ક્યાં છે વિકાસ / જામનગર જિલ્લા પંચાયતમાં કર્મચારીઓની ઘટે ખોલી સરકારની પોલ, નાગરિકો ચડ્યાં ટલ્લે

વધતી વસતિ અને બદલાતા સમયમાં સરકારી કચેરીઓ પર કામનું ભારણ વધ્યું છે. પરંતુ રોજગારીના સર્જનના દાવાઓ વચ્ચે સરકારી કચેરીઓમાં જ કર્મચારીઓની મોટી ઘટ વર્તાઈ રહી છે. પરિસ્થિતિ એ સર્જાઈ છે કે, વિકાસ માટે દોડધામ કરતી સરકાર પાસે જ તેના વિકાસ રથને આગળ હંકારી શકે તેટલો સ્ટાફ નથી. તો ક્યાં કર્મચારીઓ વગર નાગરિકોના કામ ચડ્યાં છે ટલ્લે. તે જોઈએ આ અહેવાલમાં.

ટેબલ પર ફાઈલોના ઢગલાં ખડકાયેલા છે પરંતુ ખુરશી પર કોઈ જ કર્મચારી નથી. કોમ્પ્યુટર અને પ્રિન્ટર પર સફેદ કપડા ઢાંકેલા છે. કેમ કે, તેના પર ધૂળ ન જામી જાય તેની તંત્રને ચિંતા છે. કપડાંથી ઢાંકેલા આ કોમ્પ્યુટર અને કર્મચારી વગરની આ ખાલીખમ ખુરશીઓ જોઈને તમે એમ ન માની લેતા કે કોઈ કર્મચારી રજા પર હશે. હકીકતમાં અહીં દરરોજ આવું હોય છે. કેમ કે, રોજગારીના સર્જનના વચનો આપનારી સરકાર જ પોતાની ઓફિસોમાં કર્મચારીઓ ફાળવવાનું ભૂલી ગઈ છે.

ઓફિસમાં ટેબલ પર ધૂળખાતી ફાઈલો પણ ઝંખે છે કે અહીં કોઈ કર્મચારી આવે અને અને નાગરિકોના કામ થાય. આ કોમ્પ્યુટરો કહે છે કે, કોઈ તેના પરથી આ પડદો હટાવે અને તેને સ્ટાર્ટ કરે. રાજ્યની જામનગર જિલ્લા પંચાયત કચેરી એ સમગ્ર રાજ્યની સરકારી કચેરીની હાલત વર્ણવી રહી છે. જામનગર જિલ્લા પંચાયતમાં વર્ગ 1થી 4માં હાલમાં 1039 જેટલી જગ્યાઓ ખાલી છે. અહીં કર્મચારીઓની અછતના કારણે નાગરિકોના કામ સમયસર થતાં નથી. ઓફિસમાં જે કર્મચારી હાજર હોય તે કામના ભારણના કારણે પોતાના કામને ન્યાય આપી શકતા નથી અને લોકોને કામ માટે ધક્કા ખાવા પડે છે.

જામનગર જિલ્લા પંચાયતમાં કુલ મહેકમ 5,820નું છે. પરંતુ તેમાંથી હાલ માત્ર 4,781 કર્મચારીઓ કાર્યરત છે. જીલ્લા પંચાયતમાં વર્ગ એકથી માંડીને ચાર સુધીની 1039 જેટલી જગ્યાઓ ખાલી છે. વર્ગ પ્રમાણે ફાળવેલા મહેકમ અને ભરાયેલી તેમજ ખાલી જગ્યાઓની વાત કરીએ તો અહીં વર્ગ એકની કુલ 16 જગ્યાઓ છે તેમાંથી 7 જગ્યાઓ ભરાયેલી છે અને 9 જગ્યા ખાલી છે. તો અહીં વર્ગ-2નું મહેકમ 136નું છે પરંતુ તેમાંથી માત્ર 87 જગ્યા જ ભરાયેલી છે જ્યારે 49 જગ્યા ખાલી છે. તો વર્ગ 3 માટે કુલ 5509નું મહેકમ મંજૂર કરાયેલું છે પરંતુ તેમાંથી 4603 જગ્યા ભરાયેલી છે જ્યારે હાલની સ્થિતિએ 906 જગ્યાઓ ખાલી છે. વર્ગ-4ની વાત કરીએ તો તે માટે 159નું મહેકમ છે પરંતુ તેમાંથી માત્ર 84 જગ્યાઓ જ ભરાયેલી છે જ્યારે 75 જગ્યાઓ હાલ ખાલી છે.

મહેકમ      જગ્યા      ભરાયેલી જગ્યા       ખાલી જગ્યા  
વર્ગ-1        16             7                         9 
વર્ગ-2       136            87                       49 
વર્ગ-3       5509         4603                    906 
વર્ગ-4       159            84                       75 

ખાલી રહેલી જગ્યાઓ ભરવા માટે સરકારે ખાસ 10 વર્ષનું ભરતી કેલેન્ડર તૈયાર કર્યું હતું. પરંતુ છેલ્લા બે વર્ષથી કોઈ ભરતી પ્રક્રિયા થઈ નથી. ફેબ્રુઆરી 2012માં ગુજરાત સરકારના 14 વિભાગોમાં કુલ 62 હજાર જગ્યા ખાલી હતી. હવે 2019માં 50 ટકા જગ્યા ખાલી હોવાનું નોંધાયું છે. દર વર્ષે સરકારી ઓફિસોમાં ખાલી જગ્યાનું પ્રમાણ વધતું જાય છે અને બીજી તરફ સરકાર અંતરિયાળ ગામડાના સર્વાંગી વિકાસની વાતો કરે છે. ત્યારે સવાલ એ ઉભો થાય છે કે, કર્મચારીઓ વગર વિકાસ કાર્યક્રમની અમલવારી કઈ રીતે થશે?