ઉજવણી / હનુમાન જન્મોત્સવમાં અઢળક સિંદૂર પી ગયા પૂજારી: ગુજરાતનાં આ મંદિરમાં 50 વર્ષથી ચાલી રહી છે અનોખી પરંપરા

• જામનગરમાં હનુમાન જયંતિની ઉજવણી
• 50 વર્ષની ઉજળી પરંપરા રહી યથાવત 
• મંહતે થાળ જેટલું સિંદૂર પીધું 

છોટા કાશી ગણાતા જામનગર સહિત દેશભરમાં હનુમાન જયંતિની ઉલ્લાસભેર ઉજવણી કરવામાં આવી રહી છે ત્યારે હનુમાન જયંતિના પાવન આવસરે જામનગરના આંગણે આશરે 50 વર્ષની પરંપરા યથાવત રહેવા પામી હતી. જામનગરના કિસાન ચોક વિસ્તારમાં આવેલ શ્રી ફૂલીયા હનુમાન મંદિરને આંગણે મહંતે એક થાળ જેટલો સિંદૂર પી ઉપસ્થિત ભક્તોને અચંબામાં મુકી દીધા હતા.

વિવિધ કાર્યક્રમોનું આયોજન

જામનગરમાં આજે ભગવાન રામના પરમ ભકત અને ચિરંજીવી દેવ ગણાતા શ્રી હનુમાનજી મહારાજના જન્મોત્સવ નિમિતે  ધાર્મિક કાર્યક્રમો યોજાયા હતા. લાડુનો હવન, સમુહ હનુમાન ચાલીસા, સુંદરકાંડ, બટુક ભોજન, પ્રભાતફેરી, શોભાયાત્રા, રામધૂન, નૂતન ધ્વજારોહણ સહિતના વિવિધ ધર્મકાર્યોનું આયોજન કરાયું હતું.

સિદૂંરનો થાળ પ્રસાદી રુપે પીધો 

હજારો જામનગરવાસીઓના આસ્થાના અખૂટ સમુદ્ર સમાન જામનગરના કિશાન ચોક ખાતેના શ્રી ફુલીયા હનુમાન મંદિરે હનુમાન જયંતિ નિમિતે અનોખી ઘટના બની હતી. જેમાં દર વર્ષની ઉજળી પરંપરા મુબજ પ્રાત:કાળ 4 વાગ્યે પૂજા કરવામાં આવી હતી. ત્યારબાદ સવારે 5:15 વાગ્યે ભગવાન હનુમાનજી મહારાજના સામૈયા-આમંત્રણની વિધી કરવામાં આવી હતી અને સવારે 5:30 વાગ્યાથી પૂજારી દિપકભાઇ કુબાવતેને હનુમાનજી પંડમાં આવ્યાનો અહેસાસ થયો હતો આ દરમિયાન હનુમાનજીની મૂર્તિને લગાવવા માટે રાખેલ તેલ મિશ્રિત નવો સિંદૂર થાળ રાખવામાં આવ્યો હતો   તે પૂજારી દિપકભાઇ કુબાવત હનુમાનની પ્રસાદીરૂપે પી ગયા હતા.જે નિહાળી ભક્તો અચંબામાં મુકાઈ ગયા હતા.

આશરે 50 વર્ષની પરંપરા યથાવત રહી

ઉલ્લેખનિય છે કે જામનગરના આંગણે આશરે 50 વર્ષથી આ પરંપરા ચાલી રહી છે.દર વર્ષે અહીંના પૂજારી સીંદુરની પ્રસાદી ગ્રહણ કરે છે આજે પણ અનેક ભકતો-દર્શનાર્થીઓની હાજરીમાં તેઓએ સિંદુરની પ્રસાદી ગ્રહણ કરી હતી.વધુમાંદિપકભાઇ કુબાવતના પિતા અને દાદા પણ આ મંદિરના સેવક રહી ચુકયા હોય દિપકભાઇ ત્રીજી પેઢીના સેવક ગણાય છે.