પર્દાફાશ / નકલી સર્ટિફિકેટથી બેંકમાં નોકરી મેળવી લીધી, 20 મહિના બાદ જ્યારે વેરીફીકેશન થયું તો...

નકલી ડિગ્રી અને સર્ટિફિકેટના આધારે સરકારી નોકરી મેળવવાના અનેક કિસ્સા સામે આવ્યા છે. પરંતુ એક યુવાન નકલી ડિગ્રીના આધારે સ્ટેટ બેન્ક ઓફ ઈન્ડીયાનો પ્રોબીશનરી ઓફીસર બનીને છેલ્લા 20 મહિનાથી નોકરી કરી રહ્યો હોવાનો કૌભાંડનો પ્રર્દાફાશ થયો છે. ઘટનાની વિગત એવી છે કે જયપુરના રામઅવતાર મીનાએ કાનપુરની છત્રપતી શાહુજી મહારાજ યુનિવર્સીટીનુ બોગસ ડિગ્રી મેળવીને બેન્કીંગની ભરતી પ્રકિયામાં ઓનલાઈન અરજી કરીને ડમી સર્ટિફિકેટ રજૂ કરીને પ્રોબીશનરી ઓફીસર તરીકે નિમણુક થયો હતો. બેન્ક દ્વારા સર્ટિફિકેટનુ વેરીફીકેશ કરવાની પ્રકિયા હાથ ધરવામા આવી ત્યારે ડમી સર્ટિફિકેટનો ભાંડો ફુટ્યો હતો.

આરોપી રામઅવતાર મીણાએ નકલી સર્ટિફિકેટ દ્વારા સરકારી નોકરી મેળવી લીધી હતી. 20 માસ સુધી બેન્કમાં પ્રોબીશનરી ઓફીસર તરીકે તાલીમ મેળવી અને પગાર મેળવ્યો હતો. જ્યારે બેન્ક દ્વારા છત્રપતિ શાહુજી મહારાજ યુનિવર્સીટી ખાતે સર્ટિફિકેટ મોકલીને ચકાસણી કરવામા આવતા ભાંડો ફુટ્યો. રામઅવતારે બેન્ક અને સરકાર સાથે છેતરપિંડી આચરતા પોલીસે ઉચાપતની ફરિયાદ નોંધી છે. આરોપી જયપુરનો હોવાથી પોલીસની એક ટીમ તેની ધરપકડ માટે રવાના થઈ છે.

સરકારી નોકરીમા નકલી સર્ટિફિકેટથી અનેક સવાલો ઉઠી રહ્યા છે. આ પ્રકારે નકલી સર્ટિફિકેટ બનાવવાનુ નેટવર્ક ચાલતુ હોવાની શક્યતા પોલીસે વ્યકત કરી છે. આ ષડયંત્રમા રામ અવતાર સાથે અન્ય કોણ કોણ સંડોવાયેલા છે. આ ઉપરાંત અન્ય કોઈ વ્યક્તિએ સરકારી નોકરી મેળવી છે કે નહિ તે તમામ મુદ્દે પોલીસે તપાસ શરૂ કરી છે.