ગ્રહણ / વધુ એક પરીક્ષા રખાઇ મોકૂફ, ગુજરાતમાં કોરોના કેસમાં મોટો ઉછાળો આવતા લેવાયો નિર્ણય

• જેટકોની ઈજનેર કક્ષાની પરીક્ષા મોકૂફ
• 22 જાન્યુઆરીએ યોજાવાની હતી પરીક્ષા
• કોરોનાના સંક્રમણને ધ્યાને રાખીને નિર્ણય

ગુજરાતમાં કોરોના કેસોનું કીડિયારું ઉભરાયું ત્યારે કોલેજો અને સરકારી ભરતીની પરીક્ષામાં લટકી પડે તેવી પૂરેપૂરી સંભાવનાઓ છે. જેમ જેમ તારીખો નજીક આવતી જાય છે તેમ તેમ પરીક્ષાઓ રદ્દ કરવામાં આવી રહી છે. GTU અને આણંદની સરદાર પટેલ યુનિવર્સિટીમાં પહેલા સેમેસ્ટરની પરીક્ષા રદ્દ થયા બાદ હવે જેટકોની ઈજનેર કક્ષાની પરીક્ષા મોકૂફ રાખવાનો નિર્ણય કરવામાં આવ્યો છે. 2 દિવસ બાદ એટલે કે 22 જાન્યુઆરીએ ઈજનેર એક્ઝામ શરૂ થવાની હતી પણ કોરોનાના સંક્રમણને ધ્યાને રાખી હાલ પરીક્ષા પોસ્ટપોન્ડ કરી દેવામાં આવી છે. પરીક્ષાની નવી તારીખ આગામી દિવસોમાં જાહેર થશે તેવી માહિતી પણ પરીક્ષાર્થીને આપવામાં આવી છે.

SP યુનિવર્સિટીમાં પરીક્ષા મોકૂફ
આ પહેલા GTU બાદ આણંદની સરદાર પટેલ યુનિવર્સિટીમાં પહેલા સેમેસ્ટરની પરીક્ષા પોસ્ટપોન્ડ કરવામાં આવી હતી. પહેલા સેમેસ્ટર માટેની પરીક્ષાનો કાર્યક્રમ 24 તારીખથી શરૂ થવાનો હતો પણ વધતા જતા કોરોના સંક્રમણને લીધે SP યુનિવર્સિટીના સત્તાધીશોએ પરીક્ષા મોકૂફનો નિર્ણય લીધો હતો અને જાહેરાત પણકરવામાં આવી છે કે કોરોના કાબૂમાં  પહેલા સેમેસ્ટર માટેની પરીક્ષાનો કાર્યક્રમ ફરી જાહેર કરાશે. 

ગુજરાત ટેકનોલોજી યુનિવર્સિટીએ પરીક્ષા રાખી મોકૂફ
11 જાન્યુઆરીના રોજ  ગુજરાત ટેકનોલોજી યુનિવર્સિટીએ ત્રીજી લહેરનાં કારણે 20મી જાન્યુઆરીથી શરૂ થતી તમામ પરીક્ષાઓને મોકૂફ રાખવાનો નિર્ણય કર્યો હતો. આગામી સમયમાં નવી તારીખોને વેબસાઇટ પર જાહેર કરવામાં આવશે.

ગુજરાત યુનિ.માં ઓફલાઇન સાથે ઓનલાઇન પરીક્ષા યોજશે
ત્રીજી લહેરનાં કારણે હવે ગુજરાત યુનિવર્સિટીએ ઓનલાઈન પરીક્ષાનું આયોજન કર્યું છે. આગામી સમયમાં ઓનલાઈન પરીક્ષાને લઈને સંપૂર્ણ વિગતો અને કાર્યક્રમ જાહેર કરવામાં આવશે. GTU બાદ ગુજરાત યુનિવર્સિટીએ પણ પોતાનો નિર્ણય બદલ્યો છે અને ઓફલાઇનની સાથે સાથે ઓનલાઈનનો વિકલ્પ આપવામાં આવ્યો છે. આ પહેલા યુનિવર્સિટીએ માત્ર ઓફલાઇન પરીક્ષાનું જ આયોજન કર્યું હતું. 

સરકારી ભરતી પર ફરી લાગી શકે છે કોરોનાનું ગ્રહણ
મહત્વનીની વાત એ છે કે કોલેજો અને શાળાની પરીક્ષાઓ સાથે સાથે સરકારી ભરતીની પણ લેખિત પરીક્ષાઓ આવનાર સમયમાં મોટા પાયે આવી રહી છે. જેથી મહેનત કરતાં ઘણા ઉમેદવારો યુનિવર્સિટી પરીક્ષાઓ મોકૂફ રાખતા મુંઝવણમાં છે કે કોમ્પિટિટિવ એક્ઝામ લેવાશે કે કેમ? ઉમેદવારો ઈચ્છી રહ્યા છે કે પરીક્ષાઓ લેવામાં આવે પણ જો કોરોના કેસ સતત વધે તો એક્ઝામ લઈ શકાય તેમ નથી આથી સત્વરે કોઈ નિર્ણય કરવામાં આવે તેવી સરકાર પાસે અપેક્ષા રાખી રહ્યા છે.