Narendra Modi Birthday / RSS સ્વયંસેવકથી PM બનવા સુધીની સફર, દેશ માટે મોદી સરકારના મોટા નિર્ણયો જેને લોકોએ વધાવ્યા

વડાપ્રધાન નરેન્દ્ર મોદી આજે 17 સપ્ટેમ્બરે 74 વર્ષના થશે. વડાપ્રધાન મોદીના જન્મદિવસને ખાસ બનાવવા માટે દેશભરમાં અનેક સંસ્થાઓ દ્વારા મોટા પાયે કાર્યક્રમોનું આયોજન કરવામાં આવી રહ્યું છે. વિશ્વ પ્રસિદ્ધ દરગાહ અજમેર શરીફ ખાતે 4000 કિલોના શાકાહારી લંગરનું પણ આયોજન કરવામાં આવ્યું છે.રાષ્ટ્રીય સ્વયંસેવક સંઘ અને ભાજપમાં વિવિધ હોદ્દા સંભાળ્યા બાદ વડાપ્રધાન મોદી કેવી રીતે ગુજરાતના મુખ્યમંત્રી બન્યા અને પછી 2014માં વડાપ્રધાન પદ સુધી પહોંચ્યા, તે એક લાંબી સફર છે, જેના વિશે આપણે અહી જાણીશું.

ગુજરાતના વડનગરમાં એક સામાન્ય પરિવારમાં જન્મેલા નરેન્દ્ર મોદીએ બાળપણમાં તેમના પિતાને ચા વેચવામાં મદદ કરી હતી. 'નરેન્દ્ર મોદીઃ ધ મેન ધ ટાઈમ્સ' નામના પુસ્તકમાં નીલંજન મુખોપાધ્યાય લખે છે કે મોદીના પિતાની વડનગર રેલવે સ્ટેશન પર ચાની દુકાન હતી. આ પછી તેઓએ પોતાના ભાઇ સાથે બસસ્ટેન્ડ પાસે ચાની દુકાન પણ ચલાવી હતી. ગુજરાતના વડનગરમાં એક સામાન્ય પરિવારમાં જન્મેલા નરેન્દ્ર મોદીએ બાળપણમાં તેમના પિતાને ચા વેચવામાં મદદ કરી હતી.

નરેન્દ્ર મોદી ભારત યાત્રા પર નિકળ્યા

વડાપ્રધાન નરેન્દ્ર મોદીએ માત્ર 17 વર્ષની ઉંમરે પોતાનું ઘર છોડ્યું અને દેશભરમાં યાત્રા કરવાનો નિર્ણય કર્યો. તેમના ભારત પ્રવાસ દરમિયાન તેઓ હિમાલયમાં ગરુડચટ્ટી ખાતે રોકાયા, પશ્ચિમ બંગાળમાં રામકૃષ્ણ આશ્રમની મુલાકાત લીધી અને પુર્વોત્તરમાં પણ ગયા. આ યાત્રાઓએ નરેન્દ્ર મોદીના જીવન પર મોટી અસર કરી હતી.

સંઘમાં જોડાવાનો નિર્ણય

narendramodi.in અનુસાર નરેન્દ્ર મોદી 2 વર્ષ પછી ઘરે પરત ફર્યા હતા પરંતુ તેઓ અહીં માત્ર બે અઠવાડિયા રોકાયા હતા અને રાષ્ટ્રીય સ્વયંસેવક સંઘમાં જોડાવા માટે ઘરેથી નીકળી ગયા હતા. નરેન્દ્ર મોદી ત્યારે માત્ર 20 વર્ષના હતા જ્યારે તેઓ સંઘમાં જોડાવા અમદાવાદ પહોંચ્યા હતા. તેઓ સંઘના સંપર્કમાં ત્યારે આવ્યા જ્યારે તેઓ તેમના પિતા સાથે ચાના સ્ટોલ પર કામ કરતા હતા. સંઘ પ્રચારક તરીકે મોદીએ સમગ્ર ગુજરાતમાં પ્રવાસ કર્યો હતો.

ડિસેમ્બર 1973 માં જ્યારે ગુજરાતની એક એન્જિનિયરિંગ કોલેજના વિદ્યાર્થીઓએ વધેલા મેસ બિલ સામે પ્રદર્શન કર્યું, ત્યારે તે આંદોલનમાં ફેરવાઈ ગયું અને તે નવનિર્માણ આંદોલન બની ગયું. બાદમાં જેપી પણ આ ચળવળમાં જોડાયા અને આ આંદોલન ઈન્દિરા ગાંધી સરકાર માટે સમસ્યા બની ગયું. જ્યારે ઈન્દિરા સરકારે ઈમરજન્સી લાદી ત્યારે નરેન્દ્ર મોદીએ તેનો વિરોધ કર્યો હતો. ઈમરજન્સી દરમિયાન મોદીને ઘણા નેતાઓ અને કાર્યકરો સાથે કામ કરવાનો મોકો મળ્યો હતો.

