ગરમાવો / આ સંકેત શું કહે છે? કોંગ્રેસના દિગ્ગજ ધારાસભ્યના કાર્યક્રમમાં ભાજપના MLA-MP 'ચીફ ગેસ્ટ', પછી કરી સ્પષ્ટતા

• ધોરાજીના ધારાસભ્યનો કાર્યક્રમ ચર્ચાનો વિષય
• લલિત વસોયાનો ફરી ભાજપ તરફી ઝુકાવ સામે આવ્યો
• સાંસદ રમેશ ધડુક અને ધારાસભ્ય જયેશ રાદડિયા મુખ્ય મહેમાન

ગુજરાત કોંગ્રેસના ધારાસભ્યનો ફરી એકવાર ભાજપ તરફી ઝુકાવ સામે આવ્યો. ધોરાજીમાં યોજાનારા કાર્યક્રમમાં કોંગ્રેસના ધારાસભ્ય દ્વારા ભાજપના સાંસદ અને ધારાસભ્યને આમંત્રણ આપવામાં આવ્યું.  સ્વ.રણછોડભાઇ કોયાણીના નામકરણ કાર્યક્રમમાં સાંસદ રમેશ ધડુક અને ધારાસભ્ય જયેશ રાદડિયા મુખ્ય મહેમાન તરીકે આમંત્રણ અપાતા ફરી એકવાર ચર્ચાનો દોર શરૂ થયો છે. 

ફરી એકવાર લલિત વસોયાનો ભાજપ પ્રેમ આવ્યો સામે

મહત્વનું છે કે ધોરાજીના ધારાસભ્ય લલિત વસોયાનો ફરી એકવાર ભાજપ પ્રેમ જોવા મળ્યો.  પોતાના મતવિસ્તારના કાર્યક્રમમાં  ભાજપના સાંસદ અને ધારાસભ્યને આમંત્રણ આપતા રાજકારણમાં ગરમાવો આવ્યો છે.  સ્વ.રણછોડભાઇ કોયાણી માર્ગ નામાંકન તથા લલિત વસોયાના સહયોગથી સર્વ રોગ નિદાન કેમ્પની આમંત્રણ પત્રિકા સામે આવી છે. 14ઑગષ્ટે યોજાનારા આ કાર્યક્રમમાં કાર્યક્રમ અધ્યક્ષ સાંસદ રમેશ ધડુક તથા માર્ગ નામાંકન અને તક્તી અનાવરણ માટે ધારાસભ્ય જયેશ રાદડિયાનું નામ લખેલું જોવા મળી રહ્યુ છે. ત્યારે ફરી એકવાર લલિત વસોયાનો ભાજપ પ્રેમ જોતા ચર્ચા શરૂ થઇ છે કે શું તેઓ કોંગ્રેસને હવે અલવિદા કહેવાની ફિરાકમાં છે ? 

29જુલાઇએ ભાજપના કાર્યક્રમમાં જોવા મળ્યા હતા લલિત વસોયા

ઉલ્લેખનીય છે કે અગાઉ જુલાઇ માસમાં પણ લલિત વસોયા અને જયેશ રાદડિયા સાથે જોવા મળ્યા હતા. ધોરાજીમાં દિવંગત વિઠ્ઠલ રાદડિયાની ત્રીજી વાર્ષિક પૂણ્યતિથિ હતી. ત્યારે બ્લડ ડોનેશન કેમ્પનું આયોજન કરવામાં આવ્યુ હતુ. જેમા ધોરાજી-ઉપલેટા વિસ્તારના કોંગ્રેસના ધારાસભ્ય લલિત વસોયા અને જેતપુર-જામકંડોરણા ભાજપના ધારાસભ્ય જયેશ રાદડિયા એકસાથે એકમંચ પર ફોટો સેશન કરતા જોવા મળ્યા હતા. આ અંગે તેઓએ રદિયો આપતા જણાવ્યુ હતું કે તેઓ કોંગ્રેસમાં જ રહેવાના છે.  ત્યારે હવે ફરી એકવાર આમંત્રણ પત્રિકા સામે આવતા લલિત વસોયાને લઇને રાજકારણમાં ગરમાવો આવ્યો છે.