જામનગર શહેરમાં ચાલતી સફાઇ કામગીરીનું જામનગર મનપાના કમિશનરે બાઇક પર સવાર થઇ નિરીક્ષણ કર્યું હતું.
જામનગરના કમિશનરે સફાઈ કામગીરીનું નિરીક્ષણ કર્યું
JMCના કમિશનર બાઈક લઈને નીકળ્યા વિસ્તારની મુલાકાતે
વોર્ડ નંબર 2, 3 અને 4માં ચાલતી સફાઈ કામગીરીનું કર્યું નિરીક્ષણ
જામનગરમાં છેલ્લા કેટલાય દિવસથી વરસાદી માહોલ જામ્યો છે. જેમાં ક્યારેક છુટ્ટોછવાયો તો ક્યારેક અનરાધાર વરસાદ ત્રાટકી રહ્યો છે. તેવામાં જામનગરના નવાગામ ઘેડ અને પટેલ કોલોની સહિતના વિસ્તારમાં વરસાદ બાદ સફાઈ કામગીરી ચાલી રહી છે. તે કામગીરીનું જામનગર મહાનગરપાલિકાના કમિશનર વિજય કુમાર ખરાડીએ નિરીક્ષણ કર્યું હતું. વિજય કુમાર ખરાડીએ સાદગીપૂર્વક બાઇક પર સવાર થઇ જુદા-જુદા વિસ્તારની મુલાકાત લીધી હતી અને સફાઈ કામગીરીનું નિરીક્ષણ કર્યું હતું.
SWMના ઝોનલ અધિકારીઓને સાથે રાખીને કર્યું નિરીક્ષણ
જામનગર મહાનગરપાલીકાના કમિશનર વિજય કુમાર ખરાડીએ ઝોનલ અધિકારીઓને સાથે રાખીને વોર્ડ ન 2, 3, અને 4 નવાગામ ઘેડ, પટેલ કોલોની સહિતના વિસ્તારોની મુલાકાત કરી હતી. આ દરમિયાન પોસ્ટ મોન્સુનની સફાઈ કામગીરીનું નિરીક્ષણ કર્યું હતું અને સબંધિત વિભાગના સત્તાવાળાઓ સાથે ચર્ચા કરી અધિકારીઓને જરૂરી માર્ગદર્શન આપ્યું હતું.
ગત વર્ષે પણ કમિશનરે વરસાદ બાદ બાઇક લઈ જાત નિરીક્ષણ કર્યું હતું
નોંધનિય છે કે ગત વર્ષે મેઘરાજાએ જામનગરને ઘમરોળી નાખ્યું હતું. ત્યારે ભારેવરસાદ બાદ શહેરની સ્થિતિનો ચિતાર મેળવવા પણ મ્યુનિસિપલ કમિશ્નર વિજય ખરાડી જાત નિરીક્ષણ કરવા બાઇક લઇ રાત્રે શહેરમાં નીકળ્યા હતા.