ચેતવણી ભરી અપીલ / પોલીસ આંદોલન મામલે જીતુ વાઘાણીએ આપી ચેતવણી, કહ્યું તકલીફ પડશે તો ચલાવી નહીં લેવાય

• પોલીસ ગ્રેડ -પે આંદોલન મામલો
• પોલીસ આંદોલન અંગે જીતુ વાઘાણીનું નિવેદન
• "કર્મચારીઓની સાચી બાબતમાં સરકાર હકારાત્મક"

ગુજરાતમાં પોલીસ ગ્રેડ પેને લઈને આંદોલન ચાલી રહ્યું છે. ત્યારે આ મામલે રાજ્ય સરકારના પ્રવક્તા જીતુ વાઘાણીએ મોટું નિવેદન આપ્યું છે. જીતુ વાઘાણી એ કહ્યું કે, ગૃહ રાજ્યમંત્રી હર્ષ સંઘવીએ પોલીસકર્મીઓના આગેવાનો સાથે સાથે ચર્ચા કરી છે. અને રાજ્ય સરકાર જે નિયમ હશે અને કરવા જેવું હશે તે ચોક્કસ સરકાર કરશે. સાચી બાબત જે પણ હશે તે બાબતે સરકાર હકારાત્મક છે. 
 

લોકોને તકલીફ પડશે તો ચલાવી નહીં લેવાય: જીતુ વાઘાણી. પ્રવક્તા રાજ્ય સરકાર
પરંતુ કાયદો અને વ્યવસ્થાની મુશ્કેલી ન પડે તે બાબત પર ધ્યાન રાખવામાં આવે તેવી કર્મચારીઓને અપીલ કરું છું. રાજ્યની જનતાને કોઈપણ આંદોલનથી તકલીફ પડશે તો ચલાવી નહીં લેવાય. આપને જણાવી દઈએ કે, પોલીસ ગ્રેડ પે મામલે સોશિયલ મીડિયામાં ચાલી રહેલું આંદોલન વધુ ઉગ્ર બન્યું છે. આંદોલનના સમર્થનમાં પોલીસ પરિવારની મહિલાઓ પણ જોડાઈ છે. અને રાજ્યના અનેક શહેરોમાં વિરોધ પ્રદર્શન કરી રહી છે.

‘હમારી માંગે પુરી કરો‘ના નારા જુનાગઢમાં ગુંજ્યા
ગ્રેડ પે આંદોલનનો મામલો વધુ વકરી રહ્યો છે. સુરત, ગાંધીનગર, અમદાવાદ બાદ હવે જૂનાગઢમાં પણ વિરોધ શરૂ થયો છે. જૂનાગઢ ગ્રેડ પે ને લઇ પોલીસ પરિવાર દ્વારા વિરોધ કરવામાં આવ્યો છે. તેઓએ થાળી વગાડી વિરોધ કર્યો હતો. તેમજ ‘હમારી માંગે પુરી કરો‘ના નારા સાથે જિલ્લાના તમામ પોલીસ પરિવાર હેડક્વાટર ખાતે એક્ઠા થયા હતાં.

અમદાવાદ દાણીલીમડામાં થાળી વેલણ વગાડી વિરોધ
પોલીસ ગ્રેડ પે મામલે સોશિયલ મીડિયામાં ચાલી રહેલું આંદોલન વધુ ઉગ્ર બન્યું છે. આંદોલનના સમર્થનમાં પોલીસ પરિવારની મહિલાઓ પણ જોડાઈ છે. મહેસાણા, સુરત અને પાટણ બાદ અમદાવાદમાં પણ મહિલાઓ દ્વારા વિરોધ પ્રદર્શન કરાયું હતું. દાણીલીમડામાં પોલીસ લાઈન નજીક મહિલાઓએ ચક્કાજામ કરીને તેમજ થાળી વેલણ વગાડીને વિરોધ કર્યો હતો.

જામનગરમા પોલીસ હેડક્વાટર પોલીસ પરિવાર ઉમટ્યા
જામનગર ખાતે જૂની પોલીસ લાઈન અને પોલીસ હેડક્વાટર ખાતે આજે પોલીસ પરિવારની મહિલાઓ અને બાળકોએ દેખાવો કર્યા હતા. ઉચ્ચ પગાર ધોરણની માંગણી સાથે  પોલીસ પરિવાર મહિલાઓ થાળી વગાડી અનોખો વિરોધ કર્યો. જયારે હેડક્વાટર ખાતે મહિલાઓ એકત્ર થઇ ધરણા પર બેસી ગઈ હતી. જેને લઈને બંને સ્થળોએ  પોલીસ પહોચી હતી અને મહિલાઓને વિખેરી શાંત પડવાનો પ્રયાસ કર્યો હતો. જો કે પોલીસ અધિકારીઓની સમજાવટ બાદ હાલ મામલો શાંત પડી ગયો છે પરંતુ આવો જ વિરોધ અન્ય શહેરોમાં થઇ શકે છે.

વધુ એક ડિપાર્મેન્ટ પોલીસ આંદોલનમાં જોડાયું
ગુજરાત પોલીસ ગ્રેડ પે આંદોલનમાં વધુ એક ડિપાર્મેન્ટ જોડાયું છે. ગૃહ વિભાગ હેઠળ આવતા નશાબંધી અને આબકારી વિભાગના કર્મચારીઓ આ આંદોલનમાં જોડાયા છે. હાલ માં આબકારી વિભાગના કોન્સ્ટેબલનો ગ્રેડ પે 1 હજાર 650 છે. આબકારી વિભાગના કોન્સ્ટેબલો દ્વારા પોલીસ સમકક્ષ ગ્રેડ પે કરવા માટે ગૃહ રાજ્યમંત્રી સમક્ષ માગ કરવામાં આવી હતી. ઉલ્લેખનીય છે કે ગુજરાત પોલીસને હવે આબકારી વિભાગના કર્મચારીઓનું સમર્થન મળતા સરકારે હવે ચોક્કસથી આ દિશામાં વિચારવું પડશે.