રાતેજના મહિલા સરપંચ ઘૂંઘટમાં જોવા મળતા શિક્ષણ મંત્રી જીતુવાઘાણીએ કરી અપીલ, કુરિવાજો દૂર કરવા અંગે કહી આ વાત
બહુચરાજી રાંતેજ ગામમાં શાળા પ્રવેશોત્સવમાં જોવા મળી પહેલ
રાતેજ ગામની મહિલા સરપંચ જોવા મળ્યા હતા ઘૂંઘટમાં
ઘૂંઘટમાં સરપંચ તરીકે ફરજ બજાવવી અઘરી: જીતુ વાઘાણી
જમાનો બદલાઇ ગયો, ગામો અને શહેરોની કાયા પલટ થઇ ગઇ. નવી રીતો, નવા રિવાજો, નવી ટેક્નોલોજી અને બીજુ ઘણુ બધુ અપડેટ થયું. પરંતુ હજી પણ સમાજના કેટલાક દૂષણો, કેટલીક કૂટેવો અને કુરિવાજો હાલમાં પણ ઘર કરીને જ બેઠા છે. ઘૂંઘટ ઓઢવાની પ્રથા. આના વિશે તો તમને ખ્યાલ જ હશે કે આપણા કરતા મોટા વ્યક્તિ એટલે કે વડીલની હાજરીમાં ઘરની મહિલાએ લાજ કાઢવાની. આવુ દ્રશ્ય મહેસાણામાં આયોજિત પ્રવેશોત્સવ કાર્યક્રમમાં જોવા મળ્યું.
મહિલા સરપંચને લાજ નહીં કાઢવા જીતુ વાઘાણીની અપીલ
મહેસાણાના બહુચરાજીના રાતેજ ગામમાં શાળા પ્રવેશોત્સવનો કાર્યક્રમ યોજાયો હતો. આ કાર્યક્રમમાં શિક્ષણમંત્રી જીતુવાઘાણી કુરિવાજો દૂર કરવા પહેલ કરતા જોવા મળ્યા. જીતુ વાઘાણીની હાજરીમાં ગામના સરપંચે ઘૂંઘટમાં જોવા મળ્યા. આ પ્રસંગે રાતેજ ગામના મહિલા સરપંચ ઘૂંઘટમાં જોવા મળ્યા. આ જોઇને જીતુ વાઘાણીએ મહિલા સરપંચને લાજ ન કાઢવા અપીલ કરી. સાથે સાથે જણાવ્યું કે ઘૂંઘટમાં સરપંચ તરીકે ફરજ બજાવવી અઘરી છે.આમ જણાવીને મહિલા સરપંચને બધાની સાથે જ સ્ટેજ પર સ્થાન આપ્યું.
23 જૂને જીતુવાઘાણીએ આસજોલમાં શાળા પ્રવેશોત્સવ શરૂ કરાવ્યો
તો આ તરફ શિક્ષણમંત્રી જીતુ વાઘાણી પણ પ્રવેશોત્સવ કાર્યક્રમમાં જોડાયા હતા.મહેસાણાના આસજોલ ગામની પ્રાથમિક શાળા તેમજ બહુચરાજીમાં પ્રવેશોત્સવ કરાવ્યો હતો. આ દરમિયાન તેમણે ગુજરાતનવા ગામડાઓમાં શિક્ષણનું સ્તર વધ્યાનું નિવેદન આપ્યું હતું.
18 હજાર ગામોની સરકારી શાળામાં કરાવાશે પ્રવેશ
મહત્વનું છે કે 23 જૂનથી 25 સુધી એમ ત્રણ દિવસ શાળા પ્રવેશોત્સવનો પ્રારંભ કરવામાં આવ્યો છે. સીએમ ભૂપેન્દ્ર પટેલના હસ્તે 17મા શાળા પ્રવેશોત્સવની શરૂઆત કરવામાં આવી. મુખ્યમંત્રીએ બનાસકાંઠાની મેમદપુર પ્રાથમિક શાળામાં પ્રવેશોત્સવ શરૂ કરાવ્યો. આ 3 દિવસ દરમિયાન 18 હજાર ગામોની સરકારી શાળાઓમાં બાળકોને પ્રવેશ કરાવાશે. જેમાં 32 હજાર બાળકોને 13 સરકારી શાળાઓમાં પ્રવેશ કરાવવામાં આવશે. ઉલ્લેખનીય છે કે, વર્ષ 2002માં ધોરણ 1થી 8માં ડ્રોપઆઉટ રેશિયો 37.22 ટકા હતો, જે 20 વર્ષ બાદ ઘટીને 3.7 ટકા થયો છે. સાથે જ 2003-04માં પ્રાથમિક શાળાઓમાં બાળકોનો પ્રવેશ દર 75 ટકા હતો. જે વધીને 99.21 ટકા થયો છે.