લોડર / 'JCB કી ખુદાઈ': JCB વાહનનું નહીં કંપનીનું નામ છે, ગુજરાતના આ શહેરમાં શરૂ થશે નવી ફેક્ટરી

• ઈંગ્લેન્ડ સ્થિત કંપનીનું નામ છે JCB
• ભારતમાં પોતાની છઠ્ઠી ફેક્ટરી ખોલશે કંપની
• વડોદરામાં પોતાની ફેક્ટરી ખોલવા જઇ રહી છે કંપની 

શું છે વાહનનું સાચું નામ?

તમે ક્યારેક કન્સ્ટ્રક્શન સાઇટ પર પીળા રંગનું મોટું વાહન જોયું હશે જેના ઉપર મોટાં અક્ષરે JCB લખેલું હોય છે. ભારતમાં JCB સોશ્યલ મીડિયામાં પણ ઘણું પ્રચલિત થઈ ચૂક્યું છે. ખરેખર આ વાહનને બેકેહો લોડર કહેવાય છે. જે બંને તરફથી કામ કરી શકે છે. આ વાહન સ્ટેરીંગની જગ્યાએ માત્ર લિવર્સ દ્વારા જ ચલાવવામાં આવે છે. જેની એક તરફ સ્ટેરીંગ અને બીજી તરફ લીવર હોય છે. આગળની તરફનો હિસ્સો જેનાથી સમાન ઉઠાવી શકાય છે તેને લોડર કહેવામાં આવે છે.     

ઈંગ્લેન્ડ સ્થિત કંપનીનું નામ છે JCB

JCB નું પૂરું નામ છે જોસેફ સિરિલ બમફોર્ડ. જે તેના સ્થાપકનું નામ પણ છે. કંપનીનું હેડક્વાર્ટર ઇંગ્લેન્ડના રોસેસ્ટર ખાતે આવેલું છે. આ કંપનીના વિવિધ પ્રોડક્ટ્સમાં બેકેહો લોડર્સ, એક્સકેવેટર્સ, જનરેટર્સ અને કોમ્પેક્ટર્સનો સમાવેશ થાય છે.  મોટેભાગે આપણે જે વાહન જોઈએ છીએ તે બેકેહો લોડર્સ હોય છે, ખરેખર આ એક પ્રકારનું ટ્રેક્ટર જ છે. જેમાં લોડર અને બેકેહોની સાથે એક કેબિન આવેલી હોય છે.

વડોદરામાં પોતાની ફેક્ટરી ખોલવા જઇ રહી છે કંપની 

JCB ના દુનિયાભરમાં કુલ 60 થી વધારે ડીલર્સ 700 જેટલા આઉટલેટ આવેલા છે. ભારતમાં તેની 5 ફેક્ટરી આવેલી છે. દિલ્લી,પૂણે, જયપુર જેવા શહેરોમાં પોતાની ફેક્ટરી ધરાવતી કંપની પોતાની છઠ્ઠી ફેક્ટરી ગુજરાતનાં વડોદરા શહેરમાં ખોલવા જઇ રહી છે. 44 એકર જેટલી જમીનમાં શરૂ થનાર આ પ્રોજેક્ટમાં કંપની 650 કરોડ જેટલું મસમોટું રોકાણ કરવાની છે.