કોરોના વાયરસે સમગ્ર વિશ્વમાં કોહરામ મચાવી દીધો છે. અત્યાર સુધી હજારો લોકોને કોરોના વાયરસે પોતાનો ભોગ બનાવ્યાં છે જ્યાં લાખો લોકો જીવન-મરણની લડાઈ લડી રહ્યા છે. ત્યારે આ ચેપની રસી શોધવા માટે વિશ્વની ઘણી સંસ્થાઓ કામે લાગેલી છે. કોરોના વાયરસથી બચવા માટે જોન્સન એન્ડ જોન્સન કંપની પણ આગળ આવી છે. કંપનીએ તેના માટે અમેરિકાની સરકાર સાથે સમજૂતી પણ કરી લીધી છે.
અમેરિકાએ જોન્સન એન્ડ જોન્સન સાથે કરી સમજૂતી
સપ્ટેમ્બરમાં માણસો પર શરુ થશે પરીક્ષણ
આજ સુધી કોરોના વાયરસની કોઈ જ રસી શોધાઈ નથી
કોરોના વાયરસથી બચવા માટે ઘણા બધા પ્રયત્નો કરવામાં આવી રહ્યા છે. એવામાં એક આશાની કિરણ અમેરિકાથી દેખાઈ રહી છે. અમેરિકાની સરકારના બાયોમેડીકલ એડવાન્સડ રીસર્ચ એન્ડ ડેવલપમેન્ટ ઑથોરીટીએ જોન્સન એન્ડ જોન્સન કંપની સાથે સમજૂતી કરી છે જેમાં અમેરિકા એક અબજ ડોલરનું રોકાણ કરશે.
કંપનીએ કોરોના વાયરસની સંભવિત રસી શોધી કાઢી છે જેનું લાંબા સમયથી સંશોધન ચાલી રહ્યું હતું. સપ્ટેમ્બર મહિનામાં તેનું માણસો પર પણ પરીક્ષણ શરુ કરી દેવામાં આવશે. પરીક્ષણ કર્યા બાદ તાત્કાલિક ધોરણે તે લોકો માટે ઉપલબ્ધ કરાવી દેવામાં આવશે.
ઇબોલા વાયરસની રસીનો વિકાસ કરવા માટે જે પદ્ધતિ વિકસાવામાં આવી હતી તે જ પદ્ધતિથી આ વાયરસ માટે પણ કામ કરવામાં આવી રહ્યું છે. કંપનીના મુખ્ય અધિકારીએ કહ્યું તેમની પાસે ઘણી બધી રસી હતી જેનું પરીક્ષણ તેમણે પશુઓ પર કર્યું છે. જેમાંથી જે શ્રેષ્ઠ છે તેની પસંદગી કરવામાં આવશે.
નોંધનીય છે કે આજ સુધી કોરોના વાયરસની કોઈ જ સફળ રસી શોધાઈ નથી. જોકે હાલમાં આ કંપનીને વિશ્વાસ છે કે તે રસી શોધવામાં સફળ રહેશે. જોન્સન એન્ડ જોન્સન કંપનીએ કહ્યું કે કોરોના વાયરસની રસી શોધવા માટે ખૂબ કાળજીથી સંશોધન કરવામાં આવી રહ્યું છે જેથી તેનો વધુને વધુ ઉપયોગ કરી શકાય.