જામનગરઃ જામનગર જિલ્લામાં સવારથી જ ધોધમાર વરસાદ વરસી રહ્યો છે. ત્યારે કાલાવાડ પંથકમાં પણ 10થી 12 ઇંચ વરસાદ થતા 2 ડેમ ઓવરફ્લો થયા છે. તો ધ્રોલ પંથકમાં પણ ધોધમાર વરસાદ થતા અનેક ગામડાઓ સંપર્ક વિહોણા બન્યા છે. તો સાથે જ લાલપુરમાં 2 કલાકમાં 4 ઇંચ વરસાદ ખાબકતા ઢાંઢર નદી બે કાંઠે વહી રહી છે. ભારે વરસાદના પગલે અનેક વિસ્તારોમાં જળબંબાકારીની સ્થિતિ સર્જાઇ હતી. પોરબંદર તરફનો વાહન વ્યવહાર ખોરવાયો હતો. સમગ્ર પંથકમાં ભારે વરસાદને પગલે કલેકટરે આપાતકાલીન બેઠક બોલાવવામાં આવી હતી.
લખોટા તળાવમાં નવા નીરની આવક
ઉપરવાસમાં વરસાદના કારણે જામનગરના લખોટા તળાવમાં નવા નીર આવ્યા છે. લખોટા તળાવ અત્યારે પાણીથી છલકાયું છે. ભારે વરસાદના કારણે લખોટા તળાવમાં પાણી આવતા લોકોમાં ખુશીનો માહોલ છવાયો છે. લખોટા તળાવમાં નવા નીરનો નજારો માણવા માટે મોટીસંખ્યામાં સ્થાનિકો ઉમટી પડ્યા છે.
શહેરના ચર્ચ ગેટ બેદી ગેટ ટાવર રોડ સહિતના વિસ્તારમાં પાણી ભરાયા છે. વહેલી સવારથી જિલ્લાના 6 તાલુકાઓમાં ધોધમાર વરસાદ વરસી રહ્યો છે. ભારે વરસાદને પગલે કલેક્ટરે આપાતકાલીન બેઠક બોલાવી હતી. બાવલી નદીમાં ઘોડાપૂર
જામનગર જિલ્લાના ધ્રોલ પંથકમાં ભારે વરસાદ નોંધાયો છે. ભારે વરસાદના કારણે બાવલી નદીમાં ઘોડાપૂર આવ્યું છે. નદી બે કાંઠે વહેતા ખારવા ગામનો કોઝ-વે પાણીમાં ગરકાવ થઈ ગયો છે. જ્યારે 15 જેટલા ગામના સંપર્ક તૂટી ગયા છે. કોઝ-વે પરથી પાણી વહેતા વાહનવ્યવહાર પણ ઠપ થઈ ગયો છે. જ્યારે ખારવા ઈટાળા બીજલકા માનસર હમાપર સહિતના 15 ગામડાઓનો સંપર્ક તૂટી ગયો છે.
જીવાપરમાં નદીમાં પૂર
કાલાવડમાં ધોધમાર કાલાવડમાં 5 ઇંચ વરસાદ ખાબક્યો હતો. જેને લઇને નદી-નાળા છલકાઈ ગયા છે. જીવાપર ગામ પાસે આવેલી નદીમાં ઘોડાપૂર આવ્યું છે. નદી પરનો ચેકડેમ ઓવરફ્લૉ થતાં નદી બે કાંઠે વહી રહી છે. બીજી તરફ ગ્રામ્ય પંથકમાં વરસાદથી ખેડૂતોમાં આનંદની લાગણી છવાઈ છે.