પાંચ રાજ્યોની વિધાનસભાની ચૂંટણીમાં ભાજપે 4 રાજ્યોમાં મજબૂત પ્રદર્શન કર્યુ છે. ત્યારે હવે વારો છે ગુજરાતનો. ગુજરાત વિધાનસભાની ચૂંટણી યોજાનાર છે ત્યારે ભાજપના પ્રવક્તા જીતુવાઘાણીએ જણાવ્યુ છે ગુજરાતમાં જ્યારે પણ ચૂંટણી આવે ભાજપ તૈયાર જ છે. ગુજરાત વિધાનસભાની ચૂંટણીને લઇને હજુ સુધી કોઇ જાહેરાત કરવામાં આવી નથી પરંતુ જીતુ વાઘાણીએ જણાવ્યુ કે સામાન્ય રીતે ચૂંટણીઓ સમયસર જ યોજાતી હોય છે. ચૂંટણીના આયોજનનો નિર્ણય ચૂંટણી પંચનો હોય છે.
ચૂંટણીમાં ભાજપ બુલડોઝર ફેરવવા તૈયાર-વાઘાણી
ગુજરાત વિધાનસભાની ચૂંટણી જ્યારે પણ આવે ભાજપ તો તૈયાર જ છે તેમ જીતુ વાઘાણીએ જણાવી દીધુ. સાથે જીતુવાઘાણીએ જોરદાર પ્રહાર કરતા જણાવ્યું કે ચૂંટણીમાં ભાજપ બુલ્ડોઝર ફેરવવા તૈયાર જ છે. મહત્વનુ છે કે પીએમ મોદી 11 માર્ચે અમદાવાદ આવી રહ્યા છે ત્યારે આ પ્રસંગે કમલમમાં પીએમ મોદી પ્રતિનિધીઓને માર્ગદર્શન આપશે. વધુમાં જીતુ વાઘાણીએ જણાવ્યું કે ભાજપ માટે આ અંતિમ ચૂંટણી નથી. ભાજપ માટે ચૂંટણીએ સેવાની તક છે.
કોંગ્રેસનો સફાયો થયો- વાઘાણી
5 રાજ્યોની વિધાનસભાની ચૂંટણીના પરિણામોમાં 4 રાજ્યોમાં ભાજપનો ભગવો લહેરાયો છે. ઉત્તર પ્રદેશમાં તોં કોંગ્રેસ માંડ ખાતુ ખોલાવી શકી છે. આ ઉપરાંત મણિપુર, ઉત્તરાખંડ, ગોવા અને પંજાબમાં પણ કોંગ્રેસ કંઇ દમદાર પ્રદર્શન કરી શકી નથી. જેને લઇને ગુજરાત ભાજપના પ્રવક્તા જીતુ વાઘાણીએ કોંગ્રેસને આડે હાથ લેતા જણાવ્યું કે પાંચેય રાજ્યોમાંથી કોંગ્રેસને સફાયો થયો છે. હારના કારણે કોંગ્રેસમાં નિરાશાનું વાતાવરણ જોવા મળી રહ્યું છે. કોંગ્રેસના માનસમાં 2020ની સ્પષ્ટ હાર જોવા મળી રહી છે. સાથે તેમણે ચાર રાજ્યોની જનતાનો આભાર માનીને કહ્યું કે, દેશવાસીઓએ સર્વ સમાવેશી વિકાસયાત્રાને સ્વિકારી છે. પ્રધાનમંત્રી મોદીના નૈતૃત્વમાં રામ મંદિર, કાશી, સર્જિકલ સ્ટ્રાઈક જેવા નિર્ણયો લેવામાં આવ્યા છે. જેને કારણે યુપી વાયા 2022 ગુજરાત અને 2024 માટે ફરી પાછો દિલ્લીનો રસ્તો ખુલ્યો છે.
ભાજપના કાર્યકરો દ્વારા જીતનો જશ્ન
ચાર રાજ્યોની વિધાનસભાની ચૂંટણીમાં ભાજપનો ભગવો લહેરાતા ઉજવણીનો માહોલ જોવા મળી રહ્યો છે. ભાજપના કાર્યકરો ઢોલ નગારા સાથે તેમજ ફટાકડા ફોડીને જીતનો જશ્ન મનાવી રહ્યા છે. આ તરફ ગુજરાતમાં કમલમ ખાતે વિજયોત્સવનું ખાસ આયોજન કરવામાં આવ્યું છે. મહિલા કાર્યકરોએ ગરબાના તાલે વિજય મનાવી રહી છે. મહત્વનું છે કે ઉત્તર પ્રદેશમાં ભાજપ 263સીટ, મણિપુરમાં 28, ઉત્તરાખંડમાં 48 સીટ અને ગોવામાં 19 સીટ પર ભાજપ આગળ છે.