1988માં ગુજરાત ભાજપના સચિવ બન્યા

રાષ્ટ્રીય સ્વયંસેવક સંઘમાંથી આગળ વધીને નરેન્દ્ર મોદીને 1988 માં ભાજપના ગુજરાત એકમના સંગઠન સચિવ તરીકે નિયુક્ત કરવામાં આવ્યા હતા. આ સાથે તેમણે ચૂંટણીના રાજકારણમાં પ્રવેશ કર્યો. 1990માં ભૂતપૂર્વ નાયબ વડા પ્રધાન લાલકૃષ્ણ અડવાણીની અયોધ્યા રથયાત્રા અને 1991-92માં મુરલી મનોહર જોશીની એકતા યાત્રાના સંચાલનમાં મહત્ત્વની ભૂમિકા ભજવી ત્યારે નરેન્દ્ર મોદી ધીમે ધીમે ભાજપ સંગઠનમાં આગળ વધ્યા અને તેમને ઓળખ મળી. આ પછી તેઓ રાજ્યોમાં પાર્ટી દ્વારા આપવામાં આવેલી જવાબદારી નિભાવતા રહ્યા હતા.

મોદી 2001માં સીએમ બન્યા

વર્ષ 2001માં ભાજપે નરેન્દ્ર મોદીને ગુજરાતના મુખ્યમંત્રી તરીકે કાર્યભાર સંભાળવા કહ્યું હતું. મોદી 2014 સુધી આ પદ પર રહ્યા હતા. નરેન્દ્ર મોદીએ મુખ્યમંત્રી તરીકે 2002, 2007 અને 2012ની વિધાનસભા ચૂંટણીમાં ભાજપને જીત અપાવી હતી. અત્યારે પણ તેઓ ગુજરાતમાં ભાજપનો સૌથી મોટો ચહેરો છે જેમના નામ પર ગુજરાતમાં પાર્ટીને વોટ મળે છે.

નરેન્દ્ર મોદી આઝાદી બાદ પ્રથમ એવા બિન-કોંગ્રેસી નેતા છે જેઓ સતત ત્રણ વખત વડાપ્રધાન બન્યા છે. 2014ની લોકસભા ચૂંટણીમાં જ્યારે ભાજપે નરેન્દ્ર મોદીને વડા પ્રધાનપદનો ચહેરો બનાવ્યો ત્યારે મોદીએ દેશભરમાં પાર્ટી અને NDA માટે જોરશોરથી પ્રચાર કર્યો. રાજકીય વિશ્લેષકોના મતે આ મોદી અને પાર્ટી સંગઠનની મહેનતનું પરિણામ હતું કે 2009ની લોકસભા ચૂંટણીમાં 116 બેઠકો જીતનારી ભાજપે 2014ની લોકસભા ચૂંટણીમાં 282 બેઠકોના આંકડા સુધી પહોંચી. આ પછી ભાજપ વિશ્વની સૌથી મોટી પાર્ટી પણ બની ગઈ છે.

ભાજપે અનેક રાજ્યોમાં સરકાર બનાવી

નરેન્દ્ર મોદી વડા પ્રધાન બન્યા પછી ભાજપે તમામ રાજ્યોમાં ખૂબ જ આક્રમક રીતે ચૂંટણી લડી અને એક પછી એક ઘણી ચૂંટણીઓ જીતી. પાર્ટીએ હરિયાણાથી લઈને ઉત્તર પ્રદેશ, ઉત્તરાખંડ અને ત્રિપુરા સુધીના રાજ્યોમાં સરકારો બનાવી, જે ડાબેરીઓનો ગઢ ગણાય છે. પુર્વોત્તરમાં પણ ભાજપનું કદ સતત વધી રહ્યુ છે. 2019ની લોકસભા ચૂંટણીમાં પણ ભાજપે નરેન્દ્ર મોદીને પોતાનો ચહેરો બનાવ્યો અને પાર્ટીએ 303 બેઠકો જીતી. ત્યારે ભાજપના આ પ્રદર્શનથી રાજકીય વિશ્લેષકોને પણ ભારે આશ્ચર્ય થયું હતું. તેની પાછળનું કારણ નરેન્દ્ર મોદીનું કરિશ્માઈ નેતૃત્વ માનવામાં આવતું હતું.

2024માં નરેન્દ્ર મોદીના નામે મળ્યા મત

2024ની લોકસભા ચૂંટણીમાં નરેન્દ્ર મોદી ફરીથી બીજેપીના ચૂંટણી પ્રચારનો ચહેરો બન્યા અને પાર્ટીએ પોતાના દમ પર 370 અને NDA માટે 400 બેઠકો જીતવાનું લક્ષ્ય નક્કી કર્યું. નરેન્દ્ર મોદીએ ફરી એકવાર દેશભરમાં જોરશોરથી પ્રચાર કર્યો પરંતુ ભાજપ એકલા હાથે બહુમતી પણ મેળવી શકી નથી. જોકે એનડીએ સહયોગી દળોની મદદથી પોતાની સરકાર બનાવવામાં સફળ રહ્યું હતું.

