જામનગરમાં હોટેલમાં રૂમ ભાડે રાખી ચાલતા વેશ્યાવૃતિના નેટવર્ક પર પોલીસ તરાપ મારી હતી. એક મહિલા, એક ગ્રાહક અને સંચાલકની ધરપકડ કરી છે. જો કે મુખ્ય સંચાલક હાજર નહીં મળતા ફરાર દર્શાવાયો છે. સંસ્કારીનગરીને વધુ એક કલંક લગાવનાર સ્થળ શહેર ભાજપના ઉપપ્રમુખનું છે. ચાલો વિસ્તારથી જાણીએ શુ છે સમગ્ર રેકેટ...
જામનગરમાં પંચવટી સર્કલ પર આવેલ હોટેલ ગોલ્ડન ક્રાઉનમાં દેહવિક્રયનો ધંધો ચાલતો હોવાની સીટી બી-ડિવીઝન પોલીસને બાતમી મળી હતી. જેના આધારે પોલીસે બે ડમી ગ્રાહકો મોકલ્યા હતા. ત્યારબાદ પ્રો.એએસપી સાફિન હસનની આગેવાની નીચે સીટી બી-ડિવીઝન PI રાઠોડ સહિતના સ્ટાફે દરોડો પાડ્યો હતો. જેમાં ડમી ગ્રાહક રૂમ નંબર ૨૦૩માંથી એક બહારના રાજ્યની લાચાર યુવતી સાથે મળી આવ્યો હતો. ડમી ગ્રાહકને હોટેલના રીસેપ્શન પાસે બેસેલ દિનેશભાઈ લક્ષ્મણભાઈ સાકટ (રહે.બાઈની વાડી હર્ષદમીલની ચાલી સંતોષી માતાનું મંદિર, જામનગર) એ રૂપિયા લઇ શરીરસુખની વ્યવસ્થા કરી આપી હોવાની વિગતો સામેં આવી હતી.
કોણ છે મુખ્ય સંચાલક ?
પોલીસે હોટેલ પરથી વેશ્યાવૃતિના નેટવર્કનું સંચાલન કરતા પકડાયેલ દિનેશ સાકટની ધરપકડ કરી હતી. જેની પૂછપરછમાં આ સમગ્ર નેટવર્ક મૂળ રાજકોટના અને હાલ જામનગરમાં સ્વામીનારાયણ નગરમાં રહેતા રાકેશ મગનલાલ ગાગળા નામનો શખ્સ ચલાવતો હોવાની વિગતો સામે આવી છે. પોલીસે આ શખ્સને ફરાર દર્શાવ્યો છે. આ જ શખ્સ બહારથી યુવતીઓની તસ્કરી કરી અહી લઇ આવી અને ધંધો કરાવતો હોવાનું સામે આવ્યું છે. આ શખ્સે જ આરોપી દિનેશને સંચાલન કરવા બેસાડ્યો હતો. પોલીસે યુવતીને મુક્ત કરાવી આરોપી દિનેશની ધરપકડ કરી બંને સામે આઈપીસી કલમ 370(3) તથા ઈમોરલ ટ્રાફીક પ્રીવેન્સનન એક્ટ 1956ના કાયદાની કલમ 3(1), 4(1), 5(1), 5(1બી), 6(1) મુજબ ફરિયાદ નોંધી આગળની કાર્યવાહી હાથ ધરી હતી.
જે હોટેલમાં સીટી બી ડીવિઝન પોલીસે દરોડો પાડ્યો છે તે ગોલ્ડન ક્રાઉન હોટેલ શહેર ભાજપના ઉપ પ્રમુખ આશિષ કંટારીયાની છે. ભાજપના હોદ્દેદાર અને અન્ય આસામીની ભાગીદારી વાળી હોટેલમાં સંચાલક રાકેશ રૂમ ભાડે રાખી ધંધો કરાવતો હતો. અહીં સવાલ એ છે કે આ પ્રકરણમાં ભાજપના હોદેદ્દારની ક્યાય સંડોવણી સામે આવી નથી પરંતુ વેશ્યાવૃતીના નેટવર્ક ચાલતું હોય અને હોટેલ માલિક-સંચાલકને ધ્યાન બહાર રહી જાય એ વધુ પડતું ન કેવાય ? હાલ સંચાલકને પોલીસે ફરાર દર્શાવ્યો છે. પરંતુ પોલીસને એવી આશંકા છે કે આ જ શખ્સ જામનગર ઉપરાંત અન્ય શહેરોમાં જિસ્મ ફરોસીના ધંધાનો માસ્ટર માઈન્ડ છે ? આ બાબતની કડીઓ આરોપી પકડાયા બાદ જ મળશે ? પોલીસે આ પ્રકરણની વિધિવત તપાસ હાથ ધરી છે.