VIDEO: ભણતરનું નથી ભવિષ્ય,ભણતરના નામે કરાય છે છડેચોક છેતરપિંડી

By : kavan 10:34 PM, 12 June 2018 | Updated : 10:36 PM, 12 June 2018
આવક ગમે તેટલી હોય, છતાં માતા પિતા બાળકોના ભવિષ્ય માટે શિક્ષણ પાછળ પૈસા ખર્ચે છે. પરંતુ સમાજમાં એવા પણ લોકો છે, જે સુવર્ણ ભવિષ્યના આ જ સપનાનો વેપાર કરી રહ્યા છે. જૂનાગઢના માંગરોળમાં શિક્ષણના નામે આવી જ એક પોલમપોલ સામે આવી છે. જ્યાં બે વર્ષમાં વિદ્યાર્થીઓને મેડિકલ ક્ષેત્રે માસ્ટર બનાવવા માટે 50-50 હજાર રૂપિયા લેવામાં આવ્યા અને નકલી સર્ટીફિકેટ આપીને ભવિષ્ય ખેદાન-મેદાન કરી નાખ્યું. 

આ વિદ્યાર્થીઓના હાથમાં ભણતરનું સર્ટીફિકેટ નહી, પરંતુ છડેચોક થયેલી છેતરામણીનો આ પુરાવો છે. 20 રૂપિયા જેટલો ખર્ચ કરીને બનાવવામાં આવેલા સર્ટીફિકેટમાં ભલે લખવામાં આવ્યું હોય કે આ વ્યક્તિએ પેરામેડિકલ કોલેજમાં બે વર્ષ અભ્યાસ કર્યો છે અને પરિક્ષામાં પણ સફળ થયા છે. પરંતુ કાગળ પર લખાયેલા આ એક એક અક્ષરને માનવા માટે કોઇ જ તૈયાર નથી. કારણકે આ સર્ટીફિકેટની મેડિકલની દુનિયામાં કોઇ જ માન્યતા નથી. આ અમે નથી કહેતા....આ બળાપો છે એક વિદ્યાર્થીઓનો. 

વિદ્યાર્થીઓને મેડિકલ ક્ષેત્રે ઉજ્જવળ કારકિર્દી બનાવવા માટે વિદ્યાર્થીઓએ ફી ભરી. બે-બે વર્ષ સુધી ભણતર ચાલ્યું. પરંતુ હવે સર્ટિફિકેટ મળ્યું ત્યારે જાણ થઇ કે સંસ્થાને કોઇ જ માન્યતા મળેલી નથી એટલે ભણતર બાદ નોકરી માટે ભટકતા વિદ્યાર્થીઓને છેતરાયા હોવાનું ભાન થતાં સમગ્ર મામલે પોલીસ ફરિયાદ કરી અને જે આરોપીના નામ ખુલ્યા તે પણ ચોંકાવનારા છે. કારણકે આ કૌભાંડનો એક આરોપી તો ભૂતપૂર્વ ધારાસભ્ય હમીર ધોળાના પુત્ર જયંતી ધોળા છે. અન્ય આરોપી ડોક્ટર અજય સાંગાણી છે.  



હવે આ મામલે વધુ એક ઘટસ્ફોટ સાંભળો. સર્ટીફિકેટ ભલે નકલી હોય,સંસ્થાની માન્યતા નથી. છતાં મીડિયા સામે સંસ્થાના ટ્રસ્ટી તો દાવો કરી રહ્યા છે કે અમારા ભણાવેલા વિદ્યાર્થીઓ તો ગુજરાત સરકારની 108 યોજનામાં પણ કામ કરી રહ્યા છે.  

એટલે સર્ટીફિકેટના આધારે એટલું તો સ્પષ્ટ થાય છે કે મેડિકલ ક્ષેત્રે મસમોટુ કૌભાંડ  થયું છે... ત્યારે સવાલ ઉભા થાય છે કે,શું આટલા સમયથી ચાલતા કૌભાંડની સરકારી તંત્રને જાણ જ ન હતી ?,પૂર્વ ધારાસભ્યના પુત્ર સિવાય કેટલા લોકો છે કૌભાંડના કર્તાહર્તા ?,વિદ્યાર્થીઓને બગડેલા ભવિષ્યનું શું થશે ?, ગુજરાતભરમાં આવી કેટલી નકલી કોલેજો છે ? શું 108 મેડિકલ સેવામાં પણ ખોટા સર્ટીફિકેટના આધારે ભરતી થાય છે? 

આ તમામ સવાલો ભોળા વિદ્યાર્થીઓની સાથે જ સામાન્ય જનતાને સ્પર્શે છે. કારણકે ઉજ્જવળ ભવિષ્ય બનાવી આપવાનો સપના બતાવીને વિદ્યાર્થીઓ સાથે જ ખેલ ખેલાયો છે. તો 108 મેડિકલ સેવામાં પણ ખોટા સર્ટિફિટેકના આધારે ભરતી કરવામાં  આવી. ત્યારે શિક્ષણ અને આરોગ્ય વિભાગ આ મામલે શું કાર્યવાહી કરે છે તે જોવું રહ્યું. 



Recent Story

Popular Story