વડાપ્રધાન બન્યા બાદ વડાપ્રધાન નરેન્દ્ર મોદીએ વિદેશોની મુલાકાત લીધી હતી. તેઓ તેમના પ્રથમ અને બીજા કાર્યકાળમાં ઘણા દેશોના રાજ્યોના વડાઓ અને અગ્રણી નેતાઓને મળ્યા છે. છેલ્લા કેટલાક વર્ષોમાં વડાપ્રધાને જર્મની, ચીન, રશિયા, ભૂટાન, શ્રીલંકા, બાંગ્લાદેશ, નેપાળ, જાપાન, સાઉદી અરેબિયા સહિતના ઘણા દેશોની મુલાકાત લીધી છે.

સર્જિકલ સ્ટ્રાઈકથી લઈને 370 નાબૂદી સુધી

વડાપ્રધાન નરેન્દ્ર મોદીએ છેલ્લા 10 વર્ષમાં દેશ માટે મોટા નિર્ણયો લીધા જેને યાદ કરવામાં આવે છે. તેમાં નોટબંધી, બાલાકોટ એર સ્ટ્રાઈકથી લઈને જમ્મુ અને કાશ્મીરમાંથી કલમ 370 નાબૂદ કરવા સુધીના મોટા નિર્ણયો છે. મોદી સરકારે ટ્રિપલ તલાકની પ્રથાને ખતમ કરવા માટે કાયદો બનાવ્યો. લોકસભા અને તમામ રાજ્યોની વિધાનસભાઓમાં મહિલાઓ માટે 33% અનામતનો અમલ કરવો એ પણ મોદી સરકારનો મોટો નિર્ણય માનવામાં આવે છે.

યોજનાઓથી લોકોને ફાયદો

છેલ્લા 10 વર્ષમાં પીએમ જન ધન યોજના, સુકન્યા સમૃદ્ધિ યોજના, ઉજ્જવલા યોજના, પીએમ કિસાન સન્માન નિધિ, આયુષ્માન ભારત યોજના, પ્રધાન મંત્રી આવાસ યોજના, પ્રધાનમંત્રી મુદ્રા લોન યોજના જેવી ઘણી મોટી યોજનાઓ મોદી સરકાર દ્વારા શરૂ કરવામાં આવી છે. સરકારનો દાવો છે કે આ યોજનાઓથી દેશના લોકોને ઘણો ફાયદો થયો છે.

UPI વડે ખરીદી વધુ સરળ બની છે

દેશમાં UPI ડિજિટલ ક્રાંતિ લાવવાનો શ્રેય પણ મોદી સરકારને જાય છે. જેના કારણે દેશભરમાં મોટા શહેરોથી લઈને છેવાડાના ગામડાઓ સુધી ઓનલાઈન ટ્રાન્ઝેક્શનને વેગ મળ્યો છે. UPI ના કારણે ભારતમાં રોજબરોજનો સામાન ખરીદવો સરળ બની ગયો છે.

આ પણ વાંચોઃ રેપ પીડિતાની ઓળખ અને તસવીરો વોટ્સએપ ગ્રુપમાં પણ શેર નહીં કરી શકાય, ગણાશે ગુનો- HC

રામ મંદિર નિર્માણ, 25 કરોડ લોકો ગરીબી રેખામાંથી બહાર આવ્યા

ભાજપના નેતાઓનું કહેવું છે કે વર્ષોથી પેન્ડિંગ રામ મંદિર નિર્માણનો વિવાદ મોદી જ્યારે વડાપ્રધાન બન્યા ત્યારે ઉકેલાઈ ગયો છે અને સુપ્રીમ કોર્ટના નિર્ણય બાદ અયોધ્યામાં ભવ્ય રામ મંદિરનું પણ નિર્માણ થયું હતું. અયોધ્યામાં રામ મંદિરનું નિર્માણ, જમ્મુ-કાશ્મીરમાંથી અનુચ્છેદ 370 નાબૂદ કરવાનો પણ ભાજપના ચૂંટણી એજન્ડામાં સમાવેશ કરવામાં આવ્યો હતો. આ બંને કામો નરેન્દ્ર મોદી વડાપ્રધાન બન્યા પછી જ થયા. ભાજપનો દાવો છે કે વડાપ્રધાન મોદીના નેતૃત્વમાં 25 કરોડથી વધુ લોકો ગરીબી રેખામાંથી બહાર આવ્યા છે.

વડાપ્રધાન નરેન્દ્ર મોદીએ આ કાર્યકાળ દરમિયાન ભારતને વિશ્વની ત્રીજી સૌથી મોટી અર્થવ્યવસ્થા બનાવવાનું લક્ષ્ય રાખ્યું છે. આ સિવાય મોદી 2047 સુધીમાં ભારતને વિકસિત દેશ બનાવવાની વાત પણ સતત કરતા રહ્યા છે. 2029માં વન નેશન વન ઈલેક્શન પણ મોદી સરકારના એજન્ડામાં સામેલ છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