જામનગરના ધ્રોલ ખાતે ગઇકાલે યોજાયેલ બાગાયત પાક પરિસંવાદ કાર્યક્રમમાં સાંસદ પૂનમ માડમે જામનગરના કલેક્ટરનો ઉધડો લઇ લીધો.
સાંસદ પૂનમ માડમે જામનગર કલેક્ટરનો ઉધડો લીધો
CM ભૂપેન્દ્ર પટેલની ઉપસ્થિતિમાં જ ખખડાવી દીધા
મહેમાનોનું સ્વાગત ન કરતા વાત વણસી હોવાની ચર્ચા
જામનગરમાં સાંસદ પૂનમ માડમે જામનગરના કલેક્ટરનો ઉધડો લઇ લીધો હોવાની ઘટના સામે આવી છે. CM ભૂપેન્દ્ર પટેલની ઉપસ્થિતિમાં જ સાંસદ પૂનમ માડમે કલેક્ટરનો ઉધડો લઇ લીધો હતો. ચાલુ કાર્યક્રમે જ સ્ટેજ પર ત્રણ મંત્રીઓ સિવાય અન્ય મહેમાનોનું સ્વાગત ન કરતા સાંસદ પૂનમ માડમે કલેક્ટરને ખખડાવ્યા હોવાનું જાણવા મળી રહ્યું છે. મહેમાનોનું સ્વાગત ન કરતા વાત વણસી હોવાની ચર્ચા ચાલી રહી છે. તમને જણાવી દઇએ કે, જામનગરના ધ્રોલ ખાતે બાગયત પરિસંવાદનો કાર્યક્રમ યોજાયો હતો. એ દરમ્યાન આ ઘટના ઘટી હતી.
ગઇકાલે ધ્રોલ ખાતે બાગાયત પાક પરિસંવાદ કાર્યક્રમ યોજાયો હતો
ઉલ્લેખનીય છે કે, ગઇકાલે જામનગરના ધ્રોલ તાલુકાના માવાપર ગામે રૂ. 3116 લાખના ખર્ચે નવનિર્માણ પામનાર સેન્ટર ઓફ એક્સલન્સ ફોર હોર્ટી કલ્ચર ક્રોપનું ઈ-ખાતમુહૂર્ત મુખ્યમંત્રી ભુપેન્દ્ર પટેલના હસ્તે કરવામાં આવ્યું હતું.
જામનગરના ધ્રોલ ખાતે આયોજીત કાર્યક્રમમાં મુખ્યમંત્રી ભૂપેન્દ્ર પટેલે હાજરી આપી હતી. બાગાયત પાક પરિસંવાદ તથા સેન્ટર ઓફ એક્સેલન્સ અને પ્રાઇમરી પ્રોસેસિંગ સેન્ટરનો મુખ્યમંત્રી દ્વારા ઈ ખાતમુહૂર્ત કરવામાં આવ્યું હતું. તેમજ મુખ્યમંત્રીના હસ્તે કુલ 7 જિલ્લાઓમાં રૂ. 51 કરોડના ખર્ચના ઈ-ખાતમુહૂર્ત કરવામાં આવ્યા. 684 જેટલાં લાભાર્થી ખેડૂતોને રૂ. 2 કરોડ 16 લાખની વિવિધ સરકારી યોજનાની સહાય આપવામાં આવી. કાર્યક્રમમાં ખૂબ મોટી સંખ્યામાં ખેડૂતો ઉપસ્થિત રહ્યાં હતા.
જામનગરના ધ્રોલ ખાતેના કાર્યક્રમ પહેલા મુખ્યમંત્રીએ ખેતીલક્ષી પ્રદર્શનના સ્ટોલની મુલાકાત લીધી હતી. દરમ્યાન સ્ટોલ મુલાકાત સમયે કૃષિમંત્રી રાઘવજી પટેલ, રાજ્યમંત્રી બ્રિજેશ મેરજા, સાંસદ પૂનમબેન માડમ, પૂર્વ મંત્રી હકુભા જાડેજા સહિતના મહાનુભાવો ઉપસ્થિત રહ્યાં હતા. ધ્રોલની જી.એમ. પટેલ હાઇસ્કુલના પટાંગણમાં યોજાયેલ કાર્યક્રમમાં મોટી સંખ્યામાં ખેડૂતો ઉપસ્થિત રહ્યાં હતા.