VTVનો ગ્રાઉન્ડ રિપોર્ટ / જમ્મુ-કાશ્મીરનાં સ્થાનિકોએ કહ્યું, '70 વર્ષમાં જે ના થયું તે હવે થશે'

જમ્મુ-કાશ્મીરમાં (jammu kashmir) કેન્દ્ર સરકાર દ્વારા કલમ 370 (article 370) હટાવી દેવામાં આવી છે. જેને પગલે જમ્મુ-કાશ્મીરમાં હાલમાં ચુસ્ત સુરક્ષા બંદોબસ્ત ગોઠવી દેવામાં આવ્યો છે અને વાહન ચાલકોનું પૂરજોશમાં ચેકિંગ પણ કરવામાં આવી રહ્યું છે. બીજી બાજુ જમ્મુ-કાશ્મીરમાં જનજીવન પણ સામાન્ય થઈ રહ્યું છે. ધીરે ધીરે દુકાનો પણ હવે ખુલી રહી છે. જમ્મુના કેટલાંક વિસ્તારોમાં કેટલીક દુકાનો ખુલી છે તો બીજી તરફ લોકો પણ હવે ઘરની બહાર નીકળી રહ્યાં છે.

જમ્મુ-કાશ્મીરમાંથી કેન્દ્ર સરકારે 370 અને 35A કલમ હટાવી લીધી છે. ત્યારે જમ્મુ-કાશ્મીરની સ્થિતિનો તાગ મેળવવા માટે વીટીવીની ટીમ શ્રીનગરમાં પહોંચી છે. ત્યારે જો જમ્મુ-કાશ્મીરના સ્થાનિકોની વાત કરીએ તો તેઓ સરકારના આ નિર્ણયથી ખૂબ ખુશ છે તેમજ ખીણ પ્રદેશમાં કેટલાંક લોકોમાં હજુ પણ અસમંજસની સ્થિતિમાં છે.

વીટીવીના ગ્રાઉન્ડ રિપોર્ટ દ્વારા જાણવા મળી રહ્યું છે તેની જો વાત કરીએ તો ઘાટી વિસ્તારમાં હાલમાં પણ લોકો અસંમજસમાં છે. કાશ્મીરના નેતાઓની સ્થિતિ સાપે છછુંદર ગળવા જેવી થઇ ગઇ છે. કાશ્મીરના નેતાઓના હાથમાં રાતો રાત સરકાર ચાલી જતા તેઓ ચિંતામાં મૂકાઇ ગયા છે.

મહેબુબા મુફ્તિ અને ઓમર અબ્દુલા વિરોધી હોવા છતાં પણ એક થઇ ગયા છે. કાશ્મીરમાંથી 370ની કલમ હટાવાતા જ તેઓ એક થઇ ગયા છે. કારણ કે હવે તેમના હાથમાં ક્યારેય સરકાર નહીં આવે. પોતાના હાથમાંથી સત્તા જતાં નેતાઓ હાંફળા-ફાંફળા બની ગયા છે. મોદી અને શાહની રણનીતિમાં તેઓ ઉંઘતા ઝડપાયા છે. જો કે જમ્મુ અને કાશ્મીરના યુવાનો માટે આ ઘડી રોજગાર પેદા કરનારી બની છે.

આગામી ઓક્ટોબરમાં જમ્મુ કાશ્મીરમાં રોકાણકારો માટે સમિટનું સરકારનું હાલનું આયોજન છે. જેમ ગુજરાતમાં વાયબ્રન્ટ સમિટ યોજાય છે તે જ રીતે કાશ્મીરમાં પણ હવે રોકાણકારો માટે સમિટ યોજાશે. ઉધોગોને રોકાણ કરવા માટે આકર્ષવામાં આવશે.

ઉલ્લેખનીય છે કે જમ્મુ-કાશ્મીરને લઇને મોદી સરકારે ખૂબ મહત્વપૂર્ણ નિર્ણય લીધો છે. ગૃહમંત્રી અમિત શાહે રાજ્યસભામાં જમ્મુ-કાશ્મીરને લઇને સરકારનો સંકલ્પ પત્ર રજૂ કર્યો કે જેમાં અમિત શાહે કહ્યું કે કાશ્મીરમાં વિશેષ દરજ્જો આપનાર કલમ-370 હટાવી દેવામાં આવી છે. અમિત શાહે કાશ્મીરના પુનર્ગઠનનો પ્રસ્તાવ રજૂ કર્યો હતો.

મોદી સરકાર દ્વારા હવે જમ્મુ-કાશ્મીરને કેન્દ્રશાસિત પ્રદેશ બનાવવામાં આવ્યો છે. આ સાથે સાથે લદ્દાખને જમ્મુ-કાશ્મીરથી અલગ કરી દેવામાં આવ્યું છે. જમ્મુ-કાશ્મીરને બે ભાગમાં અલગ કરી દેવામાં આવ્યું છે. ગૃહમંત્રી અમિત શાહે રાજ્યસભામાં કહ્યું હતું કે જમ્મુ-કાશ્મીરમાં કેન્દ્ર શાસિત પ્રદેશ હશે જેમાં વિધાનસભામાં ચૂંટણી થશે. આમ હવે જમ્મુ-કાશ્મીરમાં હવે દિલ્હીને જેમ વિધાનસભાની જેમ અને લદ્દાખ, ચંદીગઢની જેમ વિધાનસભા વિહીન કેન્દ્રશાસિત પ્રદેશ બનશે. જમ્મુ-કાશ્મીરમાં હવે તિરંગો લહેરાવાશે.