મુકેશ અંબાણીની ટેલીકોમ કંપની Jioને તેમનો રીંગ ટાઈમ વધારવા માટે દબાણ બીજી કંપનીઓ દબાણ કરી રહી છે. આ સમગ્ર મુદ્દો TRAI સુધી પહોચ્યો છે તો એ જાણવું જરૂરી છે કે રીંગ ટાઈમ વધવા કે ઘટવાથી ટેલીકોમ કંપનીઓ અને ગ્રાહકોને શું અસર આવે છે?
એરટેલ અને વોડાફોન આઈડિયા જેવી કંપનીઓ તેને હજુ વધારીને ૩૦ સેકંડ કરવા દબાણ કરી રહી છે.
Jio ઓછા રીંગ ટાઈમથી બીજી કંપનીઓ પાસે વધુ રકમ વસુલતી હોવાનો આક્ષેપ
મુકેશ અંબાણીની રિલાયન્સ ગ્રુપની કંપની Jio એ પોતાના નેટવર્કથી જવા વાળા આઉટગોઇંગ કોલ્સનો રીંગ ટાઈમ ૨૦ સેકન્ડથી વધારીને ૨૫ સેકંડ કરી દીધો છે. જો કે વોડાફોન એરટેલ જેવી કંપનીઓ હજુ પણ આ સમય વધારીને ૩૦ સેકંડ કરી દેવા દબાણ કરી રહી છે.
TRAIને ચેતવણી
હમણાં એરટેલે ટેલીકોમ રેગ્યુલેટરી ઑથોરિટી પત્ર લખીને ચેતવણી આપી હતી કે જો Jio તેમના રીંગનો સમય નહીં વધારે તો બીજી કંપનીઓ પણ તેમની જેમ સમય ઘટાડીને ૨૦ સેકંડ કરી દેશે.
JIOને રીંગ ટાઈમ ઓછો રાખવાથી શું ફાયદો થાય?
એરટેલનો આરોપ છે કે Jio જાણી જોઈને તેમનો રીંગ ટાઈમ ઓછો રાખે છે. આમ કરવાથી Jio બીજી ટેલીકોમ કંપની પાસે ઇન્ટરકનેક્શન યુસેજ ચાર્જીસ (IUC) સાથે છેડછાડ કરીને તેને વધુ પ્રમાણમાં વસૂલે છે.
ઇન્ટરકનેક્શન યુસેજ ચાર્જીસની સરળ સમજૂતી
ઇન્ટરકનેક્શન ચાર્જીસ એ એક ટેલીકોમ કંપની બીજી ટેલીકોમ કંપની પાસે વસુલે છે. ઉદાહરણ તરીકે જયારે JIoનો ગ્રાહક Jioના સીમકાર્ડ વડે વોડાફોનના કાર્ડધારક બીજા ગ્રાહકને ફોન કરે છે ત્યારે કોલ ઉપાડતાની સાથે જ Jioએ વોડાફોનને ઇન્ટરકનેક્શન યુસેજ ચાર્જીસની રકમ ચૂકવવી પડે છે. આ રકમ ટેલીકોમ કંપનીઓની આવકનો પ્રમુખ સ્ત્રોત છે.
એરટેલનો આક્ષેપ છે કે Jio તેની કોલ રીંગનો સમય ઓછો રાખે છે જેની પાછળ તેની ગણતરી એવી છે કે આમ કરવાથી મિસ કોલનું પ્રમાણ વધે છે જેથી મિસ કોલ થઇ ગયા પછી જે તે ટેલીકોમ કંપનીના ગ્રાહકે Jioના ગ્રાહકને કોલ બેક કરવો પડે છે. આ વળતો કોલ કરતા જ જે તે કંપનીએ Jioને તેમના ઇન્ટરકનેક્શન યુસેજ ચાર્જીસ ચુકવવા પડે છે. આમ ઓછી રીંગ સાથે Jio વધુ ઇન્ટરકનેક્શન યુસેજ ચાર્જીસ વસુલવા માંગે છે. જેથી આમ જોવા જઈએ તો રિંગ ટાઈમ પ્રત્યક્ષ નહીં પરંતુ પરોક્ષ રીતે સામાન્ય યુઝર માટે મહત્વનો છે. કારણકે ટૅલિકૉમ કંપનીઓ રીંગ ટાઈમને આધારે જ યુઝર્સ પાસેથી ટૉક ટાઈમનો ચાર્જ વસૂલતી હોય છે.
Jioનો બચાવ
Jio એ આ તમામ આક્ષેપો ફગાવી દેતા જણાવ્યું છે સમગ્ર દુનિયામાં ૧૫ થી ૨૦ સેકંડને જ રીંગ માટે આદર્શ સમય રાખવામાં આવ્યો છે.
૬ સપ્ટેમ્બરની TRAI મીટિંગ
૬ સપ્ટેમ્બરે યોજાયેલ TRAIની મિટિંગમાં એરટેલ, BSNL, MTNL, વોડાફોન આઈડિયા એ કોલના જવાબ માટે ૩૦ સેકંડની રીંગને સમર્થન આપ્યું. જો કે Jioએ કહ્યું કે આ સમય વધુમાં વધુ ૨૫ સેકન્ડ રાખી શકાય. કોઈ પણ કોલરને જવાબ આપવા માટે ૨૦ સેકન્ડનો સમય પુરતો છે. આનાથી વધુ સમય સ્પેક્ટ્રમના સંસાધનની બરબાદી છે.
TRAIએ આ મુદ્દે તમામ કંપનીઓને અલગ અલગ માંગણીઓ ધ્યાનમાં લઇને સૌને મંજૂર હોય તેવી સહમતી સાધવા માટે જણાવ્યું હતું.