જો બાયડેન યુ.એસ. ની રાષ્ટ્રપતિની ચૂંટણી જીત્યા પછી શું કરશે, પદના શપથ લીધા પછી તે સૌથી પહેલા કયું કામ હાથ પર ધરશે તે અંગે ચર્ચાઓનું બજાર ગરમ છે. આખું વિશ્વ આ પ્રશ્નના જવાબની શોધમાં છે. તો ચાલો જાણીએ કે એવા કયા મુદાઓ છે જે રાષ્ટ્રપતિ તરીકેની બાયડનની સૂચીમાં અગ્રિમતાના ધોરણે હોય શકે છે.
જો બાયડન 20 જાન્યુઆરી 2021ના રોજ શપથ ગ્રહણ કરશે
ડેમોક્રેટિક પાર્ટીના ઉમેદવારપ હતા જો બાયડન, ટ્રમ્પને હરાવી ચૂંટણી જીત્યા
કોરોના સામે લડાઈને બનાવશે મુખ્ય મિશન, પેરિસ કરાર અંગે પણ એલાન સંભવ
હાલમાં અમેરિકા માં જે પ્રકારની પરિસ્થિતિ નિર્માણ થઈ છે તેના અનુસંધાને જો બાયડન નું સૌ પહેલું કામ કોરોના ને રોકવાનું હશે, કોરોના વાયરસ સામે સક્ષમ રીતે કાબૂ મેળવવો તે બાયડનની લિસ્ટમાં સૌથી પ્રથમ લક્ષ્ય હશે.
અમેરિકામાં કોરોનાથી હાલ પરિકસ્થિતિ સૌથી ખરાબ છે
અમેરિકામાં અત્યાર સુધીમાં 1.28 કરોડથી વધુ લોકો સંક્રમિત થયા છે અને 2.43 લાખથી વધુ લોકોનાં મોત નીપજ્યાં છે. આ બધા હોવા છતાં, US રાષ્ટ્રપતિ ડોનાલ્ડ ટ્રમ્પે ન તો માસ્ક જાતે પહેર્યું કે ન તો આખા દેશમાં તેને ફરજિયાત કર્યું. છેવટે અમેરિકામાં કોરોના વાયરસે વ્યાપક ભરડો લીધો હતો, રાષ્ટ્રપતિ ટ્રમ્પ પોતે પણ કોરોના વાયરસ ના સંક્રમણથી બીમાર થયા હતા.
હવે અમેરિકાના પ્રેસિડેન્ટ ઇલેક્ટ જો બાયડને કહ્યું કે પદ સંભાળ્યા પછી તરત જ તેઓ આખા દેશમાં માસ્ક પહેરવાનું ફરજિયાત બનાવશે. આ માટે તેઓ અમેરિકાના તમામ રાજ્યોના ગવર્નરોની સાથે વાતચીત કરશે અને જો આ લોકો તેની વાત નહીં માને તો તે મેયર સાથે પણ વાત કરશે. પરંતુ તેઓ દેશભરમાં કોઈપણ રીતે માસ્ક પહેરવાનું ફરજિયાત બનાવશે.
જો બાયડને કહ્યું છે કે તેઓ કોરોના વાયરસ સામે લડવા માટે પ્રથમ નેશનલ સપ્લાય ચેઇન કમાન્ડરની નિમણૂક કરશે. આ ઉપરાંત પેન્ડેમિક પરીક્ષણ બોર્ડ પણ બનાવવામાં આવશે. આ માટે, જો બાયડને એક ટીમની પણ જાહેરાત કરી છે.
ભારતવંશી ડો. મૂર્તિ ને આપી છે મહત્વની જવાબદારી
કોરોના વાયરસ સામે લડવા માટે બનાવાયેલી કોરોના વાયરસ ટાસ્ક ફોર્સમાં તેમાં ભારતવંશી ડો. વિવેક મૂર્તિ પણ શામેલ છે. બાયડનનું આ પગલું બીજા વિશ્વ યુદ્ધ દરમિયાન ભૂતપૂર્વ રાષ્ટ્રપતિ ફ્રેન્કલિન ડી રૂઝવેલ્ટ દ્વારા સ્થાપિત વોર પ્રોડક્શન બોર્ડ જેવું જ છે.
એવી પણ આશંકા વ્યક્ત કરવામાં આવી રહી છે કે જો બાયડન રાષ્ટ્રપતિ પદ સંભાળ્યાના પહેલા જ દિવસે પેરિસ કરાર અંગે UN ને પત્ર લખશે. જેથી અમેરિકા ગ્લોબલ વોર્મિંગ અને કલાઈમેટ ચેન્જ સામેના વિશ્વવ્યાપી યુદ્ધમાં સામેલ થઈ શકે.
નોંધનિય છે કે પેરિસ કરારમાં 174 દેશોને આવરી લેવામાં આવ્યા છે. જ્યારે રાષ્ટ્રપતિ ટ્રમ્પે આ કરારમાંથી યુ.એસ.નું નામ પરત ખેંચી લીધું હતું, એવું પણ માનવામાં આવે છે કે જો બાયડન આર્થિક રિકવરીની માટે પ્રથમ દિવસે જ કોઈ મોટા એલાન કરી શકે છે.