રિલાયન્સ Jioએ મહિનાઓના ટેસ્ટિંગ પછી આખરે JioMart વેબસાઈટ લોન્ચ કરી છે. આ વેબસાઈટ Jioનું ઈ કોમર્સ ક્ષેત્રમાં સાહસ છે અને જે તે સેવા ઉપલબ્ધ વિસ્તારોમાંથી વેબસાઈટને ઓર્ડર મળવાના પણ શરુ થઇ ગયા છે.
શું મળશે આ વેબસાઈટ ઉપર?
આ વેબસાઈટ ઉપર કરિયાણાની ચીજવસ્તુઓ જેમ કે લોટ, દાળ, મસાલા, અનાજ, ખાંડ, મીઠું, બિસ્કીટ, નુડલ્સ, નાસ્તા, ચવાણા, ચોકલેટો, રેડી ટુ કુક નાસ્તા, મીઠાઈઓ, અથાણા, ચા, કોફી, જ્યુસ, વાળ, ચામડીની દેખભાળના ઉત્પાદનો, ઘરની સફાઈના સાધનો, ઇલેક્ટ્રિક ઉપકરણો, સ્ટેશનરી, નાના બાળકોની દેખભાળના ઉત્પાદનો ઉપરાંત ફળો, શાકભાજી અને ડેરી ઉત્પાદનો જેવા ઉત્પાદનો મળશે.
વેબસાઈટનો દાવો છે કે તેઓ ઘણા ઉત્પાદનોમાં MRP ઉપર 5%થી વધુ ડિસ્કાઉન્ટ મળી રહ્યા છે. તેમણે એમ પણ જણાવ્યું કે તેઓ ખેડૂતો પાસેથી સીધા જ તેમના ઉત્પાદન ખરીદી લેશે અને ખેડૂતોને જે તે બ્રાંડ સાથે સાંકળી આપશે. તેની વેબસાઈટમાં પોતાના વિષે લખતા તેઓ કહે છે કે અમે તમને જે પણ ઘરની ખરીદી માટે જરૂરી છે તે તમામ ઉત્પાદનો એક જ પ્લેટફોર્મ ઉપર ઉપલબ્ધ કરાવી રહ્યા છીએ.
કેવી રીતે જાણવું તમારા વિસ્તારમાં ડિલીવરી થાય છે કે નહીં?
વેબસાઈટ ઉપર 6 ડિજિટનો તમારો પીન કોડ માંગવામાં આવે છે જે ચેક કરીને તમને જાણ કરાય છે કે તમારા વિસ્તારમાં ડિલીવરી થાય છે કે નહીં.
વોટ્સએપ ઉપરથી સીધો ઓર્ડર આપી શકાશે
નોંધનીય છે કે Jioમાં હમણાં ફેસબુકે જંગી ઇન્વેસ્ટમેન્ટ કર્યું છે. આ સાથે જ JioMart અને વોટ્સએપને સાંકળી લેતું એક ફિચર નવી મુંબઈ, થાણે જેવા વિસ્તારોમાં શરુ કરાયું છે જે અંતર્ગત તમે સીધા વોટ્સએપ વડે જ JioMartમાં ઓર્ડર પ્લેસ કરી શકો છો.
નોંધનીય છે કે રિલાયન્સ પોતે રિલાયન્સ ફ્રેશ અને રિલાયન્સ સ્માર્ટ જેવા સાહસોથી પહેલેથી જ રિટેલ માર્કેટમાં સક્રિય છે. કોરોનાના સમયમાં જયારે લોકો ઘરની બહાર નીકળવાનું ટાળી રહ્યા છે તેવામાં ઘરવખરીની ચીજવસ્તુઓ ઘર આંગણે પહોંચાડવાની સુવિધા આપતી JioMartને અભૂતપૂર્વ પ્રતિસાદ મળે તેવું શક્યતાઓ છે.