમાર્થીઓ 7 મહિનાથી તાલીમમાં એક જ સ્થળે છે સાથે જ રહે છે, જેની તબીબી ચકાસણી પણ થતી રહે છે. 4 મહિનાથી એકપણ જવાનને કોરોના આવ્યો હોય તેવું બન્યું નથી. ત્યારે ગત રાત્રે જે કાર્યક્રમ યોજાયો તેમાં પણ માત્ર તાલીમાર્થીઓ જ હતા, કોઈ અધિકારીઓ પણ કાર્યક્રમમાં હાજર નથી રહ્યા. આમ તાલીમાર્થીઓનો બચાવ કરવામાં આવી રહ્યો છે.