વિશ્વની સૌથી મોટી ઇ-કોમર્સ કંપની એમેઝોનના માલિક જેફ બેઝોસની સંપત્તિ એક નવી ટોચને સ્પર્શી ગઈ છે. બેઝોસની સંપત્તિ 200 અબજ ડોલર (લગભગ 15 લાખ કરોડ રૂપિયા)ને પાર કરી ગઈ છે.
ભારતીય ચલણમાં 200 અબજ ડોલરની કિંમત લગભગ 15 લાખ કરોડ રૂપિયા છે. બ્લૂમબર્ગ બિલિયોનેર ઇન્ડેક્સ અનુસાર બુધવારે એમેઝોનના શેર વિક્રમ ઉંચાઇ પર પહોંચતાં બેઝોસની સંપત્તિમાં પણ વધારો થયો હતો અને તેઓ 200 અબજ ડોલરની સંપત્તિ ધરાવતા વિશ્વના પ્રથમ વ્યક્તિ બની ગયા છે.
ઈલોન મસ્કની સંપત્તિ બેઝોઝથી અડધી
તે જ સમયે, ટેસ્લાના શેરમાં ઉછાળાને કારણે કંપનીના સ્થાપક ઈલોન મસ્કની સંપત્તિ વધીને 101 અબજ ડોલર થઈ ગઈ છે. ફેસબુકના સ્થાપક માર્ક ઝુકરબર્ગ ઓગસ્ટની શરૂઆતમાં 100 અબજ ડોલરની ક્લબમાં જોડાયા હતા. બુધવારે તેમની સંપત્તિમાં 8.5 અબજ ડોલરનો વધારો થયો છે.
કોરોના હોવા છતાં ટોપ 500 ધનિકોની સંપત્તિ વધી
આ વર્ષે વિશ્વના 500 સૌથી ધનિક લોકોની સંપત્તિમાં 809 બિલિયન ડોલરનો વધારો થયો છે. જ્યારે વૈશ્વિક કોરોનાવાયરસ મહામારીને કારણે GDPમાં રેકોર્ડ ઘટાડો થયો છે અને લાખો લોકો બેરોજગાર છે તે જ સમયે 500 ટોચના ધનિકોની સંપત્તિ જાન્યુઆરીથી 14 ટકા વધી છે. આ વર્ષે ઈલોન મસ્કની સંપત્તિમાં 73.6 અબજ ડોલરનો વધારો થયો છે. તે જ સમયે, બેઝોસની સંપત્તિમાં 87.1 બિલિયનનો વધારો થયો છે.
ચીનના અબજોપતિઓની આવકમાં પણ વધારો
ચીનના ટેક અબજોપતિઓની સંપત્તિ આ વર્ષે વધી છે. ટેન્સેન્ટ હોલ્ડિંગ લિમિટેડના CEO પોની મા ની દોલતમાં આ વર્ષે 16.6 અબજ ડોલરનો વધારો થયો છે. હવે તેમની સંપત્તિ 55.2 અબજ ડોલર છે. આ તરફ અલીબાબા હોલ્ડિંગ લિમિટેડના જેક મા અને NetEase Inc.ના વિલિયમ ડિંગની સંપત્તિમાં 12 અબજ ડોલરનો વધારો થયો છે.