અમેરિકાએ અફઘાનિસ્તાનમાં પોતાના બે દાયકાના યુદ્ધની પૂર્ણાહૂતિ કરી છે. 30 ઓગષ્ટે અમેરિકન સેનાએ કાબુલ એરપોર્ટ છોડી દીધુ અને આ સાથે તાલિબાનોએ અફઘાનિસ્તાન પર પ્રભુત્વ જમાવ્યું છે.
અમેરિકાના રાષ્ટ્રપતિ બાઈડેન અને અફઘાન રાષ્ટ્રપતિ વચ્ચે થઈ હતી વાતચીત
ફોન કોલમાં તાલિબાનની સામે ચાલી રહેલી લડાઈ અંગે થઈ હતી ચર્ચા
બાઈડને અશરફ ગની પાસેથી તાલિબાનો સામેની લડાઈનો માંગ્યો હતો પ્લાન
તાલિબાનોએ છેલ્લાં એક મહિનામાં નાટ્યાત્મક રીતે આખા દેશ પર કબજો કર્યો. પરંતુ જ્યારથી આ બધુ ચાલી રહ્યું હતું તે અગાઉ અમેરિકાના રાષ્ટ્રપતિ જો બાઈડેન અને તત્કાલીન અફઘાન રાષ્ટ્રપતિ અશરફ ગની વચ્ચે ફોન પર વાતચીત થઈ હતી. જેમાં તાલિબાનની સામે ચાલી રહેલી લડાઈ અંગે ચર્ચા થઈ હતી.
તાલિબાનો સામે ચાલતી લડાઈ અંગે વલણ બદલવાની જરૂર: બાઈડેન
એક સમાચાર એજન્સીએ દાવો કર્યો છે કે 23 જુલાઈએ જો બાઈડેન અને અશરફ ગની વચ્ચે 14 મિનિટ લાંબી વાતચીત થઈ હતી. જેમાં જો બાઈડને અફઘાનિસ્તાનને આપવામાં આવતી સૈન્ય મદદ અંગે ચર્ચા કરી હતી. આ સાથે બાઈડને અશરફ ગનીને કહ્યું હતું કે, તાલિબાનો સામે ચાલી રહેલી લડાઈ અંગે તેમણે વલણ બદલવાની જરૂર છે. કારણકે અફઘાનિસ્તાન અને વિશ્વમાં આ છબી ખરાબ થઈ રહી છે. આ ફોન કોલ કર્યાના આશરે બે અઠવાડિયા બાદ ગનીએ કાબુલ છોડ્યુ હતું. 15 ઓગષ્ટ તાલિબાનોએ કાબુલના રાષ્ટ્રપતિ પેલેસ પર કબજો જમાવી લીધો હતો અને તેના 15 દિવસ બાદ અમેરિકાએ સંપૂર્ણ રીતે અફઘાનિસ્તાનને છોડી દીધુ. આ સાથે 20 વર્ષથી ચાલી રહેલા યુદ્ધનો અંત આવ્યો.
અશરફ ગની સાથેના છેલ્લાં ફોન કોલ પર બાઈડને માંગ્યો હતો પ્લાન
એજન્સીના જણાવ્યાં મુજબ, જો બાઈડને અશરફ ગનીને કહ્યું હતુ કે તેઓ સૈન્યની મદદ ત્યારે જ કરશે જ્યારે ગની તાલિબાનોને અટકાવવા માટેનો પ્લાન તેમની સાથે શેર કરશે. જો બાઈડને કહ્યું હતું કે અમારી તરફથી હવાઈ સપોર્ટ મળશે. પરંતુ અમને એ તો ખબર હોવી જોઈએ કે આગળનો પ્લાન શું છે? આ કોલના થોડા દિવસ પહેલાં જ અમેરિકાએ અફઘાન આર્મીને સમર્થન કરી તાલિબાનો સામે એરસ્ટ્રાઈક કરી હતી.