જસદણ પેટાચૂંટણી: મહિલા પ્રદેશ અધ્યક્ષની કારમાંથી એરગન મળતા ખળભળાટ

જસદણમાં પેટા ચૂંટણીના માહોલમાં પૈસા અને દારૂની હેરાફેરીની આશંકાને લઈને પોલીસે ચૂસ્ત બંદોબસ્ત સાથે ચેકિંગ હાથ ધર્યું છે. તેવામાં ચેકિંગ દરમિયાન કોંગ્રેસના મહિલા પ્રદેશ અધ્યક્ષની કારમાંથી પોલીસને એરગન મળી આવી છે.

પોલીસે એરગન પોતાના કબજામાં લઈ કોંગ્રેસના ગીતાબેન પટેલ સામે કાર્યવાહી હાથ ધરી છે. સમગ્ર મામલે ગીતાબેન પટેલનું નિવેદન પણ પોલીસ દ્વારા લેવામાં આવ્યું છે.



ઉલ્લેખનીય છે કે જસદણ પેટા ચૂંટણીના પડઘમ વાગી રહ્યા છે ત્યારે ચૂંટણીને અનુસંધાને રાજકોટના જિલ્લા કલેક્ટર દ્વારા ચૂંટણી અંગેનું એક જાહેરનામુ બહાર પાડવામાં આવ્યું છે.

બે દિવસ પહેલાથી જ પેરામિલેટ્રી ફૉર્સને તૈનાત કરી દેવામાં આવી છે. ચૂંટણીને ધ્યાને રાખીને વાહનોમાં ચેકિંગ હાથ ધરવામાં આવ્યું છે. ત્યારે ગતરોજ કોંગ્રેસના મહિલા પ્રદેશ અધ્યક્ષ ગીતા બહેન પટેલની કારને તપાસ માટે અટકાવવામાં આવી હતી.

ચૂંટણી સમયે કોઇ અનિચ્છનીય બનાવ ન બને તે માટે અટકાવવામાં આવેલ કારમાંથી એરગન મળી આવતા મામલો ગરમાયો હતો. જો કે આ ઘટનાને પગલે પોલીસ દ્વારા એરગનને પોતાના કબજામાં લઇને તાત્કાલિક અસરથી કાયદેસરની કાર્યવાહી હાથ ધરી હતી.