ભારતના ફાસ્ટ બોલર જસપ્રીત બૂમરાહે બોલિંગ એવરેજ મામલે દુનિયાના મહાન બોલર્સને પણ પાછળ છોડી દીધા છે.
૫૦ વર્ષની બેસ્ટ બોલિંગ એવરેજ
માર્શલ, ગાર્નર, એમ્બ્રોસ, મેકગ્રાથી બૂમરાહ આગળ
સરેરાશ મામલે બૂમરાહ સૌથી આગળ
ભારતના ફાસ્ટ બોલર જસપ્રીત બૂમરાહે બોલિંગ એવરેજ મામલે વિન્ડીઝના મહાન બોલર્સ- માલ્કમ માર્શલ, કર્ટલી એમ્બ્રોસ, જોએલ ગાર્નર અને ઓસ્ટ્રેલિયાના ગ્લેન મેકગ્રાને પણ પાછળ છોડી દીધા છે. છેલ્લાં ૫૦ વર્ષમાં ૭૫થી વધુ વિકેટ ઝડપનારા બોલર્સની સરેરાશ મામલે બૂમરાહ સૌથી આગળ નીકળી ગયો છે.
કેટલી છે એવરેજ
બૂમરાહે ૧૬ ટેસ્ટ મેચમાં ૨૦.૬૮ની સરેરાશથી ૭૬ વિકેટ ઝડપી છે, જ્યારે વિન્ડીઝના ભૂતપૂર્વ ફાસ્ટર માલ્કમ માર્શલે ૮૧ ટેસ્ટમાં ૨૦.૯૪ની સરેરાશથી ૩૭૬ વિકેટ ઝડપી છે. જોએલ ગાર્નરે ૫૮ ટેસ્ટમાં ૨૦.૯૭ની સરેરાશથી ૨૫૯ વિકેટ ઝડપી છે. આ ઉપરાંત કર્ટલી એમ્બ્રોસે ૯૮ ટેસ્ટ મેચમાં ૨૦.૯૯ની સરેરાશથી ૪૦૫ શિકાર કર્યા છે. ત્યાર બાદ ઓસ્ટ્રેલિયાના વર્તમાન ફાસ્ટ બોલર પેટ કમિન્સનો નંબર આવે છે, તેણે અત્યાર સુધી રમેલી ૩૨ ટેસ્ટમાં ૨૧.૫૧ની સરેરાશથી ૧૫૩ વિકેટ ઝડપી છે, જ્યારે ઓસ્ટ્રેલિયાના જ ભૂતપૂર્વ ફાસ્ટ બોલર ગ્લેન મેકગ્રાએ ૧૨૪ ટેસ્ટ મેચમાં ૨૧.૬૪ની સરેરાશથી ૫૩૬ વિકેટ ઝડપી હતી.
''હું માત્ર મારી બોલિંગ પર ધ્યાન આપું છું''
ઓસ્ટ્રેલિયા સામેની વર્તમાન શ્રેણીની બે ટેસ્ટમાં બૂમરાહે કુલ ૧૦ વિકેટ ઝડપી ચૂક્યો છે. બીજી ટેસ્ટ મેચ પૂરી થયા બાદ તેણે કહ્યું હતું, ''હું આંકડા પર નજર રાખતો નથી. એનાથી દબાણ સર્જાય છે. હું માત્ર મારી બોલિંગ પર ધ્યાન આપું છું.'' ઉલ્લેખનીય છે કે ૨૦૧૮-૧૯ના પ્રવાસ દરમિયાન બૂમરાહે ૨૧ વિકેટ ઝડપી હતી. બૂમરાહના આ શાનદાર પ્રદર્શનના દમ પર ભારતે કાંગારું ટીમને ૨-૧થી માત આપી હતી.