વલસાડ જિલ્લાના પારડીમાં તસ્કરોએ તરખાટ મચાવી અંદાજે દોઢ કરોડથી વધુની ચોરી કરી ફરાર થઈ જતાં ચકચાર મચી છે. પારડીના પારસી સ્ટ્રીટના આવેલ જય જલારામ જવેલર્સના માલિક પરિવાર સાથે પ્રવાસે ગયા હતા અને તસ્કરો ઘર અને શોરૂમમાંથી હાથ ફેરો કરી જતાં પરિવાર પર આભ તુટી પડ્યું છે.
રૂ.1.5 કરોડના સોના-ચાંદીના દાગીનાની ચોરી
શો-રૂમના માલિક પરિવાર સહિત પ્રવાસમાં ગયા હતા
CCTV કેમેરાનું DVR પણ તસ્કરો લઇ ગયા
પારડીના જય જલારામ જ્વેલર્સની તિજોરી તોડી દોઢ કરોડના દાગીનાની ચોરી થઇ છે. પારડીના પારસી સ્ટ્રીટમાં આવેલા જય જલારામ જવેલર્સના માલિક દિલીપ પારેખ તેમના પરિવાર સાથે પ્રવાસે ગયા હતાં. આ સમયે તસ્કરો તેમના ઘર અને શોરૂમમાંથી હાથ ફેરો કરી ગયા છે. કરોડોની ચોરીની જાણ થતાં જિલ્લાભરની પોલીસ દોડતી થઇ ગઇ છે. શો-રૂમમાંથી 5 કિલોના કિંમતી દાગીનાની ચોરી થઇ છે.
શોરૂમ લગાવેલા સીસીટીવી કેમેરાનું DVR પણ ગાયબ
તસ્કરો ચોરી કરી સીસીટીવી કેમેરાનું ડીવીઆર પણ સાથે લઈ ફરાર થઈ ગયા હોવાથી તસ્કરો સુધી પહોંચવા માટે મદદરૂપ થનાર સૌથી મોટું સબૂત પણ પોલીસને હાથ લાગ્યુ ના હતું. તસ્કરો ઘરની છત પર આવેલી ગ્રીલ તોડી ઘરમાં પ્રવેશ કર્યા હતા. પરિવારજનોના કહેવા મુજબ જે તિજોરી તૂટેલી છે તે તીજોરી ડબલ સિક્યુરિટી કોડ સાથેની હતી. તેમ છતાં તેને કોડને ભેદીને તસ્કરો તિજોરી તોડવામાં સફળ રહ્યા હોવાથી અનેક સવાલો ઉભા થઇ રહ્યા છે. જોકે પોલીસે આસપાસના વિસ્તારના સીસીટીવી ફૂટેજ સહિતના સબૂત મેળવી તસ્કરો સુધી પહોંચવા તમામ દિશામાં તપાસ તેજ કરી છે.
પોલીસનું નાઈટ પેટ્રોલીંગ કાગળ પૂરતું!
આમ વલસાડ જિલ્લામાં શિયાળાની શરૂઆતમાં જ તસ્કરો એક પછી એક મોટી ચોરીની ઘટનાને અંજામ આપી જિલ્લા પોલીસને ખુલ્લો પડકાર ફેંકી રહ્યા છે. પરંતુ પારડીમાં દોઢ કરોડથી વધારે કિંમતના દાગીનાની ચોરીની ઘટનાને કારણે પોલીસની આબરૂના લીરા ઉડ્યા છે. પોલીસનું નાઈટ પેટ્રોલીંગ કાગળ પૂરતું જ હોય તેવા આક્ષેપો થઈ રહ્યા છે. ત્યારે હવે પોલીસે આ મામલાને ગંભીરતાથી લઇ તસ્કરો સુધી પહોંચવા તમામ દિશામાં તપાસ તેજ કરી છે. જોકે અત્યારે પોતાનું સર્વસ્વ લૂંટાઇ ગયું હોવાનું હોવાથી શોરૂમ માલિક અને પરિવાર શોક મગ્ન છે.