બિઝનેસ / 3 વર્ષ પહેલા ચાલુ થયેલી આ કંપની SBI, HDFC, ઈન્ફોસીસ જેવી દિગ્ગજ કંપની કરતા મોટી બની ગઈ!

• ક્રૂડ તેલના ભાવો ગગડવાથી સાઉદી અરેબિયન તેલ કંપની અરામકોની રિલાયન્સમાં રોકાણ કરવાની ડીલ અત્યારે લટકી ગઈ છે
• આ ડીલ દ્વારા ફેસબુક તેની વોટ્સએપ પે સર્વિસને આગળ વધારવાની તક શોધી રહ્યું છે

કંપનીનું આ વેલ્યુએશન દેશની દિગ્ગજ કંપનીઓ જ નહીં પણ SBI દેશની સૌથી મોટી બેંક કરતા પણ વધારે છે. સોશિયલ મીડિયા કંપની ફેસબુકએ Jioમાં માત્ર 9.9% હિસ્સો ખરીદવા માટે મોટી રકમ ચૂકવી છે. રિલાયન્સ Jioનું વેલ્યુએશન હાલમાં રૂ 4,40,141 કરોડ છે, જે તેની પેરેન્ટ કંપની રિલાયન્સ ઇન્ડસ્ટ્રીઝ લિમિટેડના 52 ટકા હિસ્સાની બરાબર છે. BSE સેન્સેક્સમાં માર્કેટ કેપિટલાઇઝેશનની બાબતમાં હાલમાં રિલાયન્સ Jio દેશની પાંચમી સૌથી મોટી કંપની છે. બજારના નિષ્ણાતોના મતે રિલાયન્સ Jioના વેલ્યુએશનમાં આ મોટા વધારા પાછળનું કારણ ફેસબુક દ્વારા કરવામાં આવેલું રોકાણ છે. જો કે મોટો સવાલ એ છે કે રિલાયન્સ Jio આ મેગા ડીલથી શું મેળવશે અને ફેસબુકની આ ડીલ પાછળની રણનીતિ શું છે.

મુકેશ અંબાણીની વ્યૂહરચના શું છે 

રિલાયન્સ Jio વિશે વાત કરીએ તો મુકેશ અંબાણીની નજર ફેસબુક સાથેની ડીલ કરીને કંપનીને દેવામાંથી ઉગારવાની છે. મુકેશ અંબાણીની આગેવાની હેઠળના જૂથની વ્યૂહરચના આગામી કેટલાક સમયમાં ગ્રુપને સંપૂર્ણપણે દેવામાંથી મુક્ત કરવાની છે. અત્યારે કોરોના સંકટને કારણે ક્રૂડ તેલના ભાવો ગગડ્યા છે. આને કારણે સાઉદી અરેબિયન તેલ કંપની અરામકોની રિલાયન્સમાં રોકાણ કરવાની ડીલ અત્યારે લટકી ગઈ છે. આવી સ્થિતિમાં રિલાયન્સ માટે ફેસબુક સાથે ડીલ કરવું ફાયદાકારક હતું, જેનો તેમણે પૂરો લાભ લીધો છે.

Jio સાથે વ્યવહાર કરીને ફેસબુક આ ફાયદો રળશે 

નિષ્ણાતોના મતે આ ડીલ દ્વારા ફેસબુક તેની વોટ્સએપ પે સર્વિસને આગળ વધારવાની તક શોધી રહ્યું છે. નોંધનીય છે કે છેલ્લા ત્રણ વર્ષથી ફેસબુક દ્વારા વોટ્સએપ પે સર્વિસ શરૂ કરવાના પ્રયત્નો કરવામાં આવી રહ્યા છે પરંતુ સરકાર તરફથી મંજૂરી મળી નથી. આવી સ્થિતિમાં, ફેસબુકની વ્યૂહરચના Jioની મદદ દ્વારા ભારતીય બજારમાં તેની હાજરી સ્થાપિત કરવાની છે.