50 વર્ષની આસપાસની ઉંમર ધરાવતા આ જાપાનના કોરોનાવાયરસના દર્દીએ એવું કર્યું કે લોકોનો જીવ તાળવે ચોંટી ગયો. જાણી જોઈને વાયરસ ફેલાવા માંગતા આ ભાઈને પોલીસે માસ્ક અને સૂટ પહેરીને મહામહેનતે પકડીને હોસ્પિટલમાં દાખલ કરાવી દીધો.
આ કોરોનાવાયરસના દર્દીમાં કોઈ લક્ષણો નહોતો દેખાયા
ડોકટરોએ તેને ઘરે જઈને પોતાની રીતે એકલામાં રહેવા જણાવ્યું હતું
ઘરના સભ્યોને કહ્યું કે હું વાયરસ બહાર ફેલાવી દઈશ
વિશ્વભરમાં કોરોનાવાયરસની મોતનો આંકડો 3500 વટાવી ગયો છે અને આશરે 100000 જેટલા લોકોને ઇન્ફેક્શન લાગ્યું છે. એવા સમયે જાપાનના ગામગોરી શહેરના આ દર્દીને કોરોનાવાયરસ પોઝિટિવ આવ્યો.
તેને હોસ્પિટલના ડોકટરોએ ઘરે મોકલી આપ્યો અને પોતાની રીતે એકલામાં રહેવા જણાવ્યું જેથી વાયરસ ફેલાય નહીં. નોંધનીય છે કે આ વ્યક્તિના માતા પિતા બંનેને કોરોનાવાયરસ પોઝિટિવ આવ્યો છે. તેણે ડોકટરોની સૂચના અવગણીને તેના સંબંધીઓને કહ્યું કે તે હવે કોરોનાવાયરસ ફેલાવી દેશે.
તે ટેક્સી લઇને એક બારમાં પહોંચી ગયો જ્યાંથી તે બીજા બારમાં ગયો. ત્યાં તેણે જાહેરાત કરી કે તેને કોરોનાવાયરસ છે. અહીં ઉલ્લેખનીય છે કે જાપાનમાં કોરોનાવાયરસના 1000 થી વધુ પોઝિટિવ કેસીસ છે.
ગામગોરી શહેરના પોલીસ સ્ટેશનના અધિકારીઓ સુરક્ષાત્મક સૂટ પહેરીને તાત્કાલિક બારમાં ધસી ગયા પણ ત્યાં સુધી આ માણસ ફરાર થઇને ટેક્સીમાં ઘરે જતો રહ્યો હતો.
બારના સ્ટાફે શું પ્રતિક્રિયા આપી?
ધ ટોક્યો રિપોર્ટર ન્યુઝ પેપર સાથે વાત કરતા એક સભ્યએ કહ્યું કે તે આ ઘટનાને પચાવી નથી શકતો. બધા આ પ્રકારના વર્તનથી ખૂબ ક્રોધિત અને ભયભીત છે. દર્દી રવાના થયા બાદ બંને બારને ઘસીને સાફ કરવામાં આવ્યા અને ત્યાં હાજર લોકોના પરીક્ષણ કરવામાં આવ્યા.
આ વ્યક્તિને આ ઘટના બાદ તાત્કાલિક હોસ્પિટલમાં દાખલ કરાવી દેવાયો.
ગામગોરીના મેયર તોશીઆકી સુઝુકીએ કહ્યું કે આ ખૂબ દુઃખની વાત છે કે આ દર્દીએ ઘરે એકલા રહેવાની વાત માની નહિ.
આખી દુનિયાના અલગ અલગ દેશોમાંથી લોકો કોરોનાવાયરસના નવા નવા કેસ સામે ઝીંક ઝીલી રહ્યા છે. વિવિધ દેશો ચીનની જેમ જાહેરમાં ભેગા થવાના કાર્યક્રમો, પ્રવાસ વગેરે ઉપર પ્રતિબંધ મૂકી રહ્યા છે.
ઓસ્ટ્રેલિયા, વિયેતનામ, USA જેવા દેશો ચીનથી આવેલા અથવા નજીકના સમયમાં ચીન ગયેલા પ્રવાસીઓને દેશમાં એન્ટ્રી નથી આપી રહ્યા જયારે જોર્ડન, લેબેનોન જેવા દેશો હાલમાં ઇટલીનો પ્રવાસ કરી આવેલા લોકોને પ્રવેશ નથી આપી રહ્યા.