વૈશ્વિક બજારમાં ક્રુડ ઓઈલ મોંઘુ થતા ટૂંક સમયમાં પેટ્રોલ અને ડીઝલના ભાવમાં પણ વધારો થઈ શકે છે.
2 મે પછી પેટ્રોલ અને ડીઝલના ભાવમાં વધારો થવાની સંભાવના
પેટ્રોલ અને ડીઝલના ભાવમાં 2-3 રુપિયાનો વધારો થઈ શકે છે
જેટ ફ્યુઅલ (વિમાની ઈંધણ) માં ભાવમાં 6.7 ટકાનો વધારો
જોકે કેટલો વધારો કરાશે તે અંગે કોઈ ફોડ પડાયો નથી. સરકારી સૂત્રોના જણાવ્યાનુસાર 2 મે ના દિવસે વિધાનસભાની ચૂંટણીના પરિણામ આવવાના છે જે પછી ગમે ત્યારે પેટ્રોલ-ડીઝલના ભાવ વધી શકે છે. આ દરમિયાન સરકારે જેટ ફ્યુઅલ (વિમાની ઈંધણ) માં ભાવમાં 6.7 ટકાનો વધારો ઝીંકી દીધો છે.
ભાવવધારાનું આ છે કારણ
આંતરરાષ્ટ્રીય ક્રૂડ ઓઈલના ભાવમાં વધારો થતા ઘરેલુ મોરચું પણ પેટ્રોલ અને ડીઝલના ભાવ વધવાનું નક્કી છે. સતત 16 દિવસ સુધી સ્થિર રહ્યાં બાદ હવે પેટ્રોલ અને ડીઝલના ભાવ વધવાનું નક્કી છે. ડોલર નબળો પડતા આંતરરાષ્ટ્રીય સ્તરે ક્રૂડ ઓઈલના ભાવ ભડકે બળી રહ્યાં છે. છેલ્લા ચાર દિવસથી ક્રૂડના ભાવમાં લગાતાર વધારો થઈ રહ્યો છે. છેલ્લા બે મહિનાથી ઓઈલ માર્કેટિંગ કંપનીઓએ પેટ્રોલ અને ડીઝલના ભાવમાં કોઈ મોટો વધારો કે ઘટાડો કર્યો નથી.
પેટ્રોલ અને ડીઝલના ભાવમાં 2-3 રુપિયાનો વધારો થઈ શકે છે
સરકારી માલિકીની ઓઈલ કંપનીઓ થયેલી ખોટની ભરપાઈ કરવા પેટ્રોલ અને ડીઝલના ભાવમાં તબક્કાવાર 2-3 રુપિયાનો વધારો કરવાનું વિચારી રહી છે. મેના પહેલા અઠવાડિયામાં પહેલા તબક્કાના ભાવ વધારાનો કંપનીનો પ્લાન છે. લોકોએ પેટ્રોલ અને ડીઝલના ભાવમાં તબક્કાવાર વધારા માટે તૈયાર રહેવું પડશે. ફેબ્રુઆરી 27 પછી આ બન્ને ઈંધણના ભાવમાં કોઈ વધારો કરાયો નથી. માર્ચ અને એપ્રિલમાં કુલ ચાર વાર પેટ્રોલ અને ડીઝલના ભાવમા ઘટાડો કરવામાં આવ્યો છે. જો આંતરરાષ્ટ્રીય સ્તરે ક્રુડ ઓઈલના ભાવમાં ઘટાડો થાય તો ઓઈલ માર્કેટિંગ કંપનીઓ તેમની ખોટ ભરપાઈ કરી શકે છે.