આખરે કેમ ? / પોતાનો સુપરહિટ પાવડર બંધ કરશે Johnson & Johnson, આ ખતરનાક બીમારી થવાનો છે આરોપ  

• પ્રખ્યાત Johnson & Johnson પાવડરને લઈ મોટા સમાચાર 
• કંપનીએ વર્ષ 2023માં વિશ્વભરમાં પાવડરનું વેચાણ બંધ કરવાનો નિર્ણય કર્યો 
• સ્ત્રીઓએ દાવો કર્યો, બેબી પાવડરનો ઉપયોગ કર્યા પછી થયું અંડાશયનું કેન્સર

વિશ્વભરમાં પ્રખ્યાત Johnson & Johnson પાવડરને લઈ એક મોટા સમાચાર સામે આવ્યા છે. વિગતો મુજબ Johnson & Johnsonએ વર્ષ 2023માં વિશ્વભરમાં આ પાવડરનું વેચાણ બંધ કરવાનો નિર્ણય લીધો છે. કંપનીએ ગુરુવારે આ માહિતી આપી છે. જેથી હવે આગામી વર્ષમાં તમને આ કંપનીનો ટેલ્ક આધારિત બેબી પાવડર (J&J બેબી પાવડર) બજારમાં જોવા મળશે નહીં. નોંધનીય છે કે, બે વર્ષ અગાઉ કંપનીએ યુએસમાં આ પાવડરનું વેચાણ બંધ કરી દીધું હતું. યુ.એસ.માં હજારો ગ્રાહકોએ કેસ દાખલ કર્યા બાદ કંપનીએ આ નિર્ણય લીધો હતો. 

Johnson & Johnson પાવડર થઈ જશે બંધ ? 

Johnson & Johnson પાવડર કંપની સામે 38,000 જેટલા કેસ છે. કંપનીએ વર્ષ 2020માં અમેરિકા અને કેનેડામાં ટેલ્ક આધારિત બેબી પાવડરનું વેચાણ બંધ કરી દીધું છે. તમને જણાવી દઈએ કે, કંપની વિરુદ્ધ 38,000 થી વધુ કેસ ચાલી રહ્યા છે. ઘણી સ્ત્રીઓએ દાવો કર્યો હતો કે, બેબી પાવડરનો ઉપયોગ કર્યા પછી તેમને અંડાશયનું કેન્સર થયું હતું. અમેરિકન રેગ્યુલેટર્સે એવો પણ દાવો કર્યો હતો કે, તેમને કંપનીના બેબી પાઉડરમાં કેન્સર પેદા કરતા તત્વો મળ્યા છે. જોકે, કંપનીએ આ આરોપોને નકારી કાઢ્યા હતા. કંપનીએ કહ્યું કે, ઉત્તર અમેરિકામાં ઘટતા વેચાણને કારણે તેણે તે પ્રોડક્ટ હટાવી દીધી છે.

બેબી પાવડરમાં વપરાતું ટેલ્ક શું છે ? 

Johnson & Johnson કંપનીના બેબી પાવડરમાં વપરાતું ટેલ્ક વિશ્વનું સૌથી નરમ ખનિજ છે. તે ઘણા દેશોમાં બનાવવામાં આવે છે. તે કાગળ, પ્લાસ્ટિક અને ફાર્માસ્યુટિકલ્સ સહિત ઘણા ઉદ્યોગોમાં વ્યાપકપણે ઉપયોગમાં લેવાય છે. આ પાવડર નેપી ફોલ્લીઓ અને અન્ય પ્રકારની વ્યક્તિગત સ્વચ્છતામાં વપરાય છે. કેટલીકવાર તેમાં એસ્બેસ્ટોસ હોય છે, જે શરીરમાં કેન્સરનું કારણ બની શકે છે.

કંપનીનું એક જ રટણ પ્રોડક્ટ સંપૂર્ણપણે સલામત 

જોહ્ન્સન એન્ડ જોન્સન સતત આરોપોને નકારી રહ્યું છે કે, તેની પ્રોડક્ટ સલામત નથી. કંપનીનું કહેવું છે કે, દાયકાઓના વૈજ્ઞાનિક પરીક્ષણો અને નિયમનકારી મંજૂરીઓએ તેની ટેલ્ક સુરક્ષિત અને એસ્બેસ્ટોસ મુક્ત હોવાનું દર્શાવ્યું છે. ગુરુવારે આ પ્રોડક્ટનું વેચાણ બંધ કરવાની જાહેરાત કરતી વખતે પણ કંપનીએ આ વાતનું ફરી એકવાર પુનરાવર્તન કર્યું હતું.