રમત ભારે પડી / PUBG એ કર્યા કંગાળ! 13 વર્ષના છોકરાએ ઘરની તિજોરી તળિયાઝાટક કરી નાંખી, પરિવારે કર્યો કેસ

• 13 વર્ષના સગીર બાળકે PUBG રમવામાં ઘરની તિજોરી ખાલી કરી
• સગીર બાળકને ફોસલાવવાના આરોપમાં પાડોશી પર કેસ નોંધાયો
• સગીરની કુટેવનો ફાયદો બાજુમાં રહેતા યુવકે ઉઠાવ્યો

PUBG રમવાની ટેવમાં સગીર બાળકે ઘરની તિજોરી ખાલી કરી નાખી

ખરેખર, ઝાલાવાડ શહેરના ગાગરોન રોડ પર રહેતો એક સગીર બાળક PUBG રમવાની ટેવમાં એટલો બધો ડૂબી ગયો કે તેણે પોતાના ઘરની તિજોરી ખાલી કરી નાખી. સગીર બાળકે PUBG રમીને 3 લાખ રૂપિયા ઉડાવી દીધા. બાળકના પરિવારજનોનું કહેવુ છે કે તેમના પુત્રની આ કુટેવનો ફાયદો પાડોશીમાં રહેતા ઈ-મિત્રની દુકાન ચલાવનાર યુવકે ઉઠાવ્યો છે. ઈ-મિત્ર  ચલાવનાર યુવક સગીર બાળકને તેના ઘરેથી પૈસા લાવવા માટે મજબુર કરતો હતો અને પોતાના રેફરલ કોડથી ઈક્વિપમેન્ટ ખરીદતો હતો. જો પૈસા નહી લાવે તો બીજા દિવસે ડબલ પૈસા લાવવાની ધમકી આપતો હતો. એવામાં પરિવારજનોએ કોતવાલી પોલીસ સ્ટેશનમાં કેસ નોંધાવ્યો છે.

સાધનો ખરીદવાના નામે માંગતો હતો પૈસા

સગીર બાળકના મામાએ જણાવ્યું કે તેના ભાણિયાને બાજુમાં રહેતા ઈ-મિત્રની દુકાન ચલાવનારા શાહબાજ  ખાને 21 જૂને પોતાની પાસે બોલાવ્યો અને પોતાના સકંજામાં લઇને PUBG માં ઈક્વિપમેન્ટસ ખરીદવાની વાત કહી. આ સાથે સગીર બાળક પાસેથી તેના પિતાના આધાર કાર્ડ, પાન કાર્ડ, મોબાઈલ અને બેન્ક એકાઉન્ટની માહિતી પણ મંગાવી. આરોપીએ સગીર બાળકના પિતાના એકાઉન્ટમાંથી પેટીએમ પર નવુ એકાઉન્ટ ખોલી તેમાં નવો મોબાઈલ નંબર લિન્ક કરાવી દીધો. આરોપીએ પ્રથમ વખત સગીર બાળક પાસેથી 500 રૂપિયાનું ટ્રાન્જકેશન કરાવ્યું. ત્યારબાદ આરોપી સગીર બાળકને ફસાવીને સતત PUBG પર ગન, કપડાં અને અન્ય ઈક્વિપમેન્ટસ ખરીદવાના નામે પૈસા મંગાવતો હતો.